މެންޗެސްޓާ (އޮކްޓޫބަރު 20) - މެންޗެސްޓާ ސިޓީ އަށް ކުޅެމުން އަންނަ ގާނާގެ ފޯވާޑް، އަންޓުއާން ސެމެންޔޯ، ދެ މަހެއްހާ ދުވަހަށް ކުޅުމާ ދުރަށް ދާން ޖެހިއްޖެ އެވެ.
އުމުރުން 26 އަހަރުގެ ސެމެންޔޯގެ ކަކުލަށް އަނިޔާވީ، އިނގިރޭސި ޕްރިމިއާ ލީގުގައި މި ހަފްތާގައި މެންޗެސްޓާ ސިޓީން 3-2 އިން އިޕްސްވިޗް ޓައުން އަތުން މޮޅުވި މެޗުގަ އެވެ. އެ މެޗުގައި ސެމެންޔޯ އަށް އަނިޔާވެގެން އޭނާ ވަނީ 76 ވަނަ މިނިޓްގައި ބަދަލުކޮށްފަ އެވެ.
އެ މެޗަށް ފަހު ހެދި ސެމެންޔޯގެ ސްކޭނުން ދައްކާ ގޮތުގައި އޮޕަރޭޝަނަކަށް ދާން ނުޖެހުނު ކަމުގައި ވިޔަސް އަނިޔާ އިން އެއްކޮށް ރިކަވާވެގެން ކުޅުމަށް އެނބުރި އަންނަން މަދުވެގެން އަށް ހަފްތާ ނަގާނެ އެވެ.
"ސްކޭނަށް ފަހު ހަގީގަތުގައި ރިޕޯޓް އައީ އަހަރެމެން ބިރުގަތް މިންވަރަށް ބަލާއިރު ރަނގަޅަށް، އެކަމަކު، އަދިވެސް އޭނަ މަދުވެގެން އަށް ހަފްތާ ކުޅުމާ ދުރުގައި ހުންނަން ޖެހޭނެ،" ޗެމްޕިއަންސް ލީގުގައި އޭއީކޭ އެތަންސްއާ ދެކޮޅަށް ކުޅޭ މެޗުގެ ކުރިން ސިޓީން ބޭއްވި ނޫސްވެރިންގެ ބައްދަލުވުމުގެ ތެރެއިން އެ ޓީމުގެ ކޯޗު، އެންޒޯ މަރެސްކާ ބުންޏެވެ.
ސެމެންޔޯ އަށް އަނިޔާވި ނަމަވެސް އިޕްސްވިޗް މެޗުގައި އިންޖަރީގެ ހާސްކަމެއް ދިމާވި އާލިން ބްރައުޓް ހާލަންޑް ފިޓް ކަމަށް މަރެސްކާ ވަނީ ބުނެފަ އެވެ.
ބޯންމައުތު ދޫކޮށް ޖެނުއަރީ ޓްރާންސްފާގައި ސިޓީ އަށް ސޮއިކުރި ސެމެންޔޯ، އެ ކްލަބާ އެކު، 2031 އާ ހަމައަށް ކޮންޓްރެކްޓް ހަދާފައިވެ އެވެ. ސިޓީން ސެމެންޔޯގެ ސޮއި ހޯދަން ޖުމްލަ އެކު، 68 މިލިއަން ޑޮލަރުގެ ފީއެއް ދައްކާނެ އެވެ. މި ސީޒަނުގައި ސެމެންޔޯ މިހާތަނަށް ޖަހާފައިވަނީ، ދެ ގޯލެވެ. އެއީ، ސަންޑަލެންޑް ކޮޅަށް ޖެހި ދެ ގޯލެވެ.
ކުރިން ބްރިސްޓޯލް ސިޓީ އަށް ވެސް ކުޅުނު ސެމެންޔޯ، ސިޓީއާ ގުޅުނު ފަހުން އެ ޓީމަށް ޖުމްލަ އެކު، ކުޅެދިނީ 37 މެޗެެވެ. އެ މެޗުތަކުގައި އޭނާ ވަނީ 13 ލަނޑު ޖަހައި، ހަ ލަނޑު ޖަހަން ފުރުސަތު ތަނަވަސްކޮށްދީފަ އެވެ.
