އެއް ޖިންސުން ގުޅުން ހިންގާ ބަދުއަހުލާގީ އަމަލު ހިންގާ ވީޑިއޯތަކުގެ މައްސަލައިގައި އެމްއެންޑީއެފްގެ މީހަކު ސަސްޕެންޑުކޮށްފި އެވެ.
އެއް ޖިންސުން ގުޅުން ހިންގި ކަމަށް ތުހުމަތު ކުރެވޭ ސިފައިންގެ މީހަކު އިއްޔެ ސަސްޕެންޑުކޮށްފައިވާކަން އެމްއެންޑީއެފްގެ މީޑިއާ އޮފިޝަލް މި ނޫހަށް ވަނީ ކަށަވަރުކޮށްދެއްވާފަ އެވެ.
ބަދުއަހުލާގީ އަމަލު ހިންގާ ވީޑިއޯތައް އާންމުވުމަށް ފަހު ފުލުހުން ބުނެފައި ވަނީ އެ ވީޑިއޯތަކުގައި ހިމެނޭ މީހުންގެ މައްސަލަތައް ބަލަމުންދާ ކަމަށެވެ. އަދި، އެ ވީޑިއޯތައް ބޭނުންކޮށްގެން ބްލެކްމެއިލް ކުރި ކަމަށް ބުނެ ހުށަހަޅާފައިވާ މައްސަލަަތަކެއް ވެސް ފުލުހުން ގެންދަނީ ބަލަމުންނެވެ.
މި މައްސަލައާ ގުޅިގެން ކުރިއަށްގެންދާ ތަހުގީގު ފުޅާކޮށްފައިވާއިރު ފުލުހުން ވަނީ އަލަމްގީރު ހިމެނޭހެން ހަތަރު މީހަކު ހައްޔަރުކޮށް 18 އަށް ވުރެ ގިނަ މީހެއްގެ ޕާސްޕޯޓު މިހާތަނަށް ހިފަހައްޓާފަ އެވެ.
ފުލުހުން މީގެ ކުރިން ބުނި ގޮތުގައި ތަހުގީގީ އިޖުރާއަތްތައް ހިންގަމުން ދަނީ މިހާތަނަށް ފޮރެންސިލް ތަހްލީލުތަކުން ކަށަވަރުކުރެވިފައިވާ ވީޑިއޯ އެވީޑެންސްތަކުގައި ހިމެނޭ މީހުންގެ މައްޗަށެވެ.
މީގެ ތެރޭގައި ތަހުގީގަށް މީހުން ހައްޔަރުކުރުމާއި މިފަދަ މައްސަލަތަކުގައި އެކަށީގެންވާ މީންވަރަށް ހެއްކާއި ގަރީނާ ހޯދިފައިވާ ދައުލަތުގެ އެކި އިދާރާތަކުގައި މަސައްކަތްކުރާ ފަރާތްތައް ނިސްބަތްވާ އޮފީސްތަަކަށް އެމީހުންގެ މައްސަލަތައް ތަހުގީގު ކުރަމުންދާކަން އަންގަމުންދާ ކަމަށް ވަނީ ބުނެފަ އެވެ.
އެއާއެކު، ގިނަ އިދާރާތަކުން އަންނަނީ ވީޑިއޯތަކުގެ މައްސަލައިގައި ހިމެނޭ މީހުން ސަސްޕެންޑުކުރަމުންނެވެ. އޭގެ ތެރޭގައި ކަސްޓަމްސް ދެ މުވައްޒަފަކާއި ބައެއް މިނިސްޓްރީތަކުގެ މުވައްޒަފުންނާއި އިމާމެއްގެ އިތުރުން ޓީޗަރެއް ވެސް ވަނީ ސަސްޕެންޑުކޮށްފަ އެވެ.
