މީގެ ދެ ހަފުތާ ކުރިން އައި ބާރުގަދަ ބިންހެލުމެއްގައި މަރުވި މީހުންގެ އަދަދު 44،000 އަށް ވުރެ މަތިވެފައި ވަނިކޮށް ތުރުކީގެ ދެ ޕްރޮވިންސެއް ފިޔަވައި އެހެން ހުރިހާ ހިސާބުތަކެއްގައި މީހުން ސަލާމަތް ކުރުމުގެ އޮޕަރޭޝަންތައް ނިންމާލައިފި އެވެ.
ތުރުކީގެ ކާރިސާތަކާ ބެހޭ އެޖެންސީގެ ވެރިޔާ ވިދާޅުވީ ރެސްކިއު އޮޕަރޭޝަން ހުއްޓުމެއް ނެތި ކުރިއަށް ދާނީ ކަހްރަމަންމަރާސް އަދި ހަތޭ ޕްރޮވިންސްގައި ކަމަށެވެ. ހުކުރު ދުވަހު ވެސް އިމާރާތްތަކުގެ ދަށުން ތިން މީހުން ސަލާމަތްކުރި އެވެ.
ފެބްރުއަރީ ހަ ވަނަ ދުވަހު 7.8 މެގްނިޓިއުޑް ބާރުމިނުގައި އައި ބިންހެލުމުގެ އެޕިސެންޓަރަކީ ކަހްރަމަންމަރާސް އެވެ. އިރުދެކުނު ތުރުކީ އާއި އުތުރު ސީރިއާއިން މަރުވި މީހުންގެ ޖުމްލަ އަދަދު މިހާރު އުޅެނީ 44،000 އަށް ވުރެ މަތީގަ އެވެ.
ބެލެވޭ ގޮތުގައި މަރުވި މީހުންގެ އަދަދު ދާނީ އުފުލެމުންނެވެ. ތުރުކީގައި 345،000 އެޕާޓްމަންޓް ސުންނާފަތިވެފައިވާ އިރު އިމާރާތްތަަކުގެ ދަށުގައި ތާށިވި ގިނަ ބަޔަކު އަދިވެސް ފެނިފައެއް ނުވެ އެވެ. އެހެން ނަމަވެސް ގެއްލިގެން ހޯދަނީ ކިހާ އަދަދެއްގެ މީހުން ކަމެއް ސާފެއް ނޫނެވެ.
މީހުން ސަލާމަތް ކުރުމުގެ ގިނަަ އޮޕަރޭޝަންތައް ނިންމާލާފައިވާ އިރު، އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން އާދީއްތަ ދުވަހު ތުރުކީއަށް ވަޑައިގެންނެވި އެވެ. އެއީ ބިންހެލުން އައުމުގެ ކުރިން ރާވާފައިވާ ރަސްމީ ދަތުރުފުޅެކެވެ.
މީހުން ސަލާމަތް ކުރުމުގެ އޮޕަރޭޝަން ބައްލަވައިލެއްވުމަށް ބްލިންކެން ހަތޭ ޕްރޮވިންސަށް ދަތުރުކުރައްވާނެ އެވެ. ތުރުކީގެ ރައީސް ތައްޔިބް އުރުދުގާންއާ ބައްދަލުކުރައްވާނީ އޭގެ ފަހުންނެވެ. ބެލެވޭ ގޮތުގައި މަޝްވަރާ ކުރައްވާނީ ސްވިޑަން އާއި ފިންލޭންޑަށް ނޭޓޯގެ މެމްބަރުންކަން ދިނުމަށް ތުރުކީއިން ދެކޮޅު ހަދާ މައްސަލައިގަ އެވެ.
