ރޯމް (އޮކްޓޫބަރު 10) - އިޓާލިއަން ލީގުގައި ރޭ ލެއްޗޭއާ ދެކޮޅަށް ކުޅުނު މެޗުގައި ރޯމާގެ އާޖެންޓީނާގެ މިޑްފީލްޑަރު ޕައޮލޯ ޑިބާލާ އަށް އަނިޔާވެ، ވޯލްޑް ކަޕްގައި އޭނާ އަށް ނުކުޅެވުމުގެ ބިރު ކުރިމަތިވެއްޖެ އެވެ.
އަމިއްލަ ދަނޑުގައި ރޭ ލެއްޗޭ އަތުން ރޯމާ މޮޅުވީ 2-1 އިންނެވެ. މެޗުގެ ހަ ވަނަ މިނިޓުގައި ރޯމާ އިން ލީޑު ނެގީ ޑިފެންޑަރު ކްރިސް ސްމޯލިން ޖެހި ލަނޑުންނެވެ. ލެއްޗޭގެ ގެބްރިއަލް ސްޓްރެފެޒާ ޖެހި ލަނޑާއެކު މެޗުގެ 39 ވަނަ މިނިޓުގައި އެ ޓީމުން މެޗުގެ ނަތީޖާ ހަމަހަމަކުރި އެވެ. އެކަމަކު، ދެ ވަނަ ހާފުގެ ކުރީކޮޅު ރޯމާ އަށް ލިބުނު ޕެނަލްޓީއަކުން އެ ޓީމަށް ލީޑު ހޯދައިދިނީ ޑިބާލާ އެވެ.
ރޭގެ މެޗުގައި ޕެނަލްޓީ ޖެހުމަށް ފަހު ޑިބާލާ އުފާފާޅުކުރަނީ.-- ފޮޓޯ: އޭއެފްޕީ
ޑިބާލާ އަށް އަނިޔާވީ މި ޕެނަލްޓީ ޖެހުމުގެ ތެރޭގަ އެވެ. ޕެނަލްޓީ ކާމިޔާބުކުރުމަށް ފަހު، ޑިބާލާ އުފާފާޅެއް ނުކުރެ އެވެ. އެކަމަކު ފެނުނީ ފަޔަށް ތަދެއް އަރައި، ކޮރު ޖެހި މަންޒަރެވެ. ޕެނަލްޓީ ޖެހުމުގެ ތެރޭގައި ފަލަމަސްގަނޑަށް ލިބުނު އަނިޔާއަކާ ގުޅިގެން ޑިބާލާ ވަނީ ބާލައިފަ އެވެ.
މެޗަށް ފަހު ވާހަކަދައްކަމުން ރޯމާގެ ކޯޗު ހޯސޭ މޮރީނިއޯ ބުނީ މި އަނިޔާއާ ގުޅިގެން މި އަހަރުގެ ތެރޭގައި ޑިބާލާ އަށް ކުޅެވުމަކީ "ނާދިރު ކަމެއް" ކަމަށެވެ.
"ވަރަށް ދެރަކަމެއް މިއީ. އަހަންނަކީ ޑޮކްޓަރެއް ނޫން. އަދި އޭނައާ ވާހަކައެއް ވެސް ނުދައްކަން. އެކަމަކު އަހަރެންގެ ތަޖުރިބާ އިން ބުނާނީ ސީޒަން ބްރޭކްގެ ކުރިން އެނާ އަށް ނުކުޅެވޭނެއޭ،" ޑިބާލާ ބުންޏެވެ.
ޑިބާލާ އަށް ލިބުނު އަނިޔާގެ ތަފްސީލެއް އެނގޭނީ އިތުރު ޓެސްޓްތައް ހެދުމަށް ފަހު އެވެ. އެކަމަކު ވޯލްޑް ކަޕް ފެށުމަށް ހަ ހަފުތާގެ މުއްދަތެއް އޮތްއިރު، ޑިބާލާ އަށް މި މުބާރާތް ގެއްލުމުގެ ފުރުސަތު ބޮޑު ކަމަށް ރިޕޯޓްތަކުން ބުނެ އެވެ.
