މަސްތުވާތަކެތީގެ ބޮޑު މައްސަލައެއްގެ އިސް މީހެއް ކަމަށް ފުލުހުން ތުހުމަތުކުރާ އަރުޝަދު ހާލިދު ސްރީ ލަންކާއިން ރާއްޖެ ގެނެސް ހައްޔަރުކޮށްފި އެވެ.
އޭނާ އަށް ފުލުހުން ތުހުމަތު ކުރަނީ މިދިޔަ އަހަރުގެ ޑިސެމްބަރު މަހުގެ 12 ވަނަ ދުވަހު ފުލުހުން ހިންގި ހާއްސަ ޑްރަގު އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތި ރާއްޖެ އެތެރެކުރުމުގައި އެންމެ އިސްކޮށް ހުރި މީހާ ކަމަށެވެ.
ފުލުހުން ހިންގި އެ އޮޕަރޭޝަނުގައި މަސްތުވާތަކެތި އަތުލައިގެން އިރު، އަރުޝަދު ދިރިއުޅެމުން ދިޔައީ ލަންކާގަ އެވެ. އެހެން ކަމުން އެ މައްސަލާގައި އޭނާގެ ޕާސްޕޯޓު ހިފަހެއްޓިފައި ނުވުމުން ފުލުހުންގެ ހައްޔަރަށް އޭރު ގެނެވިފައި ނުވެ އެވެ.
ނަމަވެސް ފުލުހުން އެ މައްސަލާގައި ހިމެނޭ މީހުންގެ ވަނަވަރު ހާމަ ކުރި އިރު އަރުޝަދުގެ ނަން ވަނީ އާންމު ކޮށްފަ އެވެ.
ފުލުހުންގެ މީޑިއާ އޮފިޝަލް "އަދަދު" އަށް ވިދާޅުވީ އަރުޝަދު މިހާރު މާލެ ގެނެސްފައިވާ ކަމަށެވެ. އަދި ކޯޓުގެ އަމުރު ތަންފީޒު ކުރުމަށް އޭނާ މިވަގުތު ހުރީ ފުލުހުންގެ ބެލުމުގެ ދަށުގައި ކަމަށްވެސް އޮފިޝަލް ވިދާޅުވި އެވެ.
ގދ. ހޯޑެއްދޫ އަލޯރާ، އަރުޝަދާ އެކު އެ މައްސަލާގައި އަށް މީހަކަށް ދައުވާކުރީ މިދިޔަ އަހަރުގެ ކުރީކޮޅު އެވެ. އެއީ މާލޭގެ ބައެއް ގެތައް ބަލައި ފާސްކޮށް، ނުވަ ކިލޯގެ ޑްރަގާއި 4.6 މިިލިއަން ރުފިޔާ ފެނުނު މައްސަލާގަ އެވެ.
އެ މައްސަލާގައި އަރުޝަދު އާ އެކު އަށް މީހެއްގެ މައްޗަށް ދައުވާ އުފުލި އިރު، އެ ދައުވާތައް ސާބިތުވީ އެންމެ ދެ މީހުންގެ މައްޗަށެވެ. މިހާރު އެ މައްސަލަ އޮތީ ހައި ކޯޓުގަ އެވެ.
