އެއްޖިންސުން ގުޅުން ހިންގާ ވީޑިއޯތަކުގައި ހިމެނޭ މީހުންނަށް ފިޔަވަޅު އެޅުމަށް ބައެއް އިދާރާތަކުން އެއްބާރުލުން ނުދޭ ކަމުގެ އިޝާރާތެއް ހޯމް މިނިސްޓަރު އިމްރާން އަބްދުﷲ މިއަދު ދެއްވައިފި އެވެ.
މިނިސްޓަރު އިމްރާން މިފަދައިން ވިދާޅުވެފައިވަނީ، ސޯޝަލް މީޑިއާގައި ލީކުކޮށްލާފައިވާ ބަދުއަހުލާގީ އަމަލުތައް ހިންގާ ވީޑިއޯތަކުން ފެންނަ މީހުން ކޯޓު އަމުރުތަކެއްގެ ދަށުން ހައްޔަރުކުރުމުގެ މަސައްކަތް ފުލުހުން މިއަދު ފަށާފައިވަނިކޮށް ކުރެއްވި ޓްވީޓެއްގަ އެވެ.
އިިމްރާން ވިދާޅުވީ މިފަދަ މީހުންނަށް ގާނޫނުގެ ތެރެއިން ފިޔަވަޅު އެޅިނަމަވެސް, ޖިނާއީ އަދުލު ހިންގުމަކީ ފުލުހުންގެ އަތްމަތީގައި އެކަނި އޮތް ކަމެއް ނޫން ކަމަށެވެ.
"ނިޒާމުގައި ހިމެނޭ އެންމެން ﷲއަށް ބިރުވެތިވެ، ފުރިހަމަ ޒިންމާ އަދާކުރަން ޖެހޭ،" އިމްރާން ވިދާޅުވެފައިވެ އެވެ.
އަދި، މިފަދަ މީހުންނާމެދު ފިޔަވަޅު އެޅުމަށް ފަސް ނުޖެހޭނެ ކަމަށް ވިދާޅުވި ވާހަކަ އިމްރާން ވަނީ ތަކުރާރުކުރައްވާފަ އެވެ.
އެއްޖިންސުން ގުޅުން ހިންގާ މަންޒަރުތައް ފެންނަ ވީޑިއޯތަކެއް އާއްމުވުމުން، އެ ވީޑިއޯތަކުން ފެންނަ ފަރާތްތަކާ ދެކޮޅަށް ފިޔަވަޅު އެޅުން ލަސްވާތީ އާއްމުންނާއި ބައެއް ދީނީ އިލްމުވެރިން އަދި ސިޔާސީ ފަރާތްތަކުގެ ފާޑުކިޔުން އިމްރާނަށް ވަނީ އަމާޒުވެފަ އެވެ.
އެކަމާ ގުޅިގެން އިމްރާން ވަނީ ފާހިޝް އަމަލުތައް ހުއްޓުވަން ފިޔަވަޅު ނާޅައި ދޫކޮށް ނުލައްވާނެ ކަމަށް ވިދާޅުވެ މީގެ ހަފުތާއެއް ކުރިން ވެސް ޓްވީޓެއް ކުރައްވާފަ އެވެ.
ފުލުހުން މިއަދު ފަށާފައިވާ އޮޕަރޭޝަނުގައި މިހާތަނަށް ދެ މީހަކު ވަނީ ހައްޔަރުކޮށްފަ އެވެ. އެނގިފައިވާ ގޮތުގައި ފުލުހުން ހައްޔަރު ކޮށްފައިވަނީ ކާނަލް ނަޝީދުގެ އިތުރުން ފުލުހެއް ކަމަށްވާ އަބްދުއްރަހްމާން ރަފީއު އެވެ.
މި މައްސަލައިގައި ހައްޔަރު ކުރުމަށް ދެން ކޯޓުން އަމުރު ނެރެފައިވަނީ ގާނޫނީ ވަކީލު ނާޒިމް އަބްދުއްސައްތާރުގެ މައްޗަށެވެ. އެހެންނަމަވެސް އެނގިފައިވާ ގޮތުގައި އޭނާ މިވަގުތު މާލޭގައި ނެތެވެ.
އޭނާ މިވަގުތު ހުރީ އއ. އަތޮޅުގެ ރަށެއްގައި ކަމަށް މައުލޫމާތު ލިބިފައިވެ އެވެ. ނާޒިމްގެ ބައެއް ގާތް މީހުން މި ނޫހާ ވާހަކަ ދައްކަމުން ބުނި ގޮތުގައި އަމުރު ލިބުމުން އޭނާ ހައްޔަރުކުރަން ފުލުހުން, އޭނާ އުޅޭ ތަނެއް ބެލުމަށް ގުޅި ކަމަށެވެ. އެ ތަނުގެ މައުލޫމާތު ނާޒިމް ދީފައިވާ ކަމާއި ފުލުހުން އެތަނަކަށް ގޮސް އޭނާ ހައްޔަރުކުރުމަށް މަސައްކަތް ކުރަމުންދާ ކަމަށް މައުލޫމާތު ލިބެ އެވެ.
ފުލުހުން ބުނި ގޮތުގައި މި މައްސަލައިގައި މީހުން ހައްޔަރުކުރުން ލަސްވީ ވީޑީއޯ އާއި ފޮޓޯތަކުގެ ސައްހަކަށް ކަށަވަރުކޮށް އެފަދަ އެވިޑެންސްތަކުގައި ހިމެނޭ މީހުންގެ އައިޑެންޓީޓީ ފޮރެސިކް ތަޙްލީލުން ކަށަވަރުކުރުމަށް ވަގުތު ނެގުމުގެ ސަބަބުންނެވެ.
