ކޮލަމްބޯ، ލަންކާ (ނޮވެމްބަރު 8) - އޮސްޓްރޭލިއާގައި ކުރިއަށްދާ ޓީ20 ކްރިކެޓް ވޯލްޑް ކަޕްގެ ތެރެއިން ލަންކާގެ ބެޓްސްމަން، ދަނުޝްކާ ގުނަތިލަކަ، އޮސްޓްރޭލިއާގެ އަންހެނަކު ރޭޕްކުރި ކަމަށް ތުހުމަތުކުރާ މައްސަލައިގައި އޭނާ ހައްޔަރުކޮށްފައިވާއިރު، އެ މައްސަލަ ސްރީ ލަންކާ ކްރިކެޓް ބޯޑުން ވެސް ބަލަން ފަށައިފި އެވެ.
ލަންކާ ގައުމީ ޓީމަށް ގިނަ އަހަރުތަކެއް ވަންދެން ކުޅެފައިވާ ދަނުޝްކާ، 31، މި ފަހަރުގެ ޓީ20 ވޯލްޑް ކަޕަށް ގެންދިޔައީ އަނިޔާގައި ހުއްޓަ އެވެ.
މިދިޔަ މަހު 20 ވަނަ ދުވަހު ލިބުނު އަނިޔާގެ ސަބަބުން ދަނުޝްކާ އަށް ޓީ20 ވޯލްޑް ކަޕްގައި ނުކުޅެވުނު ނަމަވެސް ލަންކާ އިން ނިންމީ ޓީމާ އެކު އޭނާ ގެންދިއުމަށެވެ.
ރޭޕްކުރި ކަމުގެ ތުހުމަތުގައި ދަނުޝްކާ ހައްޔަރުކުރީ ޓީ20 ވޯލްޑް ކަޕުގައި ލަންކާ ކުޅުނު ފަހު މެޗު ނިމުނުތާ އަށް ގަޑިއިރު ފަހުންނެވެ.
ރޭޕްގެ ތުހުމަތުގައި ހައްޔަރުކޮށްފައިވާ ލަންކާގެ ކުޅުންތެރިޔާ، ދަނުޝްކާ: އޭނާ ވަނީ ތުހުމަތަށް އިންކާރުކޮށްފައި.
އިންގްލެންޑް އަތުން ހަތަރު ވިކެޓުން ލަންކާ ބަލިވި މެޗަށް ފަހު، އެ ޓީމުގެ ކުޅުންތެރިން ހޮޓަލުގައި ތިއްބައި، ދަނުޝްކާ ހައްޔަރުކޮށްގެން ގެންދިޔައިއިރު، ކޯޓުގައި މައްސަލަ ކުރިއަށް ދިޔަސް ކަފާލާތުގެ ދަށުން ދަނުޝްކާ ދޫކޮށްލަން އޭނާގެ ވަކީލު އިއްޔެ ކޯޓުގައި ކުރި އެޕީލް ވެސް ބަލައިނުގަތެވެ.
ދަނުޝްކާގެ މައްޗަށް ކުރަނީ މި މަހު ދެ ވަނަ ދުވަހު، އުމުރުން 29 އަހަރުގެ އަންހެނަކު ރޭޕްކުރި ކަމުގެ ތުހުމަތެވެ. އެ އަންހެން މީހާ ބުނާ ގޮތުގައި ދަނުޝްކާއާ ބައްދަލުވީ ޑޭޓިން އެޕަކުންނެވެ. ރުހުމުގައި ބައްދަލުކުރަން ދިޔަ ނަމަވެސް، ދަނުޝްކާ އޭނާ ރޭޕްކުރީ ކަމަށް އެ އަންހެން މީހާ ކޯޓުގައި ވެސް ބުނެފައިވެ އެވެ. ރޭޕްގެ ތުހުމަތަށް ދަނުޝްކާ އިންކާރު ކުރެ އެވެ.
ދަނުޝްކާ ފިޔަވައި ކްރިކެޓް ވޯލްޑް ކަޕަށް ދިޔަ އެހެން ހުރިހާ ކުޅުންތެރިން ވަނީ އެނބުރި ލަންކާ އަށް އަތުވެފަ އެވެ. ދަނުޝްކާގެ މައްސަލަ އޮސްޓްރޭލިއާ ކޯޓުގައި ކުރިއަށްދާއިރު، އެ މައްސަލައިގެ އިތުރު ތަހުގީގުތަކެއް ހިންގަން ލަންކާ ކްރިކެޓް ބޯޑުން ނިންމީ ބަލަން ޖެހޭ އިތުރު ކަންތައްތަކެއް އެބަހުރި ކަމަށް ބުނެ އެވެ.
