ރައީސް މުހައްމަދު މުއިއްޒާއި ސަރުކާރަށް ތާއީދު ކުރާ ބައެއް ޝެއިހުން ހދ. ކުޅުދުއްފުށީގެ މަށި މާލި ޕެރޭޑާ ދެކޮޅަށް ތެދުވެ، ޕެރޭޑުގައި ދައްކުވައިދިން ކަންކަން ހަރާމްކޮށްފި އެވެ.
މިއަދު ހަވީރު ކުރިއަށްދިޔަ މަށި މާލި ޕެރޭޑުގައި މުއިއްޒަށް އަމާޒުވެފައިވާ ޖިންސީ ތުހުމަތުތަކާ ގުޅޭ ގިނަ ފުޅަނދުތަކެއް ވަނީ ދައްކާލައިފަ އެވެ. އަދި ސަރުކާރުގެ އެކި ކަންކަމަށް ވެސް ޕެރޭޑުގައި ފާޑުކިޔާފައިވެ އެވެ.
ޕެރޭޑާ ގުޅޭ ގޮތުން ނުސީދާކޮށް ވާހަކަ ދައްކަމުން، މި ދުވަސްވަރު ސަރުކާރަށް ވަރަށް ބޮޑަށް ތައުރީފު ކުރާ ޝެއިހު އަލީ ޒައިދު ބުނީ އެ ޕެރޭޑުން ފެނުނީ "ޝައިތާނީ އަމަލުތަކެއް" ކަމަށެވެ.
"އިޖުތިމާއީ އަހުލާގުން ބޭރުވެ، މީހުންނާ ފޮށި، ފުރައްސާރަކޮށް ހެދުމުގެ މައްޗަށް ބިނަަކޮށްފައިވާ ހުތުރު އަމަލުތަކަކީ މުނިފޫހި ފިލުވުމެއް ނޫން! އެހެނެއްކަމަކު އެއީ ހުތުރުވެގެންވާ ޝައިތާނީ އަމަލުތަކެއް! މިފަދަ ނުބައި ކަންކަން ހިންގުމުން ދޭހަވަނީ އެބައެއްގެ އަހުލާގުގެ ފެންވަރު،" އެކްސްގައި ކުރި ޕޯސްޓެއްގައި ޒައިދު ބުންޏެވެ.
ޒައިދުގެ އިތުރުން، މިދިޔަ ލޯކަލް ކައުންސިލްތަކުގެ އިންތިހާބުގައި ސަރުކާރާއެކު ކޯލިޝަނެއް ހެދި އަދާލަތު ޕާޓީގެ ރައީސް މުހައްމަދު ޝިފާން ވެސް ވަނީ މަށި މާލި ޕެރޭޑު ހަރާމްކޮށްފަ އެވެ. އޭނާ ވެސް ޕެރޭޑަށް ފާޑުކިޔާފައި ވަނީ ނުސީދާކޮށެވެ.
"އީދު ފާހަގަކުރުމުގެ ނަމުގައި ލަދު ހުތުރު މަންޒާރާއި ބަހުރުވަ ބޭނުން ކުރުމަކީ މުސްލިމުންގެ ސިފައެއް ނޫން. އަދި އެއީ ދިވެހި ސަގާފަތުގެ ތެރޭގައި ވެސް ކޮށް އުޅުނު ކަންކަމެއް ނޫން. އެބައެއްގެ ދީނާ އަމިއްލަވަންތަ ކަމަށް އިހުތިރާމް ނުކުރާ ބަޔަކާމެދު ހިތާމަ ހުރި،" ޝިފާން ވިދާޅުވެފައިވެ އެވެ.
އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވެސް ވަނީ މަށި މާލި ޕެރޭޑަށް ނުސީދާކޮށް ފާޑުވިދާޅުވެފަ އެވެ.
"އީދު ފާހަގަކުރުން ކުރިއަށް ގެންދަންވާނީ އިސްލާމީ ސަގާފަތާއި ހިލާފުނުވާ ގޮތުގެ މަތިންކަން މުސްލިމުން ހަނދާންކުރަންވާނެ. ކުޅިވަރުކުޅުމާއި އުފާވެރިކަން ފާޅުކުރުމުގައި އިސްލާމީ އީދެއްގެ މަތިވެރިކަން ދަމަހައްޓައި އިސްލާމީ އަހުލާގާއި ރިވެތި އުސޫލުތަކަށް ރައްކާތެރިވާންވާނެ،" އެކްސްގައި ކުރެއްވި ޕޯސްޓެއްގައި ޝަހީމް ވިދާޅުވެފައިވެ އެވެ.
ސަރުކާރަށް ތާއީދު ކުރާ ޝެއިހުންނަށް މަށި މާލި ޕެރޭޑު ކަމުނުދިޔަ ނަމަވެސް އިސްލާމީ ޝަރީއާގެ ރޮނގުން މަތީ ތައުލީމު ހާސިލު ކުރައްވާފައިވާ ރާއްޖޭގެ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވަނީ މަށި މާލި ޕެރޭޑު ދިފާއު ކުރައްވައިފަ އެވެ.
"މިއަދު ކުޅުދުއްފުށީ ޕެރޭޑުން ފެންނަނީ ހަދީސްފުޅުގައިވާ ގޮތަށް އެމީހެއްގެ ކުޅަދާނަކަން ހުރި މިންވަރުން މުންކަރާތްތައް ހުއްޓުވަން ކުރާ މަސައްކަތް: މުއިއްޒުގެ ވިޔާނުދާ އަނިޔާވެރި އަމަލުތަކަށް ފާޑުކިޔުމަކީ ވެސް އެމީހެއްގެ ކުޅަދާނަވި މިންވަރަކުން ސަރުކާރުގެ ނުބައި ކަންތައް ހުއްޓުވަން ކުރާ މަސައްކަތުގެ ތެރޭގައި ހިމެނޭ ކަމެއް،" ޖަމީލު ވިދާޅުވެފައިވެ އެވެ.
ސަރުކާރަށް ތާއީދު ކުރާ ޝެއިހުންނަށް މަށި މާލި ޕެރޭޑު ކަމުނުދިޔައީ ޕެރޭޑުގައި މުއިއްޒަށް ފާޑުކިޔާފައިވާތީ ކަމަށް ވެސް ޑރ. ޖަމީލް ވިދާޅުވި އެވެ.
"ސަރުކާރުގެ ވަޒީރުންނާ ބައެއް ޕަޕެޓުންނަށް ހަޖަމު ނުވެގެން އުޅޭ މައްސަލަ ގުޅިފައި އޮތީ މުއިއްޒާ. އެއްވެސް އިހުލާސްތެރިކަމެއް ނެތް ބައެއް،" ކުރީގެ ނައިބު ރައީސް ވިދާޅުވެފައިވެ އެވެ.
