ނޭޕްލްސް (އޮގަސްޓް 3) - ނަޕޯލީން ކުރިއަށް އޮތްތަނުގައި ވިސްނާނީ އެފްރިކާ ބައްރުން ވީހާވެސް މަދު ކުޅުންތެރިން ހޯދުމަށް ކަމަށް އެ ކްލަބްގެ ރައީސް އައުރޭލިއޯ ޑި ލޯރެންޓީސް ވިދާޅުވެއްޖެ އެވެ.
ނަޕޯލީގައި މި ވަގުތު ތިބި އެފްރިކާގެ ކުޅުންތެރިންނަކީ ނައިޖީރިއާގެ ވިކްޓަ އޮސީމެއިން އާއި ކެމަރޫންގެ ޒަމްބޯ އަންގީސާ އެވެ.
އިޓަލީގެ ގިނަ ކްލަބްތަކުން އެފްރިކާގެ ކުޅުންތެރިންނަށް އިންވެސްޓް ކުރުމުގެ ބަދަލުގައި އާ ކުޅުންތެރިން ހޯދަން ބަލަނީ ދެކުނު އެމެރިކާ އަށެވެ. އޭސީ މިލާނާއި އިންޓަ މިލާން އަދި ޔުވެންޓަސް އަކީ ދެކުނު އެމެރިކާގައި ސްކައުޓުން ހަމަޖައްސައިގެން ކުޅުންތެރިން އަތްފުނާ އަޅާ ކްލަބްތަކެވެ. ފަހަކަށް އައިސް އިޓަލީގައި އެފްރިކާ އަށް ނިސްބަތްވާ ކުޅުންތެރިންގެ ނުފޫޒު އަންނަނީ ގަދަވަމުންނެވެ.
އެކަމާ ބެހޭގޮތުން ނަޕޯލީގެ ރައީސް ޑި ލޯރެންޓީސް ބުނީ އެފްރިކާ ކުޅުންތެރިންގެ ހުނަރާ މެދު ސުވާލެއް ނެތް ކަމަށާއި މައްސަލަ ޖެހެނީ އެފްރިކަން ކަޕް އޮފް ނޭޝަންސްގެ ޝެޑިއުލާއި އެފްރިކާގައި ވޯލްޑް ކަޕް ކޮލިފައިން ފަދަ މެޗުތައް ކުޅެން ރާވާ ގޮތް ކަމަށެވެ.
"އަހަރެން މިއީ އެފްރިކާއާ ދެކޮޅު މީހެއް ނޫން. އެކަމަކު، ވިޔަފާރިއެއްގެ ގޮތުގައި ކްލަބްގެ ކަންކަން ހިނގާއިރު، އަހަރެމެން ކްލަބްގެ މަސްލަހަތު އިސްކުރަން ޖެހޭ ފަހަރު އަންނާނެ. އެފްރިކަން ކަޕް މި ކުޅެނީ ޖެނުއަރީގައި، ދެން އެ މީހުން ބޭނުން ގޮތަކަށް ކޮލިފައިން މެޗުތައް ރާވަނީ. މި ހުރިހާ މެޗުތަކަށް ކުޅުންތެރިން ރިލީސްކޮށްފައި އަހަރެމެން މި ޖެހެނީ ކޮންޓްރެކްޓްގައިވާ ގޮތަށް އެ މީހުންނަށް (އެފްރިކާ ކުޅުންތެރިންނަށް) މުސާރަދޭން،" ޑި ލޯރެންޓީސް ވިދާޅުވި އެވެ.
އޭނާ ވިދާޅުވީ ކްލަބަކުން ކުޅުންތެރިއަކު ގަންނަން އެ ކުރަނީ އިންވެސްޓްމަންޓެއް ކަމަށާއި އެ ލަސްވެގެން ފަސް އަހަރު ތެރޭ ކްލަބަށް ބަދަލު ލިބޭ ގޮތަށް ކަމަށެވެ. އެކަމަކު، އެފްރިކާ ކުޅުންތެރިން ގަނެގެން، ގިނަ ފަހަރު ޖެހެނީ ހަރަދު ދެކޮޅު ނުޖެހި، ސީޒަންގެ މުހިންމު ހިސާބަކުން އެ ކުޅުންތެރިން ގެއްލޭއިރު ވެސް މުސާރަ ދޭން ކަމަށް ޑި ލޯރެންޓީސް ވަނީ ވިދާޅުވެފަ އެވެ.
ފްރާންސްގެ ލިލް ދޫކޮށް، މީގެ ދެ އަހަރު ކުރިން ނަޕޯލީ އަށް އޮސީމެއިން، 23، ބަދަލުވިއިރު، 80 މިލިއަން ޑޮލަރުގެ ފީއެއް ދެއްކި އެވެ.
އިނގިރޭސި ޕްރިމިއާ ލީގުގެ ބޮޑެތި ކްލަބްތަށް އެމެރިކާގެ މަހުޖަނުން ގަންނާތީ އެ ކަމާ ބެހޭގޮތުން ޑި ލޯރެންޓީސް ވިދާޅުވީ ނަޕޯލީ ގަންނަން ވެސް އެމެރިކާ ވިޔަފާރިވެރިއަކުގެ ހުށަހެޅުމެއް ލިބުނު ކަމަށެވެ. އެ ގޮތުން 2017 ވަނަ އަހަރު ނަޕޯލީ ގަންނަން ލިބުނު 900 މިލިއަން ޑޮލަރުގެ ބިޑް އަނބުރާ ފޮނުވާލީ، ފައިސާތަކެއް ހިފައިގެން އަޔަސް "ޕެޝަން" ނެތް ބަޔަކަށް ކްލަބެއް ނުހިންގޭނެ ކަމަށް ފެންނާތީ ކަމަށް ޑި ލޯރެންޓީސް ވަނީ ވިދާޅުވެފަ އެވެ.
