ވިއެޓްނާމްގެ މަޝްހޫރު އެއާލައިން ކަމަށްވާ ވިއެޓްޖެޓުން އެ ގައުމުގެ ހޯޗީމިން ސިޓީ އާއި ދިވެހިރާއްޖެއާ ދެމެދު ސީދާ ދަތުރުތައް ފަށަން ނިންމައިފި އެވެ.
ހޯޗީމިން ސިޓީ އާއި މާލެއާ ދެމެދު ވިއެޓްޖެޓުން ހަފުތާއަކު ތިން ދަތުރު ކުރުމަށް ވަނީ ނިންމާފަ އެވެ. މި ދަތުރުތައް ކުރިއަށްދާނީ ކޮންމެ ހަފުތާއެއްގެ އަންގާރަ، ބުރާސްފަތި އަދި ހޮނިހިރު ދުވަހު އެވެ. މި ދަތުރުތައް ކުރުމަށް ހަމަޖެހިފައި ވަނީ އެއާބަސް އޭ320 މަރުކާގެ ބޯޓުގައި އެވެ.
ވިއެޓްޖެޓުން މި ދަތުރުތައް ފަށަނީ ރާއްޖޭގެ ޓޫރިޒަމްގެ ޕީކް ދުވަސްވަރާ ދިމާކޮށް އަންނަ ޑިސެމްބަރުގައި އެވެ. އަދި އެ މަހުގެ ފަސް ވަނަ ދުވަހުން ފެށިގެން އެ އެއާލައިނުން ދަތުރުކުރަމުން އަންނަ ހޯ ޗީ މިން ސިޓީ – ކޮލޮމްބޯ ރޫޓު މާލެއާ ހަމައަށް ދައްމާލާނެ އެވެ.
ވިއެޓްޖެޓްގެ ދަތުރުތައް ރާއްޖެއަށް އިތުރުވުމާއެކު، ވިއެޓްނާމުން ރާއްޖެއަށް އަންނަ މީހުންގެ އަދަދު ބޮޑުތަނުން އިތުރުވާނެ ކަމަށް ބެލެވެ އެވެ. ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ހިސާބުތަކަށް ބަލާއިރު، ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ ތަރުތީބުން ވިއެޓްނާމް އޮތީ 65 ވަނައިގަ އެވެ.
މިދިޔަ އަހަރު އެ ގައުމުން ރާއްޖެއަށް 2،813 ޓޫރިސްޓުން ޒިޔާރަތްކޮށްފައިވާއިރު، މިއީ 2024 ވަނަ އަހަރުގެ 2،916 އާ އަޅާބަލާއިރު ކުޑަ ދަށްވުމެކެވެ. މި އަހަރުގެ އޮގަސްޓް މަހުގެ ނިޔަލަށް އެ ގައުމުން ވަނީ 2،001 ޓޫރިސްޓުން ރާއްޖެއަށް ޒިޔާރަތްކޮށްފަ އެވެ.
މި އާ ރޫޓު ފެށުމުގެ އުފަލުގައި ވިއެޓްޖެޓުން ވަނީ ހާއްސަ ޕްރޮމޯޝަނެއް ވެސް އިއުލާންކޮށްފަ އެވެ.
މި ގޮތުން 2026 ވަނަ އަހަރުގެ އޮކްޓޫބަރު މަހުގެ 8 އިން 10 އަށް ކުރިއަށްދާ ތިން ދުވަހުގެ "ގޯލްޑަން ޑޭސް" ސޭލްގައި އެކޯ ޓިކެޓުތައް އެއްވެސް އަގަކާ ނުލައި ލިބޭނެ އިންތިޒާމު ވަނީ ހަމަޖައްސާފަ އެވެ.
ވިއެޓްޖެޓަކީ އޭޝިއާ ސަރަހައްދުގައި ހަލުވިކަމާއެކު ކުރިއަރަމުން އަންނަ އެއާލައިނަކަށް ވާއިރު، ރާއްޖެއަށް ކުރާ ދަތުރުތައް އިތުރުކުރުމަކީ ރާއްޖޭގެ ފަތުރުވެރިކަން ވިއެޓްނާމުގެ އިތުރުން ކައިރި އެހެން ގައުމުތަކަށް ވެސް ފުޅާކުރަން ލިބޭ ފުރުސަތެކެވެ.
