ޗައިނާގެ ރައީސް ޝީ ޖިންޕިންގެ ނަމުން ނަންދީފައިވާ ދެކުނު ކޮރެއާގެ ރެސްޓޯރެންޓަކަށް ޗައިނާގެ ބަޔަކު ވަދެ ގެއްލުންދީ، އެ ހަމަލާއަށް ފަހު ވަގުތުން ފުރައިގެން ގޮސްފައިވާ ކަމަށް ފުލުހުން ބުނެފި އެވެ.
ދެކުނު ކޮރެއާގެ ވެރިރަށް ސޯލްގެ ދެކުނުން އޮންނަ ސިއޮންގްނާމް ސިޓީގައި ހުންނަ މި ރެސްޓޯރެންޓުގެ ސަވައިލަންސް ކެމެރާ ފުޓޭޖުން ފެންނަ ގޮތުގައި، ސެޕްޓެމްބަރު 24 ވަނަ ދުވަހުގެ ފަތިހުގެ ވަގުތެއްގައި މޫނު ނިވާކޮށްގެން ތިބި ހަތަރު ފިރިހެނަކު އެ ތަނަށް ވަދެ، ފަރުނީޗަރުތައް ހަލާކުކޮށް ސްޕްރޭ ޖަހައި ބޮޑެތި ގެއްލުންތަކެއް ވަނީ ދީފަ އެވެ.
އެ ރެސްޓޯރެންޓުގެ ވެރިޔާ ދެކުނު ކޮރެއާގެ މީޑިއާތަކަށް މައުލޫމާތު ދެމުން ބުނީ، ރެސްޓޯރެންޓަށް "ޝީ ޖިންޕިން" ގެ ނަން ދިނީ އެއީ ދެކުނު ކޮރެއާގައި ހުރި އެންމެ މޮޅު ޗައިނާ ރެސްޓޯރެންޓަށް ހަދަން ބޭނުންވާތީ ކަމަށެވެ. އަދި އެ ނަން ދިނުމުގައި އެއްވެސް ސިޔާސީ މަގްސަދެއް ނެތް ކަމަށް ވެސް އޭނާ ބުންޏެވެ.
"ދަ ޗޯސުން ޑެއިލީ" އިން ރިޕޯޓްކޮށްފައިވާ ގޮތުގައި، އެ ރެސްޓޯރެންޓް ހިންގާތާ އަށް އަހަރު ވެފައިވީ ނަމަވެސް، އެތަނުގެ ނަން ބަދަލުކުރުމަށް ބާރުއަޅައި ފިއްތުންތައް ކުރިމަތިވާން ފެށީ މިދިޔަ އަހަރުގެ ތެރޭގަ އެވެ.
ރެސްޓޯރެންޓުގެ ވެރިޔާ ބުނި ގޮތުގައި، މިދިޔަ އަހަރުގެ އޮގަސްޓް މަހު އޭޝިއާ ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓުގައި ބައިވެރިވެވަޑައިގަތުމަށް ރައީސް ޝީ ދެކުނު ކޮރެއާއަށް ވަޑައިގަންނަވާ ހަބަރު ފެތުރުމާއެކު، ރެސްޓޯރެންޓުގެ ނަން ބަދަލުކުރުމަށް އެދި އެތައް ފޯނު ކޯލެއް އޭނާއަށް ލިބުނެވެ. އަދި ބައެއް މީހުން އެކަމަށް ފައިސާގެ ހުށަހެޅުންތައް ވެސް ހުށަހެޅި ކަމަށް އޭނާ ބުންޏެވެ.
"ޗައިނާގައި ވިޔަފާރިކުރާ ކަމަށް ބުނާ ބަޔަކު ގުޅައި، ނަން ބަދަލުކޮށްފި ނަމަ ބޮޑު އަދަދަކުން ފައިސާ ދޭނެ ކަމަށް ބުނި. އެމީހުން އެކަމަށް ވަރަށް ބޮޑަށް ބާރުއެޅި،" އޭނާ ދަ ޗޯސުން ޑެއިލީއަށް ކިޔައިދިނެވެ.
މި އަހަރުގެ އޭޕްރީލް މަހުގެ ތެރޭގައި، އެ ރެސްޓޯރެންޓުގެ މެނޫގައި ހިމެނޭ "ޝީ ޖިންޕިން ސްޕެޝަލް ރައިސް" ކިޔާ ކެއުމަކާ ގުޅިގެން ދެކުނު ކޮރެއާގެ މިނިސްޓްރީ އޮފް އިންޓަލެކްޗުއަލް ޕްރޮޕަޓީއަށް މައްސަލައެއް ވެސް ހުށަހެޅުނެވެ. ނަމަވެސް، އެ މިނިސްޓްރީން މައްސަލަ ބެލުމަށްފަހު އެއްވެސް ގޯހެއް ނެތް ކަމަށް ނިންމައި މައްސަލަ ވަނީ ފައިލްކޮށްފަ އެވެ.
ރެސްޓޯރެންޓުގެ ވެރިޔާ ބުނި ގޮތުގައި، މިދިޔަ ހަފުތާގައި ދިން ހަމަލާއަކީ މިދިޔަ އެއް އަހަރު ދުވަހުގެ ތެރޭގައި ކުރިމަތިވި އެންމެ ބޮޑު ހަމަލާ އެވެ. މި ހަމަލާގައި ގާތްގަނޑަކަށް 15 މިލިއަން ވޮން (11,100 އެމެރިކާ ޑޮލަރު) ގެ މާލީ ގެއްލުން ލިބިފައިވާ ކަމަށް އޭނާ މީޑިއާތަކަށް މައުލޫމާތު ދިނެވެ.
މި ހަމަލާއާ ގުޅިގެން ފަސް ދުވަހަށް ބަންދުކުރުމަށް ފަހު، ޝީ ޖިންޕިން ރެސްޓޯރެންޓް މިދިޔަ އަންގާރަ ދުވަހު އަލުން ވަނީ ހުޅުވާފަ އެވެ. ރެސްޓޯރެންޓުގެ ވެރިޔާ ބުނީ، މިހާރު އެ ތަނަށް އާ ނަމެއް ދިނުމަށް އޭނާގެ ޓީމުން މަޝްވަރާ ކުރަމުންދާ ކަމަށެވެ.
މި ހަމަލާގެ ތުހުމަތު ކުރެވޭ ހަތަރު މީހުންނަކީ އުމުރުން 20 އަހަރާއި 40 އަހަރާ ދެމެދުގެ ޗައިނާގެ ހަތަރު ފިރިހެނުން ކަމަށް ފުލުހުން އަންގާރަ ދުވަހު ވަނީ ބުނެފަ އެވެ. އެމީހުން ހަމަލާ ދިނުމަށްފަހު ޗައިނާގެ ޝަންހާއީ އަދި ޝަންޑޮންގް ޕްރޮވިންސްގެ ޔަންޓައި ސިޓީއަށް ފުރައިގެން ގޮސްފައިވާ ކަމަށް ބެލެވޭ ކަމަށް ވެސް ފުލުހުން ބުންޏެވެ.
ފުލުހުން ބުނީ އެ ހަތަރު މީހުން ހޯދުމަށް އިންޓަޕޯލް މެދުވެރިކޮށް ރެޑް ނޯޓިސް ނެރުމަށް މަސައްކަތް ކުރަމުންދާ ކަމަށެވެ. ރެޑް ނޯޓިސްއަކީ ސީދާ ހައްޔަރު ކުރުމުގެ އަމުރެއް ނޫން ނަމަވެސް، އެއީ ކުށްވެރިއަކު އަނބުރާ ގައުމަށް ފޮނުވާލެވެންދެން ބަންދުގައި ބަހައްޓައިދިނުމަށް ދުނިޔޭގެ އެކި ގައުމުތަކުގެ ފުލުހުންގެ ކިބައިން އެދޭ އެދުމެކެވެ.
ޝީ ޖިންޕިން ރެސްޓޯރެންޓަކީ ޗައިނާގެ ތަފާތު ގިނަ ކެއުންތައް ލިބޭ ތަނެކެވެ. އިންޓަނެޓުގައި އާންމުވެފައިވާ ފޮޓޯތަކުން އެނގޭ ގޮތުގައި އެ ތަނުގެ މެނޫގައި ދެކުނު ކޮރެއާގެ ބައެއް ކެއުންތައް ވެސް ހިމެނެ އެވެ. ގޫގުލް ރިވިއުތަކަށް ބަލާއިރު، އެ ރެސްޓޯރެންޓަށް ފަސް ތަރިން ހަތަރު ތަރީގެ އެވްރެޖް ރޭޓިންއެއް ލިބިފައިވެ އެވެ.
