ދެކުނު ކޮރެއާ އާއި ޖަޕާން މީހުންނަށް ކުރު މުއްދަތުގެ ވިސާ ދޫކުރުން ޗައިނާއިން ހުއްޓާލައިފި އެވެ.
އެގޮތަށް ނިންމީ ކޮވިޑް ކޮންޓްރޯލް ކުރުމަށް ޗައިނާގެ ދަތުރުވެރިންނާ ދެކޮޅަށް އެ ދެ ގައުމުގައި އަޅަމުންދާ ފިޔަވަޅުތަކާ މެދު ހިތްހަމަނުޖެހިގެންނެވެ.
ޗައިނާ ސަރުކާރުން ބުނީ އެ ގައުމުގެ ރައްޔިތުންނާ ދެކޮޅަށް "ތަފާތުކޮށް" އަޅަމުންދާ ފިޔަވަޅުތައް އުވާލަންދެން ދެކުނު ކޮރެއާ މީހުންނަށް ވިސާ ދޫކުރުން މެދުކަނޑާލާނެ ކަމަށެވެ.
ޗައިނާގެ ދަތުރުވެރިން އެތެރެވުމަށް ހާއްސަ ޝަރުތު ނުވަތަ "އެންޓްރީ ރިކުޔަމަންޓް" ތަންފީޒް ކުރަމުންދަނީ ހަމައެކަނި ޖަޕާނާއި ދެކުނު ކޮރެއާއިންނެވެ.
ޗައިނާއިން ދަތުރު ކުރާ މީހުންނަށް ޓޫރިސްޓް ވިސާ ދޫކުރުން ދެކުނު ކޮރެއާއިން މެދުކަނޑާލީ މިދިޔަ ހަފުތާގަ އެވެ. ޗައިނާގެ ފޮރިން މިނިސްޓްރީން ބުނީ އެއީ އެއްވެސް "ސައިންޓިފިކް ހެއްކެއް ނެތި" އެޅި ފިޔަވަޅެއް ކަމަށާއި އެކަން "ބަލައިނުގަނެވޭނެ" ކަމަށެވެ.
ޗައިނާ މީހުންނަށް ޖަޕާނަށް އެތެރެވެވުނު ނަމަވެސް، ކޮވިޑަށް ނެގެޓިވް ނަތީޖާ ހުށަަހަޅަންޖެހެ އެވެ. އެހެން ނަމަވެސް ޗައިނާގެ ބައެއް ސިޓީތަކުން ޖަޕާނުގެ ބައެއް ސިޓީތަކަށް ފްލައިޓް ދަތުރުކުރުން އޮތީ މަނާކޮށްފަ އެވެ.
ކޮވިޑާ ގުޅިގެން މާޗް 2020 ގައި ބަންދުކުރި ޗައިނާގެ ބޯޑަރުތައް ހުޅުވާލީ މިދިޔަ އާދީއްތަ ދުވަހު އެވެ. ރިޕޯޓުތައް ބުނާ ގޮތުން ފިޔަވަޅުތަކަށް ލުއިދިނުމުން މިހާރު ޗައިނާގައި ކޭސްތައް ވަނީ ވަރަށް ބޮޑަށް އިތުރުވެފަ އެވެ.
