އަންނަ މޭ މަހު އޮންނަ ތުރުކީގެ އިންތިހާބުގައި ރައީސް ތައްޔިބް އުރުދުގާންއާ ދެކޮޅު ކެންޑިޑޭޓެއްގެ ގޮތުގައި ކެމާލް ކިލިޗްދަރޯލޫގެ ނަން އިދިކޮޅު ޕާޓީތަކުން އިއުލާންކޮށްފި އެވެ.
ކިލިޗްދަރޯލޫއަކީ މައި އިދިކޮޅު ރިޕަބްލިކަން ޕީޕަލްސް ޕާޓީ (ސީއެޗްޕީ) ގެ ލީޑަރެވެ. ޕޯލްތައް ދައްކާ ގޮތުން އޭނާ އާއި ފާއިތުވި 20 އަހަރު ވެރިކަން ކުރެއްވި އުރުދުގާންގެ ވާދަވެރިކަން ބޮޑުވާނެ އެވެ.
އިގްތިސާދީ ކާރިސާ އާއި ފެބްރުއަރީ މަހު އައި ބޮޑު ބިންހެލުމާ ގުޅިފައިވާ ކަންކަމުގެ ސަބަބުން ކުރިއަށް އޮތް އިންތިހާބުގައި އުރުދުގާންއަށް ގޮންޖެހުންތައް ގިނަ އެވެ.
"ޓޭބަލް އޮފް ސިކްސް"ގެ ގޮތުގައި މަގްބޫލުވެފައިވާ އިދިކޮޅު ޕާޓީތަކުގެ ކޯލިޝަނުން ކިލިޗްދަރޯލޫގެ ނަން އިއުލާން ކުރި އިރު، ސަޕޯޓަރުން އެއްވެ އުފާ ފާޅުކުރި އެވެ.
"އަޅުގަނޑުމެންގެ މޭޒަކީ ސުލްހައިގެ މޭޒެއް. އަޅުގަނޑުމެންގެ ހަމައެކަނި ލަނޑުދަނޑިއަކީ ކުރިއެރުމާއި ސުލްހަ އާއި އުފާވެރި ދުވަސްތަކެއް ގައުމަށް ގެނައުން،" އުމުރުން 74 އަހަރުގެ ކިލިޗްދަރޯލޫ ވިދާޅުވި އެވެ.
އެނެލިސްޓުން ބުނާ ގޮތުގައި އޭނާއަކީ އުރުދުގާންއާ ވަރަށް ތަފާތު ބޭފުޅެކެވެ. ބައެއް މީހުން ކިލިޗްދަރޯލޫ ސިފަކުރަނީ ތުރުކީގެ ގާންދީގެ ގޮތުގަ އެވެ.
އޭނާ ވިދާޅުވީ ތުރުކީއަށް އަލުން ބަރުލަމާނީ ނިޒާމު ގެންނަވާނެ ކަމަށެވެ. ބަރުލަމާނީ ނިޒާމު އުވާލައި ރިޔާސީ ނިޒާމު ގެނެސް، ރައީސްގެ ބާރުތައް ވަރުގަދަ ކުރީ 2018 ވަނަ އަހަރު އުރުދުގާން އެވެ.
ތުރުކީގެ މައި އިދިކޮޅު ސީއެޗްޕީ އުފެއްދީ ޒަމާނީ ތުރުކީގެ ބާނީ މުސްތަފާ ކެމާލް އަތާތުރްކް އެވެ. އެއީ ތުރުކީގެ އެންމެ ގިނަ ދުވަސްވީ ސިޔާސީ ޕާޓީ އެވެ. އެހެން ނަމަވެސް 1990 ގެ އަހަރުތަކަށް ފަހު އެ ޕާޓީއަށް ވެރިކަން ލިބިފައެއް ނުވެ އެވެ.
