ސުޒޫކާ، ޖަޕާން (އޮކްޓޫބަރު 9) - ވިއްސާރައިގެ ސަބަބުން އަސަރު ކުރި ޖަޕާންގެ ގްރޭންޑްޕްރިކްސް ރޭސް ކާމިޔާބުކޮށް ނެދަލެންޑްސްގެ ރެޑްބުލް ރޭސަރު މެކްސް ވާސްޓެޕަން، ދުނިޔޭގެ ޗެމްޕިއަންކަން ދިފާއުކޮށްފި އެވެ.
މިދިޔަ އަހަރު ފަހު ރޭހަށް ނުކުތްއިރު، ވާސްޓެޕަން އާއި މެރްސެޑީސްގެ ލެވިސް ހެމިލްޓަންއާ އޮތީ ޕޮއިންޓުގެ ގޮތުން އެއްވަރުވެފަ އެވެ. ވާސްޓެޕަން، ރޭސް ނިންމާލީ ފަހު ވަގުތު ހަނި ފަރަގަކުންނެވެ. މި ފަހަރު ވާސްޓެޕަން ދުނިޔޭގެ ތަށި ދިފާއު މިކުރީ ބާކީ ހަތަރު ރޭސް އޮއްވަ އެވެ. ހަތަރު ރޭސް އޮއްވައި، ދުނިޔޭގެ ޗެމްޕިއަންކަން މީގެ ކުރިން ހޯދިފައިވަނީ އެންމެ ދެ ރޭސަރުންނަށެވެ. އެއީ ލެޖެންޑަރީ ދެ ރޭސަރުން ކަމަށްވާ މައިކަލް ޝޫމާކާ އާއި ސެބަސްޓިއަން ވެޓްލް އެވެ.
ވާސްޓެޕަން، 25، މިއަދު ޖަޕަނީސް ގްރޭންޑްޕްރިކްސް ކާމިޔާބުކޮށް ވަނީ ރޭންކިންގައި 113 ޕޮއިންޓުގެ ލީޑެއް ނަގައިފަ އެވެ. މިއީ ދެން އޮތް ހަތަރު ރޭހުން އެހެން ރޭސަރަކަށް ހަމަކުރެވޭނެ ފަރަަގަކަށް ނުވާތީ ވާސްޓެޕަން އަށް ވަނީ މިއަދު ދުނިޔޭގެ ޓްރޮފީ ހަވާލުކޮށްފަ އެވެ. އެ ގޮތަށް ނިންމީ ފޯމިއުލާ ވަންގެ ދުނިޔޭގެ ފެޑެރޭޝަން އިން ރޭންކިން ޕޮއިންޓްތަކުގެ ފަރަގު ފުރިހަމަ އަށް ބެލުމަށް ފަހު އެވެ.
ވާސްޓެޕަން އަށް ވެސް ދުނިޔޭގެ ޓްރޮފީ ޖެހިޖެހިގެން ދެ ވަނަ ފަހަރަށް ލިބުނުކަން އެނގުނީ އޭނާ ޓީވީ އިންޓަވިއުގައި ހުއްޓަ އެވެ.
"މި ރޭހުގައި ޓްރޮފީ ލިބޭނެ ކަމަށް ހިއެއް ނުކުރަން. މިއީ ވަރަށް ސަޕްރައިޒިން ކާމިޔާބީއެއް،" ވާސްޓެޕަން ބުންޏެވެ.
ވާސްޓެޕަން ވަނީ މި އަހަރުގެ މިހާތަނަށް 18 ރޭހުގެ ތެރެއިން 12 ރޭސް ކާމިޔާބު ކޮށްފަ އެވެ. ދުނިޔޭގެ ޗެމްޕިއަން ފުރަތަމަ ފަހަރަށް ލިބޭއިރު ވަރަށް ޖަޒުބާތީ ވާނެކަން ފާހަގަކޮށް، ވާސްޓެޕަން ބުނީ ޓްރޮފީ ދިފާއުކުރުމުން ކުރެވެނީ ތަފާތު އިހުސާސެއް ކަމަށެވެ.
ޖަޕަނީސް ގްރޭންޑް ޕްރިކްސްގެ ދެ ވަނަ ހޯދީ ފެރާރީގެ ރޭސަރު ޗާލްސް ލެކްލާކް އެވެ. އަދި ތިން ވަނަ އަށް ދިޔައީ ރެޑްބުލްގެ ރޭސަރެއް ކަމަށްވާ ސާޖިއޯ ޕެރޭޒް އެވެ.
