މީގެ ދެ ހަފުތާ ކުރިން ބާރުގަދަ ބިންހެލުމެއް އައިސް 44،000 އަށް ވުރެ ގިނަ މީހުން މަރުވެފައި ވަނިކޮށް، ތުރުކީއަށް އަނެއްކާވެސް ބާރުގަދަ ބިންހެލުންތަކެއް އައިސް މަދުވެގެން ތިން މީހުން މަރުވެއްޖެ އެވެ.
ރިޕޯޓުތައް ބުނާ ގޮތުން 6.4 އަދި 5.8 މެގްނިޓިއުޑް ބާރުމިނުގައި ބިންހެލުންތައް އައީ ކުރިން ވެސް ބިންހެލުން އައި ހިސާބަށެވެ. އެއީ ތުރުކީގެ އިރުދެކުނުން ސީރިއާއާ ގުޅޭ ބޯޑަރު ކައިރި އެވެ.
ފެބްރުއަރީ ހަ ވަނަ ދުވަހު އައި ބިންހެލުމުގައި އަސަރުކޮށްފައި ހުރި ގިނަ އިމާރާތްތަކެއް ބިމާ ހަމަވީ، ހޯމަ ދުވަހު އައި ދެ ބިންހެލުމުގައި ކަމަށް ނޫސްތަކުން ރިޕޯޓުކޮށްފައިވެ އެވެ.
ތުރުކީ ގަޑިން ހޯމަ ދުވަހުގެ ރޭގަނޑު އަށެއް ޖެހި ފަހުން ފުރަތަމަ ބިންހެލުން އައި އިރު، ދެ ވަނަ ބިންހެލުން އައީ އޭގެ ތިން މިނެޓު ފަހުންނެވެ.
ނޫސްތަކުން ހަަބަރު ފަތުރާ ގޮތުގައި މީހުން މަރުވީ އަންތާކްޔާ، ދެފްނޭ އަދި ސަމަންދަގް ހިސާބުންނެވެ. އިންޓީރިއާ މިނިސްޓަރު ސުލެއިމާން ސޮއިލޫ ގޮވާލެއްވީ ބަލިކަށިހެން ހީވާ އެއްވެސް އިމާރާތަކަށް ނުވަނުމަށެވެ.
އޭގެ އިތުރުން 213 މީހުންނަށް އަނިޔާވެފައިވާ ކަމަށް ސޮއިލޫ ވިދާޅުވި އެވެ. ރިޕޯޓުތައް ބުނާ ގޮތުން ހޯމަ ދުވަަހުގެ ބިންހެލުންތަކުގައި ސީރިއާގައި 470 މީހުންނަށް ހޮސްޕިޓަލުގައި ފަރުވާދިނެވެ. އެ ބިންހެލުންތަކުގެ އަސަރު މިސްރާއި ލުބްނާނަށް ވެސް ކުރި އެވެ.
