ހދ. ނޮޅިވަރަމުގައި އަނބިމީހާ މަރާލި ކަމުގެ ތުހުމުގައި އެ އަތޮޅު ކުޅުދުއްފުށީ ޕޮލިސް ސްޓޭޝަންގެ ގޮޅީގައި ބަންދުކޮށްފައި ހުއްޓާ ދަންޖެހުނު އަބޫބަކުރު ފައިސަލްގެ ހާލު ރަނގަޅު ނުވާ ކަމަށާއި އަދިވެސް އޭނާ އޮތީ ކްރިޓިކަލް ހާލަތުގައި ކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެފި އެވެ.
ފައިސަލްގެ ހާލު ދަށްވެ ވެންޓިލޭޓަރުގައި ފަރުވާދެމުން އަންނަތާ މިއަދަށް ފަސް ދުވަސް ވެފައިވާއިރު، ކުޅުދުއްފުށީ ރީޖަނަލް ހޮސްޕިޓަލުގެ އޮފިޝަލަކު މިއަދު "އަދަދު" އަށް މައުލޫމާތު ދިން ގޮތުގައި އޭނާގެ ހާލު އަދިވެސް ރަނގަޅު ނުވެ އެވެ. މިހާރުވެސް ފައިސަލްއަށް ފަރުވާދެމުންދަނީ ވެންޓިލޭޓަރުގެ އެހީގަ އެވެ.
ފައިސަލް އަމިއްލައަށް ފުލުހުންނާ ހަވާލުވީ އޭނާގެ އަންހެނުން ހދ. ނޮޅިވަރަމް, ހިތަށްފިނިވާގޭ ނިޝާމާ މުހައްމަދު 28އ، މަރުވެފައި އޮތްވާ ފެނިގެން، ނިޝާމާ މަރާލި ކަމުގެ ތުހުމަތު ފައިސަލް ކުރި ހިސާބުންނެވެ. މި މަހުގެ 10 ވަނަ ދުވަހު ނިޝާމާގެ ހަށިގަނޑު ފެނުނު އިރު ފައިސަލް ހުރީ ޑޮކްޓަރަށް ދައްކަން ކަމަށް ބުނެ އެ އަތޮޅު ކުޅުދުއްފުށީގަ އެވެ. އޭނާ ހަވާލުވެފައިވަނީ ކުޅުދުއްފުށީ ޕޮލިސް ސްޓޭޝަނާ އެވެ.
ގެވެށި އަނިޔާކޮށް ނިޝާމާ މަރާލުމުގެ އިތުރުން މަސްތުވާތަކެތީގެ ތުހުމަތުވެސް ފުލުހުން ފައިސަލްގެ މައްޗަށް ކުރެ އެވެ. މި މައްސަލައިގައި މިހާތަނަށް ފުލުހުން އެއްވެސް ތަފުސީލެއް ހާމަކޮށްފައި ނުވާއިރު ނިޝާމާގެ ހަށިގަނޑު ޕޯސްޓްމޯޓަމް ހެދުމަށް ގެންދިއުމަށް ވަނީ ނިންމާފަ އެވެ.
