މަޖީދީ މަގުން ހިނގާފައި ދިޔަ އުމުރުން ހަތަރު އަހަރުގެ ކުޑަކުއްޖަކު ކާނުގަނޑެއް ތެރެއަށް ވެއްޓި އެ ކުއްޖާގެ ފަޔަށް ބޮޑު ޒަހަމެއް ލިބިއްޖެ އެވެ.
ސޯޝަލް މީޑިއާގައި ދައުރުވަމުންދާ ޕޯސްޓުގައި ބުނެފައި ވަނީ އެ އެކުއްޖާ ވެއްޓިފައިވަނީ ގަލޮޅު ދަނޑު ކައިރީގައި ހަދާފައިވާ ހީނާމާގެ ޕާކިން ޒޯނު ކުރިމަތިން ހިނގާފައި ދަނިކޮށެވެ.
އޭނާ ވެއްޓުނީ ވަރަށް ބޮޑަށް ހަލާކުވެފައިވާ ކާނުގަނޑަކަށެވެ. އެ ކާނުގަނޑުގެ އެތެރޭގައި ހުރި ދަގަނޑުތަކުގައި ދަބަރު ޖަހައި ދަގަނޑު ގަނޑު އޮތީ މެދުން ބިންދައިގެން ގޮސްފަ އެވެ.
އެ ކުއްޖާ ކާނުގަނޑަށް ވެއްޓުމާ އެކު ދެ ފަރާތުގައި ހުރި ދަގަނޑުތައް އޭނާގެ ފަޔަށް ހެރި ބޮޑެތި ޒަހަމްތަކެއް ވަނީ ލިބިފަ އެވެ. އޭނާއަށް ފަރުވާ ދިނީ އޭޑީކޭ ހޮސްޕިޓަލުގަ އެވެ.
އެކަމާ ގުޅިގެން ކުރި ޓުވީޓަށް ޖަވާބު ދެއްވަމުން މާލޭ ސިޓީ ކައުންސިލުގެ މޭޔަރު ޑރ. މުހައްމަދު މުއިއްޒު ވިދާޅުވީ، އެ ހާދިސާގެ ހަބަރު އެހީ ފުން ހިތާމަޔާއެކު ކަމަށެވެ.
"އެ މައުލޫމާތު ލިބުމާއިއެކު ހާދިސާ ހިނގި ސަރަހައްދު ހޯދައި ގަޑިއެއްހާއިރުތެރޭ ކާނުގަނޑުގަނޑު ވަނީ ބަދަލުކޮށްފައި،" މުއިއްޒު ވިދާޅުވި އެވެ.
ގިނަ މަގުތަކެއްގައި ހުރި ކާނުތައް ހަލާކުވެ މަގުން ދުއްވާ އުޅަނދުތަކަށާއި ހިނގާބިިނގާވެ އުޅޭ މީހުންނަށް އަންނަނީ ގެއްލުންވަމުންނެވެ. މާލޭގެ މަގުތައް މެއިންޓެއިންކޮށް ބެލެހެއްޓުމުގެ ޒިންމާ އޮތީ މާލެ ސިޓީ ކައުންސިލުގައި ކަމަށްވާއިރު މަގުތައް ހަލާކުވެ އަނިޔާ ލިބޭ ކަމުގެ ޝަކުވާ ދޭތެރެ ދޭތެރެއިން އާންމުން ކުރެ އެވެ.
