ރ. އަތޮޅު ފުޓްސަލް ޗެލެންޖުގެ ފައިނަލްގައި އިއްޔެ އިނގުރައިދު އާއި ދުވާފަރު ބައްދަލު ކުރި މެޗު ނިމުމަށް ފަހު ދެ ރަށުގެ ސަޕޯޓަރުންގެ މެދުގައި ހިނގި ހަމަނުޖެހުމެއްގައި އެތައް ބަޔަކަށް ބޮޑެތި އަނިޔާތަކެއް ލިބުނެވެ. އަދި ލ. މާންދޫގައި މަސްވެރިން ކުރިއަށް ގެންދިޔަ މުޒާހަރާ ހޫނުވެ، މަސްވެރިންނާއި ފުލުހުންގެ ކުރިމަތިލުމެއް ހިނގި އެވެ.

އުނގޫފާރުގައި ކުޅުނު ފުޓްސަލް ޗެލެންޖުގެ ފައިނަލް މެޗު ދުވާފަރު ކާމިޔާބު ކުރީ 4-3 އިންނެވެ.

އެ މެޗަށް ފަހު ހިނގި ހަމަނުޖެހުމުގައި އަނިޔާވި މީހުންނަށް އުނގޫފާރު ހޮސްޕިޓަލްގައި ފަރުވާ ދޭންޖެހުނެވެ. ފަރުވާ ދޭންޖެހުނު ޖުމުލަ އަދަދެއް ނޭނގެ އެވެ. ނަމަވެސް، އިނގުރައިދޫ ކައުންސިލް މެމްބަރު އިބާދުﷲ މުހައްމަދު ވިދާޅުވީ އެ ރަށުގެ ހަ މީހަކު ހޮސްޕިޓަލަށް ގެންގޮސް ފަރުވާ ދިން ކަމަށެވެ.

ކުޑަ ދެ އަންހެން ކުއްޖަކަށް ފިޓު ޖެހިގެން ވެސް ހޮސްޕިޓަލަށް ގެންގޮސް ފަރުވާ ދިނެވެ.

ހޮރައިޒަން ފިޝަރީޒު ކޮމްޕެނީން ލ. މާންދޫގައި ހިންގާ ފެކްޓްރީން މަސްވެރިންނަށް ފައިސާ ނުދޭ ކަމަށް ބުނެ އިއްޔެ ކުރިއަށް ގެންދިޔަ މުޒާހަރާ ހަމަނުޖެހުމަކަށް ބަދަލުވީ، ފުލުހުން ދަމާފައިވާ ލައިން ފަޅާލައި މަސްވެރިން ދިޔުމާއެކު، އެކަން ކޮންޓްރޯލްކުރަން ޕެޕާ ސްޕްރޭ ބޭނުންކުރުމުންނެވެ. ރައްދުގައި މަސްވެރިން ވެއްޔާއި ގާ އުކި އެވެ.

މައުލޫމާތު ދިން މީހަކު ބުނި ގޮތުގައި ޕޮލިސް ލައިން ފަޅާލާފައި މަސްވެރިން ދިޔައީ، މާންދޫ ފިޝަރީޒު ކޮމްޕްލެކްސްގެ ވެރިޔަކާ ބައްދަލުކުރަން އެދި އެކަން ހަމަޖައްސައި ނުދިނުމުންނެވެ.

ބައެއް މުހިންމު ހަބަރުތައް

• ހޮރައިޒަން ފިޝަރީޒުން ހިންގާ ލ. މާންދޫގައި ހިންގާ މާންދޫ ފިޝަރީޒް ކޮމްޕްލެކްސްއަށް އެ އަތޮޅުގެ މަސްވެރިންނަށް ކިރާ މަހަށް ލިބެންޖެހޭ ފައިސާ ނުލިބި ލަސްވާތީ އާއި ތެލާއި އައިސް ގަތުމުގައި ދިމާވާ ދަތިތަކަށް ހައްލު ހޯދަން ފޮނަދޫ ދާއިރާގެ މެންބަރު މޫސާ ސިރާޖު ރައްޔިތުންގެ މަޖިލީހަށް އިއްޔެ މައްސަލައެއް ހުށަހެޅި އެވެ.

• މާލޭގައި މަސްތުވާތަކެއްޗާ އެކު ޕާޓީ ކުރި މައްސަލައިގައި ހައްޔަރުކުރި 12 މީހުންގެ ތެރޭގައި ހިމެނޭ ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) ގައި މަސައްކަތް ކުރާ އޮފިސަރު ސަސްޕެންޑުކުރި ކަން ހާމަކުރީ އިއްޔެ އެވެ.

• ޓެކްސްގެ ގޮތުގައި ދައުލަތަށް ލިބޭ އާމްދަނީ އިތުރުކުރުމަކީ ކުރަން ޖެހޭނެ ކަަމެއް ކަމަށާއި އެހެން ނަމަވެސް ގޯހީ މިދަނޑިވަޅުގައި ޓެކްސް ބޮޑުކުރުން ކަމަށް މަރުކަޒީ ބޭންކް، އެމްއެމްއޭގެ ގަވަރުނަރު އަލީ ހާޝިމް އިއްޔެ ވިދާޅުވި އެވެ. އަދި އިއްޔެ އެމްޑީޕީގެ މެމްބަރުން ވަނީ އަލީ ހާޝިމަށް ވަރަށް ބޮޑަށް ފާޑުވިދާޅުވެފަ އެވެ.
• ހުޅުމާލޭގައި ދެ މިސްކިތާއި، ފަސް ސްކޫލުގެ އިތުރުން ބޯހިޔާވަހިކަމުގެ މަޝްރޫއެއް ކުރިއަށް ގެންދިއުމަށް އެޗްޑީސީން އިއްޔެ ސަރުކާރާއި ކުންފުނިތަކާއެކު ސޮއިކުރި އެވެ.

ދުވަހުގެ ކޯޓޭޝަން

އަންނަ އަހަރަށް ލަފާ ކުރާ ދައުލަތުގެ ބަޖެޓު ދިރާސާކުރާ ކޮމިޓީގައި ގަވަރުނަރު އަލީ ހާސިމް އިއްޔެ ވިދާޅުވީ؛

އަޅުގަނޑުމެން، ޓެކްސް ރެވެނިއު އިތުުރުކުރަން ޖެހޭނެކަން އަބަަދުވެސް ދަންނަވަމުން މިދަނީ. ދަނޑިވަޅު އަޅުގަނޑުމެންނަށް ދިމާނުވީ މިފަހަރު އިނގޭތޯ،"