ދެ ބިދޭސީ މަސައްކަތްތެރިއަކު ވެއްޓި ޒަހަމުވި އިމާރާތް ހަދަމުންދިޔަ ކުންފުނި 5000ރ. އިން ޖޫރިމަނާކޮށްފި އެވެ.
މާލެ ސިޓީ ކައުންސިލުން ބުނީ އެ މައްސަލައިގައި ޖޫރިމަނާކޮށްފައި ވަނީ ބީޓްރެކްސް ޑްރީމް ކިޔާ ކުންފުންޏެއް ކަމަށެވެ. އެ ކުންފުނި ޖޫރިމަނާ ކުރީ ސަލާމަތީ ފިޔަވަޅުތައް ރަނގަޅަށް ނާޅާއި ބަލަން ޖެހޭ ވަރަށް ނުބަލައި މަސައްކަތް ކުރަމުން ދިޔުމުގެ ސަބަބުން ކަމަށް ކައުންސިލުން ބުންޏެވެ.
"ހުރިހާ ރައްޔިތުން ވެސް ސަލާމަތީ ފިޔަވަޅުތަކަށް ސަމާލުކަންދީ ގާނޫނާއި ގަވާއިދާ އެއްގޮތްވާ ގޮތުގެ މަތިން މަސައްކަތްތައް ކުރިއަށް ގެންދަން ކައުންސިލުން އިލްތިމާސް ކުރަން،" މާލެ ސިޓީ ކައުންސިލުން ބުންޏެވެ.
އިމާރާތެއްގެ ފުރަތަމަ ފަންގިފިލާއިން ބިދޭސީ ދެ މަސައްކަތްތެރިއަކު ވެއްޓި އަނިޔާވެއްޖެ
މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގާނޫނުގައި ބުނެފައިވާ ގޮތުން މަސައްކަތްތެރިޔާއަށް ބޭނުންވާ ސަލާމަތީ އާލާތްތައް ފޯރުކޮށްދިނުމަކީ މަސައްކަތް ހަވާލު ކުރާ ފަރާތުގެ ޒިންމާއެކެވެ.
ހަދަމުންދިޔަ އިމާރާތެއްގެ ފުރަތަމަ ފަންގިފިލާއިން ބިދޭސީ ދެ މަސައްކަތްތެރިއަކު ވެއްޓި ޒަހަމުވީ މިދިޔަ ހޮނިހިރު ދުވަހު އެވެ. އެ ހާދިސާގައި އަނިޔާވީ ނޭޕާލަށް ނިސްބަތްވާ އުމުރުން 22 އަހަރާއި 39 އަހަރުގެ ދެ ފިރިހެނުން ކަމަށެވެ. އެމީހުންނަށް ލިނުބު އަނިޔާގެ ތަފުސީލެއް އަދި ނޭނގެ އެވެ.
ފުލުހުން ބުނީ އެ ދެ މީހުން ވެއްޓުނީ މަޖީދީ މަގުގައި ހަދަމުންދިޔަ އިމާރާތަކުން ކަމަށެވެ. މި ނޫހަށް އެނގިފައިވާ ގޮތުގައި އެ މީހުން ވެއްޓުނީ މަޖީދީ މަގު ވޭލާ ކައިރީ ހުރި އިމާރާތަކުންނެވެ.
އެ ދެމީހުން ވެއްޓުމުން ޓެކްސީއަކަށް އަރުވާ މަންޒަރުގެ ވީޑިއޯއެއް ސޯޝަލް މީޑިއާގައި އާންމުވި އެވެ. ކޮންސްޓްރަކްޝަން މަސައްކަތް ކުރާއިރު އަމިއްލަ ރައްކާތެރިކަމަށް ބޭނުންވާ އެއްވެސް އާލާތެއް އެމީހުން އަޅައިގެން ތިބި ތަނެއް ވީޑިއޯއަކުން ނުފެނެ އެވެ.
މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގާނޫނުގައި ބުނެފައިވާ ގޮތުން މަސައްކަތްތެރިޔާއަށް ބޭނުންވާ ސަލާމަތީ އާލާތްތައް ފޯރުކޮށްދިނުމަކީ މަސައްކަތް ހަވާލު ކުރާ ފަރާތުގެ ޒިންމާއެކެވެ.
