ނިއު ސްޓާ ސްޕޯޓްސް ކުލަބުން އިންތިޒާމް ކޮށްގެން ކުރިއަށް ގެންދިޔަ މާފުށީ ޕްރޯ ކައިޓް ސާފިން މުބާރާތް ރާއްޖޭގައި ހުރި އެންމެ ހުނަރުވެރި ކައިޓް ސާފަރު ހަސަން މާހިރު (ހަންޓޭ) ކާމިޔާބުކޮށްފި އެވެ.
ސާދަ ކައިޓް ސާފަރުންނާ އެކު މާފުށީ ޕްރޯ ކައިޓް ސާފިން މުބާރާތް ކުރިއަށް ގެންދިޔައީ އިއްޔެ މާފުށީގެ ދެކުނު ބީޗު ސަރަހައްދުގަ އެވެ.
ބ. ގޮއިދޫ އަށް އުފަން ހަންޓޭ އެއް ވަނަ ހޯދިއިރު، މި އިވެންޓުން ދެ ވަނަ އަދި ތިން ވަނަ އަށްވެސް ދިޔައީ ގޮއިދޫގެ އެތުލީޓުންނެވެ. ދެ ވަނަ ރާއިފް ޝަނީޒް ހޯދިއިރު، ތިން ވަނަ ހޯދީ މަމްނޫން ނިޔާޒު (މަންނު) އެވެ.
އިންޓަނޭޝަނަލް ބްރޭންޑެއް ކަމަށްވާ "ސްލިންގްޝޮޓް"ގެ ރާއްޖޭގެ އެމްބެސެޑަރު ހަންޓޭ ވަނީ މި އަހަރުގެ ކުރީކޮޅު ރާޅުގުޑިން މާފުށީގައި ބޭއްވި ކައިޓް ބޯޑިން މުބާރާތުގެ ދެ ވަނަ ހޯދައިފަ އެވެ. އެ ފަހަރު ހަންޓޭ ބަލިކޮށް އެއް ވަނަ ހޯދީ އަބްދުއްތަސްލީމް (ޑެލިއޯ) އެވެ.
ފްރީ ސްޓައިލް މުބާރާތެއްގެ ގޮތުގައި ކުރިއަށްދިޔަ މާފުށީ ޕްރޯ ކައިޓް ސާފިން މުބާރާތަކީ ވާދަވެރިގޮތެއްގައި ކައިޓް ސާފަރުންނަށް މި ކުޅިވަރުގައި ކުރިއަށް ދިޔުމުގެ ފުރުސަތު ހޯދައިދިނުމަށް މާފުށީގެ ނިއު ސްޓާ ސްޕޯޓްސް ކުލަބުން ބޭއްވި މުބާރާތެކެވެ.
މީގެ އިތުރުން ކައިޓް ސާފަރުން އެއްތަނަކުން ދިމާވެލައި އެކުވެރި މާހައުލެއްގައި ވާދަކޮށްލުމުގެ ފުރުސަތު ހޯދައިދިނުމަކީ ވެސް މުބާރާތް ބޭއްވުމުގައި މައިގަނޑު އެއް ސަބަބުކަމަށް ނިއު ސްޓާ ސްޕޯޓްސް ކުލަބުން ހާމަކުރެ އެވެ.
ކ.މާފުއްޓަކީ ވޯޓާ ސްޕޯޓްސް ޓުއަރިޒަމް އަށް ދިވެހިންގެ މެދުގައި ވެސް ވަރަށް މަގުބޫލު ރަށެކެވެ. އެހެންކަމުން މާފުށި އިސްތިހާރުކުރުމަށް ވެސް މި މުބާރާތުގެ ސަބަބުން ފުރުސަތު ލިބުނު ކަމަށް މުބާރާތް އިންތިޒާމް ކުރި ފަރާތުން ހާމަ ކުރެ އެވެ.
