ޓޯކިޔޯ، ޖަޕާން (އޮކްޓޫބަރު 18) - ޖަޕާން ގައުމީ ޓީމާއި ސެލްޓިކުގައި ދެއްކި މޮޅު ކުޅުމުން ގިނަ ބަޔެއްގެ ސަމާލުކަން ހޯދި ހުނަރުވެރި މިޑްފީލްޑަރު ސުންޝޫކޭ ނަކަމޫރާ ފުޓްބޯޅަ ކުޅުން ހުއްޓާލަން ނިންމައިފި އެވެ.
ނަކަމޫރާ، 44، ވަނީ ސެލްޓިކާ އެކު ސްކޮޓްލެންޑްގެ ޗެމްޕިއަންކަން ތިން ފަހަރު އަދި ޖަޕާން ގައުމީ ޓީމާ އެކު ފީފާ ވޯލްޑް ކަޕްގެ ދެ މުބާރާތުގައި ކުޅެފަ އެވެ. މި ސީޒަނަށް ފަހު، ނަކަމޫރާ ފުޓްބޯޅަ ކުޅުން ހުއްޓާލަން ނިންމިއިރު، އޭނާ ވަނީ ޕްރޮފެޝަނަލް ލެވަލްގައި ފުޓްބޯޅައިގައި 26 އަހަރު ހޭދަކޮށްފަ އެވެ.
"ފުޓްބޯޅައިގައި އަހަރެން މި ހޭދަކުރި ދިގު ކެރިއަރުގައި ގިނަ ތަޖުރިބާތަކެއް ކޮށްފިން. އުފާވެރި ހަނދާންތަކާއި މާޔޫސްވި ހާލަތްތައް ވެސް ދިޔަ، އަބަދުވެސް އަހަންނާ އެކު ގާތުގައި ގިނަ ބަޔަކު ތިބި. އެ މީހުންގެ ސަޕޯޓް ފާހަގަކުރަން،" ޖަޕާނުގެ ޔޮކަހޯމާ އެފްސީ އަށް މިހާރު ކުޅެމުން އަންނަ ނަކަމޫރާ ބުންޏެވެ.
"ފުޓްބޯޅައިގައި އަހަންނަށް ދިމާވި ކޮންމެ ޗެލެންޖަކާ ކުރިމަތިލައި ފައިޓް ކުރެވުނީ އެހީވާނެ ވަރަށް ގިނަ ބަަޔަކު ތިބުމުން،"
ނަކަމޫރާ ބުނީ އޭނާ އެންމެ ފުރަތަމަ ފުޓްބޯޅަ އަށް ޝައުގުވެރިވިތާ 40 ވަރަކަށް އަހަރުވެފައިވާ ކަމަށާއި ދިރިއުޅުމުގެ ބޮޑުބައި ފުޓްބޯޅައިގައި ހޭދަކުރެވުނު ގޮތުން ބޭނުންވި ގިނަ ކަންތައްތަކެއް ހާސިލްވި ކަމަށެވެ.
ފުޓްބޯޅަ ކުޅުން ހުއްޓާލަން ނިންމި ސީދާ ސަބަބެއް ނަަކަމޫރާ މީޑިއާގައި ހާމަކޮށްފައިނުވެ އެވެ. އެކަމަކު، ޖަޕާނުގެ މީޑިއާ ރިޕޯޓްތައް ބުނާގޮތުން ނަކަމޫރާ ކުޅުން ހުއްޓާލަން ނިންމީ ކަނާތު ފައިގެ ކުޑަ ހުޅަށް ލިބިފައިވާ އަނިޔާތަކުގެ ސަބަބުންނެވެ.
ނަކަމޫރާގެ ކެރިއަރުގެ އެންމެ ބޮޑު އެއް އުސްއައްޔަކީ 2006 ވަނަ އަހަރުގެ ޗެމްޕިއަންސް ލީގުގައި މެންޗެސްޓާ ޔުނައިޓެޑް އަތުން ސެލްޓިކް މޮޅުވިއިރު، އެ މެޗުގައި ނަކަމޫރާ ޖެހި ހިލޭ ޖެހުމެވެ.
ސެލްޓިކްގެ އިތުރުން ނަކަމޫރާ ދެން ޔޫރަޕްގައި ކުޅުނީ 2009 ވަނަ އަހަރު ސްޕެއިނުގެ އެސްޕަންޔޯލްގަ އެވެ. ނަކަމޫރާ ސެލްޓިކްގެ މެނޭޖްމަންޓާ އެކު ގުޅުން ބަދަހިކޮށް ގިނަ ދުވަސްތަކެއް ހޭދަކޮށްފައިވާތީ ޖަޕާނުގެ ކުޅުންތެރިންނަށް ސެލްޓިކުން ފުރުސަތު ލިބޭ ނިސްބަތް ވަނީ އިތުރު ވެފަ އެވެ.
ޖަޕާން ގައުމީ ޓީމަށް ކުޅެދިން 98 މެޗުގައި ނަކަމޫރާ ވަނީ 24 ގޯލު ޖަހައިފަ އެވެ.
