މެންޗެސްޓާ (ސެޕްޓެމްބަރު 8) - މެންޗެސްޓާ ޔުނައިޓެޑަކީ އަަބަދުވެސް އެ ކުޅޭ މުބާރާތެއްގެ ކޮންމެ މެޗަކުން މޮޅުވާން ބޭނުންވާ ޓީމެއް ކަމަށާއި އެ އުސޫލުން ބަލާއިރު ޔުނައިޓެޑުން މި ފަހަރުގެ ޔޫރޮޕާ ލީގުގައި ނުކުންނާނީ ސީރިއަސްކޮށް ނަގައިގެން މުބާރާތް ކާމިޔާބު ކުރަން ކަމަށް ޔުނައިޓެޑްގެ ކޯޗު ޓެން ހާގް ބުނެފި އެވެ.
ޔުނައިޓެޑުން އެންމެ ފަހުން ތަށްޓެއް ހޯދީ 2017 ވަނަ އަހަރުގެ ޔޫރޮޕާ ލީގެވެ. އެއީ ފައިނަލުގައި އަޔަކްސް ބަލިކޮށްގެންނެވެ. އޭގެ ފަހުން، 2021 ވަނަ އަހަރުގެ ޔޫރޮޕާ ލީގު ފައިނަލުގައި ޔުނައިޓެޑް ވަނީ ވިޔަރެއާލް އަތުން ބަލިވެފަ އެވެ.
މި ފަހަރުގެ ޔޫރޮޕާ ލީގުގައި ޔުނައިޓެޑުން ކުޅެން ޖެހިފައިވާއިރު، އެ ޓީމާ އެއް ގްރޫޕެއްގައި އޮތީ ސްޕެއިނުގެ ރެއާލް ސޮސިއެޑާޑްގެ އިތުރުން ދާދި ފަހުން ޗެމްޕިއަންސް ލީގުގައި ވެސް ކުޅުނު މޮލްޑޯވާގެ ޝެރިފް ޓިރާސްޕޯލް އާއި ސައިޕްރަސްގެ އޮމޯނިއާ އެެވެ.
ޔުނައިޓެޑުން މި ފަހަރުގެ ޔޫރޮޕާ ލީގުގައި ކުޅޭ ފުރަތަމަ މެޗުގައި މިރޭ އަމިއްލަ ދަނޑުގައި ސޮސިއެޑާޑާ ކުޅޭނެ އެވެ. އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޓެން ހާގް ބުނީ ޔުނައިޓެޑްގައި ވަރުގަދަ ސްކޮޑެއް އެބައޮތް ކަަަމަށާއި އެހެންކަމުން ބަދަލުތަކެއް ގެނެސްގެން ވިޔަސް ހުރިހާ މުބާރާތެއްގައި ހާސިލްކުރަން ބޭނުންވާ ޓާގެޓަށް ދެވޭނެ ކަމަށެވެ.
"ޔަގީނުން ވެސް އަހަރެމެން ކުޅެން ޖެހޭނީ ކޮންމެ މެޗަކުން މޮޅުވާން. އަހަރެމެން ކޮންމެ މުބާރާތެއް ވެސް ކާމިޔާބުކުރަން ބޭނުން. އެހެންވީމަ މި މުބާރާތް ވެސް (ޔޫރޮޕާ ލީގު ވެސް) އަހަރެމެން ނަގާނީ އެހެން މުބާރާތެކޭ އެއްގޮތަށް ސީރިއަސްކޮށް، ކޮންމެ މެޗަކުން ވެސް މޮޅުވުމަކީ މެންޗެސްޓާ ޔުނައިޓެޑްގެ މެންޓަލިޓީ،" ޓެން ހާގް ބުންޏެވެ.
ޔޫރޮޕާ ލީގުގައި ޔުނައިޓެޑުން ބޭނުންކުރާ ފުރަތަމަ އެގާރައިގައި ބަދަލުތަކެއް ފެނުމުގެ ފުރުސަތު އެބައޮތް ކަމަށް ޓެން ހާގް ވަނީ ބުނެފަ އެވެ. އެ ގޮތުން އެންމެ ފަހުން ޔުނައިޓެޑުން ކުޅުނު ހަތަރު މެޗުގައި ބެންޗުން ފަށަން ޖެހުނު ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ އާއި ޓީމުގެ ކެޕްޓަން، ހެރީ މެގުއާ އަށް ސޮސިއެޑާޑް މެޗުގައި ފުރަތަމަ އެގާރައިން ފުރުސަތު ލިބުން ގާތެވެ.
"ރޮނާލްޑޯ ބްރެންޓްފޯޑް މެޗުގައި ފެށި، ދެން އެ އަށް ފަހު މި އައީ އެހެން މެޗުތަކެއް، މިހާރު އޭނާ ހުރީ މެޗެއް ފަށައިގެން ބޭނުން ލެވަލަށް ކުޅެވޭހާ ފިޓްކޮށް، ޔަގީނުން ވެސް ގިނަ މެޗުތަކެއްގައި އޭނާ ފެންނާނެ،" ޓެން ހާގް ބުންޏެވެ.
ޓެން ހާގް ވަނީ ސީޒަނުގެ ކުރީކޮޅުގައި ޔުނައިޓެޑްގެ ފޯވާޑް މާކަސް ރަޝްފޯޑް ދައްކަމުން އަންނަ ކުޅުމަށް ތައުރީފުކޮށްފަ އެވެ. އަދި ރަޝްފޯޑްގެ ފަރާތުން އެ ފެންނަ ޕޮޒިޓިވް ކަންކަމަކީ ރަނގަޅު ޕްރީ ސީޒަނެއް ފުރިހަމަކޮށްފައި އައުމުގެ ނަތީޖާ ކަމަށާއި މެޗަކަށް ފަހު މެޗެއް މުޅި ޓީމުގެ ކުޅުން ރަނގަޅުވަމުން އައުމަކީ ވެސް ހިތްހަމަޖެހުމެއް ކަމަށް ޓެން ހާގް ވަނީ ބުނެފަ އެވެ.
