ބުޑަޕެސްޓް، ހަންގޭރީ (ޖުލައި 28) - ހަތަރު ފަހަރު ފޯމިއުލާ ވަންގެ ޗެމްޕިއަންކަން ހޯދާފައިވާ ޖަރުމަންގެ ސެބެސްޓިއަން ވެޓަލް، މި ހިނގާ 2022 ވަނަ އަހަރުގެ ސީޒަނަށް ފަހު ފޯމިއުލާ ވަން އިން ރިޓަޔާކުރަން ނިންމައިފި އެވެ.
"ރިޓަޔާކުރުމަކީ އަހަންނަށް ފަސޭހަ ނިންމުމެއް ނޫން. މިކަމާމެދު ވަރަށް ދުވަހުު ވިސްނައިފިން،" ވެޓަލް ،35، މިހާރު ހިމެނޭ ޓީމު ކަމަށްވާ އެސްޓަން މާޓިން އިން ނެރުނު ބަޔާނެއްގައި އޭނަ ބުނެފައިވެ އެވެ.
"ބައްޕަ އަކަށް ވުމާ އެކު، އަހަރެން ބޭނުންވޭ އާއިލާއާ އެކު ގިނަ ވަގުތު ހޭދަކުރަން. އެކަމަކު، މިއަދު މިއީ އަލްވަދާއު ކިޔަންޖެހޭ ދުވަހެއް ނޫން. މިއަދު އަހަރެން ބޭނުންވަނީ ޝުކުރު އަދާކުރަން. ހާއްސަކޮށް ސަޕޯޓަރުންނަށް. ސަޕޯޓަރުން ނެތި، މި ކުޅިވަރު ދެމިއެއް ނޯންނާނެ."
ރެޑްބުލްއާ އެކު، ވެޓަލް އިން ވަނީ 2010 އިން 2013 އަށް ޖެހިޖެހިގެން ހަތަރު ފަހަރު ފޯމިއުލާ ވަންގެ ޗެމްޕިއަންކަން ހޯދައިފަ އެވެ. އެކަމަކު، ރެޑްބުލް ޓީމުން ވަކިވި ފަހުން، ފެރާރީގެ ޓީމާ އެކު އޭނާ އަށް ކުރީގެ ފޯމެއް ނުދެއްކުނެވެ. އެސްޓަން މާޓިންގެ ޓީމަށް އޭނާ ބަދަލުވީ މިދިޔަ އަހަރެވެ.
ވެޓަލް އެންމެ ފަހުން ފޯމިއުލާ ވަންގެ ރޭހެއް ކާމިޔާބުކުރީ 2019 ވަނަ އަހަރެވެ. އެކަމަކު، ގްރޯން ޕްރީގެ ޖުމްލަ 53 ރޭސް ކާމިޔާބުކޯށް، އޭނާ އަކީ ފޯމިއުލާ ވަންގެ ތާރީހުގައި ތިން ވަނަ އަށް އެންމެ ގިނަ ރޭސް ކާމިޔާބުކުރި ޑްރައިވަރެވެ.
އެމެރިކާގެ ގްރޯން ޕްރީގައި، ވެޓަލް އެންމެ ފުރަތަމަ ސައުބާއާ އެކު ފޯމިއުލާ ވަންގައި ވާދަކުރީ 2017 ވަނަ އަހަރެވެ. އަދި ހަމަ އެ އަހަރު، ޓޮރޯ ރޯސޯ އަށް ބަދަލުވެ، އެެ އަހަރު ބާކީ އޮތް ހަތް ރޭހުގައި އޭނާ ވާދަކުރި އެވެ.
އެއް ސީޒަން ޓޮރޯ ރޯސޯއާ އެކު ފުރިހަމަކުރުމަށް ފަހު އޭނާ ރެޑްބުލްގެ ޓީމާ ގުޅުނީ 2009 ވަނަ އަހަރެވެ. ވެޓެލް 2010 ވަނަ އަހަރު ރެޑްބުލްއާ އެކު ފޯމިއުލާ ވަންގެ ޗެމްޕިއަންކަން ހޯދިއިރު، އޭނާގެ އުމުރަކީ 23 އަހަރާއި 134 ދުވަހެވެ. އެހެންކަމުން، ވެޓަލް އަކީ ފޯމިއުލާ ވަންގެ ތާރީހުގައި ވެސް މުބާރާތުގެ ޗެމްޕިއަންކަން ހޯދި އެންމެ ހަގު ޑްރައިވަރެވެ.
ފެރާރީއާ އެކު ޗެމްޕިއަންކަން ވެޓަލް އަށް ނުލިބުނު ނަމަވެސް، ދެ އަހަރެއްގައި ރަނަރަޕްގެ މަގާމު ލިބުނެވެ. އެކަމަކު، ވެޓަލްގެ އައިޑަލް ކަމަށްވާ މައިކަލް ޝޫމާކާއާ އެއްގޮތަށް، ފެރާރީއާ އެކު ޗެމްޕިއަންކަން ނުލިބުމުން، ފެރާރީއާ އެކު ހޭދަކުރި ދުވަސްތައް އޭނާ ވަނީ ނާކާމިޔާބީއެއްގެ ގޮތުގައި ސިފަކޮށްފަ އެވެ. -- އޭއެފްޕީ
