ފެބްރުއަރީ ހަ ވަނަ ދުވަހު އައި ބޮޑު ބިންހެލުމުގައި ތުރުކީއިން އިމާރާތްތައް ވެއްޓުނު މައްސަލައިގައި 184 މީހުން ހައްޔަރުކޮށްފި އެވެ.
ތުރުކީގެ ޖަސްޓިސް މިނިސްޓަރު ބެކިރް ބޮޒްދަގް ވިދާޅުވީ ހައްޔަރު ކުރި މީހުންގެ ތެރޭގައި ކޮންސްޓްރަކްޝަން ކޮންޓްރެކްޓަރުންނާއި އިމާރާތްތަކުގެ ވެރިން ހިމެނޭ ކަމަށެވެ.
ތުރުކީގެ މީޑިއާއިން ރިޕޯޓުކުރި ގޮތުގައި ބިންހެލުމުގައި ވަރަށް ބޮޑަށް އަސަރު ކުރި އަވަށެއްގެ މޭޔަރު ވެސް ވަނީ ހައްޔަރުކޮށްފަ އެވެ.
ފުލުހުން ކުރަމުންދާ ތަހުގީގުތަކުގައި 600 އަށް ވުރެ ގިނަ މީހުންގެ މައްސަލަ ދަނީ ބަލަމުންނެވެ. ތުރުކީގައި ކޮރަޕްޝަނާއި ސަރުކާރުގެ ސިޔާސަތުތަކުގެ ސަބަބުން އިމާރާތްތަކުގެ ރައްކާތެރިކަން ކުޑަ ކަމަށް ބުނެ ތަޖުރިބާކާރުން އިންޒާރުދެމުންދާތާ އަހަރުތަކެއް ވެއްޖެ އެވެ.
ތުރުކީ އާއި ސީރިއާއިން ބިންހެލުމުގައި މަރުވި މީހުންގެ ޖުމްލަ އަދަދު މިހާރު އުޅެނީ 50،000 އަށް ވުރެ މަތީގަ އެވެ. ތުރުކީ އާއި ސީރިއާ ގުޅޭ ބޯޑަރު ކައިރިއަށް އައީ 7.8 މެގްނިޓިއުޑްގެ ބިންހެލުމެކެވެ. އޭގެ ފަހުން ވެސް ބާރުގަދަ ލޮޅުންތަކެއް އައެވެ.
ބިންހެލުމުގެ ސަބަބުން ތުރުކީގައި 160،000 އަށް ވުރެ ގިނަ އިމާރާތަށް އަސަރުކުރި އެވެ. އޭގެ ތެރެއިން ގިނަ އިމާރާތްތައް ބިމާ ހަމަވެފައިވާ އިރު، ބައެއް އިމާރާތްތަކަށް ބޮޑެތި ގެއްލުންތައް ލިބިފައިވެ އެވެ.
އިދިކޮޅު ޕާޓީތަކާއި ބައެއް ތަޖުރިބާކާރުން ބުނާ ގޮތުގައި ގިނަ އަހަރުތަކެއް ވަންދެން ކޮންޓްރެކްޓަރުންނަށް ފަރުވާ ކުޑަަކޮށް އިމާރާތްތައް ބިނާކުރުމަށް ފުރުސަތު ލިބުނީ ރައީސް ތައްޔިބް އުރުދުގާންގެ ސަރުކާރުން އިމާރާތްތަކާ ގުޅޭ ގަވާއިދު ތަންފީޒު ކުރުމުގައި ފެއިލްވުމުންނެވެ.
