"ރެޑްބުލް ސްޕައިކް" ވޮލީބޯޅަ މުބާރާތުގެ އަންހެން ބައިގެ ޗެމްޕިއަންކަން ލޭޑީސް އިން ބްލޫ އަދި ފިރިހެން ބައިގެ ޗެމްޕިއަންކަން ސަނީ ސުއިޓްސް އިން އިން ހޯދައިފި އެވެ.
ހުޅުމާލޭ ޔޫތު ޕާކުގެ ބީޗްވޮލީބޯޅަ ކޯޓުގައި ކުރިއަށްދިޔަ "ރެޑްބުލް ސްޕައިކް" މުބާރާތުގައި މި އަހަރު ފިރިހެން 13 ޓީމް އަދި އަންހެން ހަ ޓީމް ވާދަކުރި އެވެ.
އަންހެން ބައިގެ ފައިނަލުގައި ވާދަކޮށް ޗެމްޕިއަންކަން ހޯދީ ގައުމީ ޓީމްގެ ކެޕްޓަން ހައްވާ ރާޝިދާ (ހައްވަ) ކުޅުނު ލޭޑީސް އިން ބްލޫ އެވެ. މި ޓީމުގައި ހައްވަގެ އިތުރުން ދެން ހިމެނެނީ އައިޝަތު ޝަހާ ޝާމިން، ފާތިމަތު ޝަމްހާ، ފާތިމަތު ޒީނިއާ އަދި މަރިޔަމް އަޒުމާ އެވެ.
ސީދާ ދެ ގޭމުން ފައިނަލުގައި ބަލިވެ އަންހެން ބައިގެ ދެ ވަނަ ހޯދީ ސަނީ ސުއިޓްސް އިން އެވެ. މި ޓީމުގައި ހިމެނެނީ އައިޝަތު މާޖިދާ، ފާތިމަތު ޖޫޒާން ޒަރީރު، ފާތިމަތު މަޒިއްޔާ، އާމިނަތު އަރީޝާ އަދި މަރިޔަމް މާޔާ އެވެ.
އަންހެން ޑިވިޝަންގެ ތިން ވަނަ ހޯދީ ޓީމް ޓްރޫ އެވެ. ހަތަރު ވަނަ އަށް ދިޔައީ ޓީމް ފްލޭމްސް އެވެ.
މުބާރާތުގެ ފިރިހެން ބައިގެ ޗެމްޕިއަންކަން ހޯދީ ސަނީ ސުއިޓްސް އިން އެވެ. އެ ޓީމު ފައިނަލް މެޗު ކާމިޔާބުކުރީ ނިއޯން ސްޕޯޓްސް ކުލަބާ ވާދަކޮށް ސީދާ ދެ ގޭމުންނެވެ.
ސަނީ ސުއިޓްސް އިންގެ ފިރިހެން ޓީމްގައި ހިމެނެނީ މުހައްމަދު އަލީ (ޑެންޒޯ)، އަލީ އާމިރު، އަލީ ޝިމާލް، އިބްރާހިމް އާދިލް އަދި މުހައްމަދު ނިހާދު އެވެ.
ފައިނަލުން ބަލިވި ނިއޯން ސްޕޯޓްސް ކުލަބުގައި ތިބި ކުޅުންތެރިންނަކީ އާދަމް ފައިރޫޒް، އަލީ ނިމާލް، ޖަވާމް އަލީ، ހުސައިން ރަޒާން އަދި މުހައްމަދު މިމްރާހު ހަސަން (މިންމި) އެވެ.
ފިރިހެން ބައިގެ ތިން ވަނަ ހޯދީ ޑީވީވީއޭ އެވެ. ތިން ވަނަ ހޮވި މެޗުގައި ޑީވީވީއޭ އިން ވަނީ އަލްޖިބްރާ ބަލިކޮށްފަ އެވެ.
ޕާކް ވޮލީބޯޅަ ކުރިއެރުވުމަށް ދުނިޔޭގެ އެކި ހިސާބުތަކުގައި ރެޑްބުލް އިން ކުރިއަށްގެންދާ "ރެޑްބުލް" ސްޕައިކް" ރާއްޖޭގައި ބޭއްވި މިއީ ފުރަތަމަ ފަހަރެވެ. މި މުބާރާތް އަންނަ އަހަރު ރާއްޖޭގެ އެހެން އަތޮޅުތަކުގައި ބޭއްވުމަށް އިސްކަންދޭނެ ކަމަށް ރެޑްބުލް އިން ހާމަ ކުރެ އެވެ.
ރެޑްބުލް އަކީ ދުނިޔޭގެ އެކި ގައުމުތަކުގައި އެކްސްޓްރީމް ސްޕޯޓްސް ކުރިއެރުވުމުގައި މަގުބޫލު ބްރޭންޑެކެވެ. އެ ގޮތުން ރާއްޖޭގައި ވެސް ކުޅިވަރުގެ އެކި ހަރަކާތްތައް ހިންގައި ބޭރު ގައުމުތަކުގެ އެތުލީޓުންނާ ވާދަކޮށްލުމުގެ ފުރުސަތު ދިވެހި އެތުލީޓުންނަށް ހޯދައިދެ އެވެ.
