ފިލިޕީންސްގެ މަގްބޫލް ރޭޑިއޯ ނޫސްވެރިޔެއް މަރާލުމަށް އަމުރު ކުރީ އެ ގައުމުގެ ޖަލުތަކުގެ ވެރިޔާ ކަމަށް ފުލުހުން ތުހުމަތުކޮށްފި އެވެ.
އުމުރުން 63 އަހަރުގެ ޕާސިވަލް މަބާސާގެ ގަޔަށް ބަޑި ޖަހައި މަރާލީ އޮކްޓޯބަރު މަހު އެވެ. ވެރިރަށް މެނީލާގައި ހަމަލާ ދިނީ އޭނާގެ ރޭޑިއޯ ސްޓޫޑިއޯއަށް ދަތުރު ކުރަމުން ދަނިކޮށެވެ.
އޭގެ ކުރިން އޭނާ ވަނީ ބިޔުރޯ އޮފް ކަރެކްޝަންސްގެ ޑިރެކްޓަރު ޖެނެރަލް ޖެރާލްޑް ބަންޓަގްއަށް ކުރެވޭ ކޮރަޕްޝަން ތުހުމަތުތަކެއްގެ ވާހަކަ ރޭޑިއޯ މެދުވެރިކޮށް އާއްމުކޮށްފަ އެވެ.
މަބާސާއަކީ ކުރީގެ ރައީސް ރޮޑްރިގޯ ޑުޓާޓޭއަށް ވަރަށް ބޮޑަށް ފާޑުކީ އެކަކެވެ. މައްސަލައިގެ ތުހުމަތު ކުރެވޭ ބަންޓަގް ހުރީ މަގާމުން އެކަހެރިކޮށްފަ އެވެ.
އޭގެ އިތުރުން ޑެޕިއުޓީ ސެކިއުރިޓީ އޮފިސަރު ރިކާޑޯ ޒުލުއެޓާއާ ދެކޮޅަށް ވެސް ފުލުހުން ތުހުމަތު ކުރެ އެވެ. އެ ހަމަލާގައި ބަޑި ޖެހި މީހާ، ޖޮއެލް އެސްކޯރިއަލް، ވަނީ އަމިއްލައަށް ފުލުހުންނާ ހަވާލުވެފަ އެވެ.
އޮކްޓޯބަރު މަހުގެ ތެރޭގައި އޭނާ އަމާން ދީ ފުލުހުންގެ އިދާރާއަށް ދިޔައީ ސެކިއުރިޓީ ވީޑިއޯގައި އޭނާ ހަމަލާ ދޭ މަންޒަރު ސާފުކޮށް ފެންނަން ހުރިކަން އާއްމުވުމުންނެވެ.
މަބާސާއަކީ މިހާރުގެ ރައީސް ފާޑިނަންޑް މާކޯސް ޖޫނިއާ ވެރިކަމަށް ވަޑައިގެންނެވި ފަހުން ފިލިޕީންސްގައި މަރާލި ދެ ވަނަ ނޫސްވެރިޔާ އެވެ.
