އަމްސްޓެޑަމް، ނެދަލެންޑްސް (އޮކްޓޫބަރު 20) - މެންޗެސްޓާ ޔުނައިޓެޑްގައި އޭނާ ފެއިލްވި އެއް ސަބަބަކީ ކްރިސްޓިއާނޯ ރޮނާލްޑޯއާ ދިމާވި މައްސަލަ ކަމަށް އެ ޓީމުގެ ކުރީގެ ކޯޗު، އެރިކް ޓެން ހާގް ބުނެފި އެވެ.
ރޮނާލްޑޯ، 41، ދެ ފަހަރެއްގެ މަތިން ޔުނައިޓެޑަށް ކުޅުނުއިރު، ދެ ވަނަ ފަހަރަށް އެ ޓީމު ދޫކޮށްލަން ޖެހުނީ، 2023 ވަނަ އަހަރުގެ ޖެނުއަރީ މަހު އެވެ. އެއީ، ޓެން ހާގާ މައްސަލަ ޖެހިގެންނެވެ. އޭގެ އަހަރަކަށް ވުރެން ގިނަ ދުވަސް ފަހުން، 2024 ވަނަ އަަހަރުގެ ނޮވެމްބަރު މަހު ޔުނައިޓެޑުން ޓެން ހާގް، ކޯޗުކަމުން ވަކިކުރީ އާ ސީޒަނުގައި ނަތީޖާތައް ދަށްވުމުގެ ސަބަބުންނެވެ.
މީގެ ކުރިން، ރޮނާލްޑޯ ވަނީ އިންޓަވިއުއެއްގައި ޓެން ހާގަށް ފާޑުކިޔައިފަ އެވެ. އެ ވާހަކަތަކަށް ރައްދުދިނުމަށް ފަހު، ދާދި ފަހުން، "ދި އެތުލެޓިކް" އަށް ދިން އިންޓަވިއުއެއްގައި ޓެން ހާގް ވަނީ ޔުނައިޓެޑްގައި ދިމާވި މައްސަލަތަކާ ރޮނާލްޑޯއާ ބެހޭގޮތުން އަނެއްކާ ވެސް ވާހަކަ ދައްކައިފަ އެވެ.
ޔުނައިޓެޑްގެ ކޯޗު ޓެން ހާގްގެ ވިސްނުމަށް ރޮނާލްޑޯ ފާޑުކިޔައިފި
މެންޗެސްޓާ ޔުނައިޓެޑްގެ ކޯޗު އެރިކް ޓެން ހާގްގެ ވިސްނުމަށް އެ ޓީމަށް ކުރިން ކުޅުނު މަޝްހޫރު ތަރި، ކްރިސްޓިއާނޯ ރޮނާލްޑޯ ވަނީ ފާޑުކިޔައިފައި.
"އޭނަ (ރޮނާލްޑޯ) އަހަރެން ދަށް ކޮށްލީ، ދެން ޓީމުގެ ހާލަތު ވެސް ދަށަށް ގެނައީ،" ރޮނާލްޑޯއާ ބެހޭގޮތުން ޓެން ހާގް ބުންޏެވެ.
އަޔަކްސް އަށް ކުރިން ކޯޗުކޮށްދިން ޓެން ހާގް ބުނީ، ޔުނައިޓެޑާ ހަވާލުވުމުގެ ކުރިން، އޭނާ ރޮނާލްޑޯއާ ބައްދަލުކުރަން ޕޯޗުގަލް އަށް ދިޔަ ކަމަށެވެ. އަދި، ރޮނާލްޑޯ އަކީ ފުޓްބޯޅަ ތާރީހުގައި ވެސް ފެނުނު އާދަޔާހިލާފު ކުޅުންތެރިއެއް ކަމަށާއި އެކަމަކު، ކޯޗުންނަށް ވެސް އިހުތިރާމް ކުރަން ޖެހޭނެ ކަމަށް ޓެން ހާގް ވަނީ ބުނެފަ އެވެ.
ޓެން ހާގާއި ރޮނާލްޑޯ މައްސަލަ ފުރަތަމަ ޖެހުނީ، 2022 ވަނަ އަހަރުގެ އޮކްޓޫބަރު މަހު، ޗެލްސީއާ ދެކޮޅަށް ކުޅުނު މެޗެއްގައި ރޮނާލްޑޯ އަށް ފުރުސަތު ނުދޭން ޓެން ހާގް ނިންމުމުންނެވެ. އަދި، އޭގެ ތިން ދުވަސް ކުރިން، ޓޮޓެންހަމް ހޮޓްސްޕާސް މެޗެއްގައި ބަދަލަކަށް އަރަން ޓެން ހާގް އެދުމުން، ރޮނާލްޑޯ ވަނީ ދެކޮޅު ހަދައިފަ އެވެ.
"ރޮނާލްޑޯ ޓީމަށް ނުލާން ނިންމީ ޓްރެއިނިންތަކުގައި އޭނާގެ ކަންކަން ހުރި ގޮތުން، އޭނަ އަމިއްލަ އަށް ތައްޔާރުވުމުގެ ކަންކަން ގޯސްކޮށް ދިޔައީ. ކޮންމެ ބޮޑު ޓީމަކަށް ވެސް ބޮޑު ކުޅުންތެރިއެއް ބޭނުންވޭ. އެކަމަކު، އެ ބޮޑު ކުޅުންތެރިޔާ ޖެހޭނީ ޓީމަށްޓަކައި މަސައްކަތް ކުރަން،" ޓެން ހާގް ބުންޏެވެ.
ޔުނައިޓެޑްގެ ޓްރެއިނިންތަކުގައި ރޮނާލްޑޯ ދިޔައީ އެހެން ކުޅުންތެރިން ތަމްރީންވަމުންދިޔަ ގޮތް މަޑުޖައްސާލައިގެން ކުރިއަށްގެންދަން އިރުޝާދުދެމުން ކަމަށާއި އެކަމަކު، އެއީ ޓީމަށް ރަނގަޅު ގޮތެއް ނޫން ކަމަށް ޓެން ހާގް ވަނީ ބުނެފަ އެވެ.
މި ވަގުތަށް ބަލާއިރު ވެސް ޔުނައިޓެޑަށް އެންމެ ބޮޑަށް މައްސަލަ ދިމާވާ އެއް ކަމަކީ، ކުޅުންތެރިންނަށް ބާރު ދިނުން ކަމަށާއި އެއީ ކްލަބްތެރޭގައި ނުރަނގަޅު އާދައެއް ފެތުރި މާހައުލު ގޯސްވާ ކަމެއް ކަމަށް ޓެން ހާގް ވަނީ ބުނެފަ އެވެ.
ޔުނައިޓެޑަށް ފަހު، ދެން ޓެން ހާގް ފެނިގެންދިޔައީ ބަޔާ ލެވަކޫސަންގެ ކޯޗެއްގެ ގޮތުގަ އެވެ. އެ ޓީމާ ތިން މެޗަށް ފަހު، ލެވަކޫސަން ކޯޗުކަމުން ޓެން ހާގް ވަނީ ވަކިކޮށްފަ އެވެ.
