އެމްޕޮލީ، އިޓަލީ (ސެޕްޓެމްބަރު 13) - އިޓާލިއަން ލީގުގައި ރޭ އެމްޕޮލީ ދަނޑުގައި ޓަމީ އަބްރަހަމް ޖެހި ގޯލުން 2-1 އިން މޮޅުވެ، ރޯމާ އިން ހަމަޖެހުމެއް ހޯދައިފި އެވެ.
މި މެޗަށް ނުކުތްއިރު ރޯމާ ވަނީ އެންމެ ފަހުން ކުޅުނު ދެ މެޗުން ވެސް ބަލިވެފަ އެވެ. އިޓާލިއަން ލީގުގައި އެންމެ ފަހުން ކުޅުނު މެޗުން އުދިނޭޒީ އަތުން 4-0 އިން ބަލިވިއިރު، މިދިޔަ ބުރާސްފަތި ދުވަހުގެރޭ ޔޫރޮޕާ ލީގުގައި ލުޑޮގޮރެޓްސް އަތުން ބަލިވީ 2-1 އިންނެވެ.
ރޭގެ މޮޅާ އެކު ރޯމާ ވަނީ ލީގުގެ ފަސް ވަނަ އަށް ޖެހިލައިފަ އެވެ. އެއް ވަނައިގައި އޮތް ނަޕޯލީ އާއި ދެ ވަނައިގައި އޮތް އެޓަލަންޓާ އަދި ތިން ވަނައިގައި އޮތް އެންމެ ފަހުގެ ޗެމްޕިއަން އޭސީ މިލާނަށް ވަނީ ހަ މެޗުން 14 ޕޮއިންޓް ލިބިފަ އެވެ. ހަތަރެއްގައި އޮތް އުދިނޭޒީ އާއި ފަސް ވަނައިގައި އޮތް ރޯމާ އަށް ވަނީ ހަ މެޗުން 13 ޕޮއިންޓް ލިބިފަ އެވެ.
އެމްޕޮލީ ކޮޅަށް ރޯމާގެ ފުރަތަމަ ގޯލު ޖެހީ މެޗުގެ 17 ވަނަ މިނިޓްގައި ޕައޮލޯ ޑިބާލާ އެވެ. އޭރިއާބޭރުން ޑިބާލާ ޖެހި ބޯޅަ އަމާޒުވީ ގޯލުގެ މަތީ ކަނަށެވެ. މި ގޯލު ޖެހުމުގެ ކުރިން އޭރިއާތެރެއިން ޑިބާލާ ޖެހި ޝޮޓެއް އަމާޒުވީ ގޯލުގެ ދަނޑިއަށެެވެ.
އެމްޕޮލީގެ ކުޅުންތެރިއެއް ކައިރިން ރޯމާގެ ޑިބާލާ ބޯޅަ ހިފައިގެންދަނީ.--- ފޮޓޯ: އޭއެފްޕީ
ފުރަތަަމަ ހާފު ނިމުމުގެ ކުރިން އެމްޕޮލީން ވަނީ އެއްވަރުކޮށްފަ އެވެ. މި ގޯލު ޖެހީ އޭރިއާތެރެއަށް އެމްޕޮލީގެ ޕީޓާ ސްޓޮޖަނޮވިކް ނެގި ހުރަހަކުން ފިލިއްޕޯ ބަންޑިނެލީ ބޮލުންނެވެ. ރޯމާގެ ކީޕަރު ރުއީ ޕެޓްރީޝިއޯ އަށް އެ ބޯޅަ ހުއްޓުވޭގޮތެއް ނުވީ މިސްރާބު ބަދަލުވެގެން އައުމުންނެވެ.
ރޯމާ މޮޅުކޮށްދިން ގޯލު މެޗުގެ 71 ވަނަ މިނިޓްގައި އަބްރަހަމް ޖެހީ ޑިބާލާ އަރިމަތިން ނެގި ހުރަހަކުންނެވެ. އެ ބޯޅަ ގޯލަށް ވަނީ އެމްޕޮލީ ކީޕަރު ގުގްލިއެލްމޯ ވިކާރިއޯ އަތުގައި ޖެހިފަ އެވެ. އޭގެ 10 މިނިޓް ފަހުން، ރޯމާ އަށް ތިން ވަނަ ގޯލެއް ޖަހައިދޭން ލިބުނު ޕެނަލްޓީން އެ ޓީމުގެ ކެޕްޓަން، ލޮރެންޒޯ ޕެލެގްރީނީ ޖެހި ބޯޅަ ބޭރުވީ ހުރަސްދަނޑީގައި ޖެހިފަ އެވެ.
އެމްޕޮލީ އަށް ނަތީޖާ ހަމަހަމަކޮށްދޭން އެ ޓީމުގެ ޖިއާން އަކްޕާ ޖެހި ބޯޅަ އަމާޒުވީ ގޯލުގެ ދަނޑިއަށެވެ. އެ ޝޮޓް ފޮނުވާލިތާ އިރުކޮޅެއް ފަހުން، ރޯމާގެ ސްމޯލިން އަށް އަކްޕާ ކުރި ފައުލަކަށް އޭނާ އަށް ރަތް ކާޑެއް ދެއްކި އެވެ. އެމްޕޮލީގެ ކުޅުންތެރިއަކު މަދުވި ފަހުން، ރޯމާ އިން ކުރި އެޓޭކެއްގައި އެ ޓީމުގެ ފޯވާޑް އަންދްރެއާ ބެލޮއްޓީ ހުސްކޮށް ވަދެ ޖެހި ބޯޅަ އެމްޕޮލީގެ ކީޕަރު ވިކާރިއޯ ވަނީ މަތަކޮށްފަ އެވެ.
ރޯމާގެ ކޯޗު ހޯސޭ މޮރީނިއޯ ބުނީ ޖެހިޖެހިގެން ދެ މެޗުން ބަލިވެފައި އޮއްވައި އެމްޕޮލީ ދަނޑުގައި އޭނާގެ ޓީމުން މި ހޯދި މޮޅަކީ ކުރިއަށް އެޅި ފިޔަވަޅެއް ކަމަށެވެ.
