ދެކުނު ކޮރެއާގެ ބުސާންގެ ބަނދަރެއްގެ ތެރޭގައި ތާށިވެފައިވާ މިޔަރެއް އަނބުރާ ކަނޑަށް ފޮނުވާލުމަށް ހުކުރު ދުވަހު ދެވަނަ ފަހަރަށް މަސައްކަތްކޮށްގެން ވެސް ކާމިޔާބެއް ނުވި އެވެ.
މި މިޔަރު އެ ސަރަހައްދުގެ ފެންގަނޑުގން ނުނިކުމެވިގެން އުޅޭތާ މިހާރު ވަނީ ތިން ހަފުތާވެފަ އެވެ.
ދަލެއް ބޭނުންކޮށްގެން އެ މިޔަރު ކަނޑަށް ނެރުމަށް ރެސްކިއު ޓީމުން ދެ ގަޑިއިރު ވަންދެން މަސައްކަތް ކުރި ނަމަވެސް، އެ ސަރަހައްދުގައި ހުރި ހިލަތަކުގައި ބޮޑު ދާ އޮޅިދާނެތީ އެ އޮޕަރޭޝަން ވަނީ ހުއްޓާލާފަ އެވެ.
ބަނދަރާ ގުޅިފައިވާ ކެނަލްގެ މާ އެތެރެއަށް މިޔަރު ދިޔަ ނުދިނުމަށްޓަކައި މިހާރު އެ ސަރަހައްދުގައި ދާ ޖަހާފައިވާއިރު، ރެސްކިއު ޓީމުން މިހާރު އުންމީދު ކުރަނީ މިޔަރު އަމިއްލައަށް ކަނޑަށް ނުކުމެގެން ދާނެ ކަމަށެވެ.
ދިގުމިނުގައި 3.5 މީޓަރު (11.48 ފޫޓު) ހުރި މި މިޔަރު، ނޯތު ޕޯޓުގެ ހަނި ސަރަހައްދެއްގެ ތެރެއިން އެންމެ ފުރަތަމަ ފެނިފައިވަނީ ސެޕްޓެމްބަރު މަހުގެ 18 ވަނަ ދުވަހު އެވެ.
ނޯތު ޕޯޓުގެ ކޮރެއާ ނަން ކަމަށްވާ "ބުކް ހަންގް" އަށް ނިސްބަތްކޮށް "ބުކަންގީ" ގެ ނަމުން ނަންދީފައިވާ މި މިޔަރު ބަލާލުމަށް މިހާތަނަށް ގާތްގަނޑަކަށް 600،000 މީހުން އެ ސަރަހައްދަށް ޒިޔާރަތްކޮށްފައިވެ އެވެ.
މާހިރުން ލަފާކުރާ ގޮތުގައި މިއީ އާންމުކޮށް ހޫނު ކަނޑުތަކުގައި އުޅޭ "ބްރޮންޒް ވޭލާ" ބާވަތުގެ މިޔަރެކެވެ. މި ބާވަތުގެ މިޔަރު މީގެ ކުރިން ވެސް ދެކުނު ކޮރެއާގެ އައްސޭރިފަށުން ފެނިފައިވެ އެވެ.
