ފްރާންސްގައި ރިޓަޔާ ކުރާ އުމުރު 64 އަހަރަށް ބަދަލުކުރަން އުޅޭ މައްސަލައިގައި ރައީސް އިމޭނުއެލް މެކްރޯންގެ ސަރުކާރާ ދެކޮޅަށް ހުށަހެޅި އިތުބާރު ނެތްކަމުގެ މައްސަލައިން ހަނި ގޮތަކަށް ސަލާމަތްވެއްޖެ އެވެ.
ރިޓަޔާ ކުރާ އުމުރުން 62 އަހަރުން 64 އަހަރަށް އުފުލަން ނިންމުމުން ކުރަމުންދާ މުޒާހަރާތަކުގައި މިހާތަނަށް 101 މީހުން ހައްޔަރުކޮށްފައިވާ އިރު، ދޭތެރެ ދޭތެރެއިން ހަމަނުޖެހުން ހިނގަ އެވެ.
އެކަމާ ހެދި ޕާލަމެންޓަށް ހުށަހެޅި އިތުބާރު ނެތްކަމުގެ މައްސަލައިގައި ސަރުކާރާ ދެކޮޅަށް ވޯޓު ދިނީ 278 މެމްބަރުންނެވެ. ފާސްވާން ބޭނުންވީ 287 މެމްބަރުންގެ ވޯޓެވެ.
ޕާލަމެންޓުން އިތުބާރު ނެތް ކަމަށް ފާސްކުރި ނަމަ، މެކްރޯންއަށް ޖެހިވަޑައިގަންނަވާނީ އާ ސަރުކާރެއް އެކުލަވާލުމުގެ މަސައްކަތް ކުރަން ނުވަތަ އާ އިންތިހާބެއް އިއުލާން ކުރާށެވެ.
ހަނި ގޮތަކަށް ސަރުކާރު ސަލާމަތްވުމުން، ރިޓަޔާ ކުރާ އުމުރު މަތިކުރަން ނިންމި ނިންމުން ގާނޫނަކަށް ހަދާނެ އެވެ. އެ ގާނޫނުގެ ދަށުން ރިޓަޔަމެންޓް ޕެންޝަން ދެން ލިބޭނީ 64 އަހަރުން މަތީގެ މީހުންނަށެވެ.
އެފަދަ ގާނޫނެއް ގެންނަން ނިންމީ ބޮޑު ވަޒީރު އެލިސަބެތު ބޯންއަށް ލިބިވަޑައިގަންނަވާ ހާއްސަ ބާރުގެ ދަށުން ޕާލަމެންޓުގެ ވޯޓަކަށް ދިޔުމެއް ނެތި އެވެ.
ގައުމުގެ މަޝްރަހު ހޫނުވެ، ވެރިރަށް ޕެރިހާއި އެހެން ސިޓީތަކުގައި މުޒާހަރާ ފެށީ ވޯޓަކަށް ނުގޮސް އެ ގާނޫނު ތަންފީޒު ކުރަން އުޅުމުންނެވެ.
ހޯމަ ދުވަހު ޕާލަމެންޓުގައި ނެގި އިތުބާރު ނެތްކަމުގެ މައްސަލައިން ސަރުކާރު ސަލާމަތްވުމުން ވެސް ހިތްހަމަނުޖެހިފައި ތިބި މީހުން މަގުތަކަށް ނިކުމެ އަޑުއުފުލި އެވެ.
ސަރުކާރުން ބުނީ ރިޓަޔާ ކުރާ އުމުރު މަތިކުރަނީ މަޖުބޫރުވެގެން ކަމަށާއި ޕެންޝަންގެ ސަބަބުން މުޅި ނިޒާމު ފެއިލްވުން ހުއްޓުވޭނީ އެ ފިޔަވަޅު އަޅައިގެން ކަމަށެވެ.
އެހެން ނަމަވެސް، ގިނަ މީހުން އެ ވިސްނުމާ ދެކޮޅެވެ. އެ މައްސަލައިގައި ސިޔާސީ ބަހުސްތައް ބާއްވައި އިހްތިޖާޖު ކުރާތާ ދެ މަހަށް ވުރެ ގިނަ ދުވަސް ވެއްޖެ އެވެ.
އޭގެ ސަބަބުން ދަތުރުފަތުރާއި އާއްމު ހިދުމަތްތަކާއި ސްކޫލްތަކަށް އަސަރު ކުރަމުންދާ އިރު، ކުނި ނަގާ މީހުން އިހްތިޖާޖު ކުރުމުގެ ގޮތުން މަސައްކަތް ހުއްޓައިލުމުން ޕެރިހުގެ މަގުތައް ވަނީ ގޮނޑުވެފަ އެވެ.
