މާލެ-ތިލަފުށި ބްރިޖުގެ ވެހިކަލްތައް ދުއްވާ ބައިގެ މަސައްކަތް ކ. ގުޅީފަޅުގައި ފެށިފައިވާ ކަމަށް ހައުސިން މިނިސްޓްރީން ބުނެފި އެވެ.
ހައުސިން މިނިސްޓްރީން ބުނެފައި ވަނީ ބްރިޖުގެ ޑެކްގެ ސެގްމަންޓް ޔުނިޓްސްތައް ޕްރީ ކާސްޓް ކުރުމުގެ މަސައްކަތް މިހާރު ގުޅީފަޅުގައި ކުރިއަށްދާ ކަމަށެވެ.
ބްރިޖުގެ ޑެކަކީ ބްރިޖަށް އަރާ ވެހިކަލްތައް ދުއްވަން ހާއްސަކޮށްފައި އޮންނަ ބައެވެ. މިއީ ތިލަމާލެ ބްރިޖު މަޝްރޫއުގައި ހިމެނޭ މައިގަނޑު އަދި އެންމެ މުހިންމު އެއް މަސައްކަތް ކަމަށް ހައުސިން މިނިސްޓްރީން ބުންޏެވެ.
އިންޑިއާގެ އެފްކޮންސް އިންފްރާސްޓްރަކްޗާއާ ހަވާލުކޮށްފައިވާ ތިލަމާލެ ބްރިޖު މަޝްރޫއަކީ ރާއްޖޭގައި މި ސަރުކާރުން ކުރިއަށް ގެންދާ އުމްރާނީ އެންމެ ބޮޑު މަޝްރޫއެވެ. އެގޮތުން ބްރިޖުގެ އެންމެ ބޮޑު، އަދި އެންމެ އުނދަގޫ މަސައްކަތްތައް އެފްކޮންސް އިން ކުރަމުން އަންނަނީ ގުޅީފަޅުގަ އެވެ.
ތިލަމާލެ ބްރިޖު މަޝްރޫއުގެ ދަށުން މާލެ އާއި ވިލިމާލެއާ ދެމެދު ކަނޑުގައި އެކަނިވެސް މައިގަނޑު ނުވަ ތަނބު ހުންނާނެ ކަމަށް މައުލޫމާތު ލިބެ އެެވެ. މިވަގުތު މާލެ ސަރަހައްދުގައި ކުރަމުން އަންނަ މައިގަނޑު މަސައްކަތަކީ އެއްގަމުގައި ޖަހާ ހުރިހާ ތަނބުތަކެއްގެ ޕައިލިން މަސައްކަތް ނިންމައި ޕައިލް ކެޕްގެ މަސައްކަތް ކަމަށް ވެސް މިނިސްޓަރީން ބުނެ އެެވެ.
