ސުޒޫކާ، ޖަޕާން (އޮކްޓޫބަރު 7) - ފޯމިއުލާ ވަންގެ ސީޒަނުގައި އެއްވެސް ޓީމަކުން ހަރަދުކުރުމުގެ ގަވާއިދާ ހިލާފުވެފައިވާނަމަ އަދަބުދޭން ޖެހޭ ކަމަށް މަޝްހޫރު ރޭސަރު، ލެވިސް ހެމިލްޓަން ގޮވާލައިފި އެވެ.
ހަތް ފަހަރު ދުނިޔޭގެ ޗެމްޕިއަންކަން ހޯދާފައިވާ ހެމިލްޓަން މި ގޮތަށް ގޮވާލީ ފޯމިއުލާ ވަން ދުނިޔޭގެ ފެޑެރޭޝަނުން ޓީމުތަކުގެ މާލީ ރިޕޯޓްތައް މިދިޔަ ބުދަ ދުވަހު އިއުލާނުކުރަން ހަމަޖެހި އޮއްވައި، އެކަން އަންނަ ހަފްތާގެ ހޯމަ ދުވަހަށް ފަސް ކުރުމުންނެވެ.
ފޯމިއުލާ ވަން ޓީމުތަކުން ކުރާ ހަރަދުތައް ކޮންޓްރޯލެއްގެ ދަށުގައި ބެހެއްޓުމުގެ ބޭނުމުގައި ބަޖެޓް ކެޕެއް ހަމަޖައްސާފައި އޮވެ އެވެ. އެ އުސޫލުގެ ދަށުން ކުރިއަށްދާނަމަ ކޮންމެ ޓީމަކަށް ވެސް ސީޒަނަކު ހަރަދުކުރެވޭނީ 145 މިލިއަން ޑޮލަރެވެ.
މީޑިއާ ރިޕޯޓްތައް ބުނާގޮތުން ރެޑްބުލް އާއި އެސްޓަން މާޓިން ވަނީ ބަޖެޓް ކެޕް އަށް ވުރެ އިތުރަށް މިދިޔަ ސީޒަނުގައި ހަރަދުކޮށްފަ އެވެ. ރެޑްބުލް އިން ވަނީ އުސޫލާ ހިލާފަށް ހަރަދުނުކުރާ ކަމަށް ބުނެފަ އެވެ. އަދި އެސްޓަން މާޓިން އިން ވެސް ބުނީ އެ ޓީމު ދަނީ ގަވާއިދާ އެއްގޮތަށް ކަމަށް ހާމަކޮށްފަ އެވެ.
މިދިޔަ އަހަރުގެ ޑިސެމްބަރު މަހު ބޭއްވި އަބޫ ދާބީ ރޭހުގައި ފަހު ވަގުތު ހެމިލްޓަން ބަލިވީ ރެޑްބުލްގެ ރޭސަރު، މެކްސް ވާސްޓެޕަން އަތުންނެވެ. ވާސްޓެޕަން ވަނީ ފަހު ރޭހުގެ މި ކާމިޔާބީއާ އެކު ހެމިލްޓަންގެ މައްޗަށް ކުރިހޯދައި ދުނިޔޭގެ ޗެމްޕިިއަންކަން ހޯދައިފަ އެވެ.
ޖަޕަނީސް ގްރޭންޑް ޕްރިކްސްގެ ކުރިން މީޑިއާ އަށް ދިން އިންޓަވިއުއެއްގައި ހެމިލްޓަން ބުނީ ދުނިޔޭގެ ފެޑެރޭޝަންގެ އިތުބާރު ދަމަހައްޓާނަަމަަ އުސޫލަކާ ހިލާފުވެފައިވާ ކޮންމެ ޓީމަކަށް ވެސް ފިޔަވަޅު އަޅަން ޖެހޭނެ ކަމަށެވެ.
"އަހަރެން އުންމީދު ކޮށްގެން ހުރީ ރިޕޯޓްތައް ބުދަ ދުވަހު ކިޔާލަން ލިބޭނެ ކަމަށް. އެކަމަކު، އެކަމެއް ނުވި. ދެން ލަސްކުރި ސަބަބާ ބެހޭގޮތުން އަހަންނަށް ބުނެވޭނީ، އޭގެ ސީރިއަސް ނަޒަރަކުން ބަލަންޖެހޭ ކަންކަން ހުރީހެން،" ހެމިލްޓަން ބުންޏެވެ. "އުސޫލާ ހިލާފުވެފައި އޮއްވައި، ފިޔަވަޅެއް ނާޅައިފިނަމަ އެ ދެވެނީ ވަރަށް ނުރަނގަޅު މެސެޖެއް،"
މަރްސެޑީސް ޓީމުގެ ހެމިލްޓަން ބުނީ ފޯމިއުލާ ވަންގެ އިންޓަނޭޝަނަލް ފެޑެރޭޝަންގެ ރައީސް މުހައްމަދު ބެން ސުލަޔޭމް އަށް ފުރިހަމަ އިތުބާރު އެބައޮތް ކަމަށާއި އޭނާ ކަންކަން ކުރަމުން އަންނަނީ ދެފުށްފެންނަ ނިޒާމެއްގެ ތެރެއިން ކަމަށްވާއިރު، މި ކަމުގައި ވެސް ކުޅިވަރަށް ރަނގަޅު ގޮތަށް ގޮތް ނިންމާނެ ކަމަށެވެ.
