ކޮވިޑުގެ ބަލިމަޑުކަމުގެ ސަބަބުން ޗައިނާއިން ރާއްޖެއަށް ކުރާ ދަތުރުތައް ހުއްޓިފައި އޮތުމަށްފަހު އަލުން ދަތުރުތައް ފެށުމަށް ތިން އެއާލައިނަކުން ތައްޔާރުވެއްޖެ އެވެ.
ޗައިނާއިން ރާއްޖެއަށް އެންމެ ފުރަތަމަ ދަތުރުތައް ފެށުމަށް ހަމަޖެހިފައި ވަނީ ބެއިޖިން ކެޕިޓަލް އެއާލައިނުންނެވެ. އެ އެއާލައިނުން މި މަހުގެ 18 ވަނަ ދުވަހުން އަންނަ މަހުގެ 22 ވަނަ ދުވަހުގެ ނިޔަލަށް ހަތަރު ދަތުރު ކުރަން ވަނީ ނިންމާފަ އެވެ. އެ ދަތުރުތައް ކުރާނީ 306 މީހުންގެ ޖާގައިގެ ބޯޓުތަކުގަ އެވެ.
އެއަށްފަހު މިމަހުގެ 28 ވަނަ ދުވަހު ޗައިނާ އީސްޓާން އެއާލައިނުގެ ދަތުރުތައް ރާއްޖެއަށް ފެށުމަށް ވަނީ ހަމަ ޖެހިފަ އެވެ. އަންނަ މާރިޗު މަހުގެ 25 ވަނަ ދުވަހުގެ ނިޔަލަށް ކޮންމެ ހަފްތާ އަކު އެއްފަހަރު އެ އެއާލައިނުގެ ފުލައިޓުތައް ރާއްޖެއަށް ދަތުރު ކުރުމަށް ހަމަޖެހިފައިވާ ކަމަށް އެމްއޭސީއެލް އިން ބުނެ އެވެ.
މިމަހުގެ އެއްވަނަ ދުވަހުން ފެށިގެން އަންނަ މާރިޗު މަހުގެ 23 ވަނަ ދުވަހާ ހަމައަށް ރާއްޖެއަށް ދަތުރު ކުރުމުގެ ސްލޮޓު ހޮންގުކޮންގު އެއާލައިންސްއަށް ދީފައި ވީނަމަވެސް އަދި އެ އެއާލައިނުގެ ދަތުރުތައް ފަށާފައެއް ނުވެ އެވެ.
އެ އެއާލައިނުން ވަނީ ކޮންމެ ހަފްތާއަކު ރާއްޖެއަށް ތިން ފްލައިޓު ތާވަލުކޮށްފަ އެވެ. އޭގެން ކޮންމެ ފުލައިޓެއްގައި 292 މީހުންގެ ޖާގަ ހުންނާނެ ކަމަށް އެމްއޭސީއެލް އިން މައުލޫމާތު ދެއެވެ.
ތިން އަހަރުގެ މެދުކެނޑުމަކަށްފަހު ޗައިނާގެ ފަތުރުވެރިން ރާއްޖެއަށް އައުމަށް ތައްޔާރުވަމުން ދާއިރު، އެ ގައުމަކީ ކޮވިޑުގެ ހާލަތު މެދުވެރިވުމުގެ ކުރިން ރާއްޖެއަށް އެންމެ ގިނަ ފަތުރުވެރިން އައި ގައުމެވެ.
ޗައިނާގެ މާކެޓު އަލުން ހުޅުވޭއިރު، ކޮވިޑުގެ ސަބަބުން އެ ގައުމުން ގެންގުޅެމުން އައި ހަރުކަށި ސިޔާސަތުތަކަށް ލުއި ދޭން ފެށުމާ އެކު އޭޝިއާ މާކެޓުން ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު އިތުރުވެ، ފަތުރުވެރިކަމުގެ ސިނާއަތުން ލިބޭ މަންފާ މިއަންނަ އަހަރު ރަނގަޅު ވާނެ ކަމަށް އެމްއެމްއޭއިން ވެސް ވަނީ ލަފާކޮށްފަ އެވެ.
ކޮވިޑުގެ ބަލިމަޑުމަކަމާ ކުރިމަތިލި އަހަރު ރާއްޖެއަށް އައި ފަތުރުވެރިންގެ އަދަދަކީ 1.7 މިލިއަން އެވެ. އޭގެފަހުން 2020 ވަނަ އަހަރު ރާއްޖޭގެ ބޯޑަރު ބަންދު ކުރުމާ ހަމަައަށް ރާއްޖެއަށް ޒިޔާރަތް ކުރީ އެންމެ ފަސް ލައްކަ ފަތުރުވެރިންނެވެ.
ނަމަވެސް، ދުނިޔޭގެ ގައުމުތަކުގެ ބޯޑަރުތައް ހުޅުވާލުމާ އެކު ޖެހިގެން އައި 2021 ވަނަ އަހަރު ފަތުރުވެރިކަން އަނެއްކާވެސް ހަމައަކަށް އެޅުމުގެ ކޮޅުމަތި ފެނުނެވެ. އެ އަހަރު ރާއްޖެއަށް 1.3 މިލިއަން ފަތުރުވެރިން އައެވެ. އަދި، މި ނިމުނު އަހަރު ރާއްޖެއަށް އަންނާނެ ކަމަށް ލަފާ ކުރި އަދަދަށް، 1.6 މިލިއަން ފަތުރުވެރިން ވަނީ ރާއްޖެ އައިސްފަ އެވެ.
ޗައިނާގެ ފަތުރުވެރިން ރާއްޖެއަށް ޒިޔާރަތް ކުރަން ފެށުމާ އެކު އެ އަދަދު އިތުރުވެ ކޮވިޑުގެ ކުރިން ހުރި މިންވަރަށް ފަތުރުވެރިކަން ރަނގަޅުވާނެ ކަމަށް ބެލެވެ އެވެ.
