ސިންގަޕޫރުގައި މި ވަގުތު ހުންނެވި ސްރީ ލަންކާގެ ކުރީގެ ރައީސް ގޮތަބަޔާ ރާޖަޕަކްސަ ހައްޔަރު ކުރުމަށް އެދި އިންސާނީ ހައްގުތަކަށް މަސައްކަތް ކުރާ ގްރޫޕަކުން ހުށަހަޅައިފި އެވެ.
އިންޓަނޭޝަނަލް ޓްރުތް އެންޑް ޖަސްޓިސް ޕްރޮޖެކްޓް (އައިޓީޖޭޕީ) އިން އެކަމަށް އެދި ހުށަހެޅީ ސިންގަޕޫރުގެ އެޓާނީ ޖެނެރަލްގެ އޮފީހަށެވެ. އެއީ ލަންކާގެ ދިގު ދާހިލީ ހަނގުރާމައިގައި ހިންގި ކަމަށް ތުހުމަތު ކުރެވޭ ލާއިންސާނީ އަމަލުތަކާ ގުޅިގެންނެވެ.
އައިޓީޖޭޕީއިން ބުނީ ލަންކާގެ ދާހިލީ ހަނގުރާމައިގެ ފަހު ދުވަސްކޮޅު ގޮތަބަޔާ ޑިފެންސް މިނިސްޓަރަކަށް ހުންނެވި އިރު، ލާއިންސާނީ އެތައް އަމަލެއް ސިފައިން ހިންގި ކަމަށެވެ.
"އަޅުގަނޑުމެން ހުށަހެޅި ޖިނާއީ ޝަކުވާ ބިނާވެފައި ވަަނީ ޔަގީން ކުރެވޭ މައުލޫމާތުގެ މައްޗަށް. ކުރި ކުށުގެ މައުލޫމާތު ވެސް ކަަށަވަރު ކުރެވޭނެ އަދި އެކަމާއި މި ވަަގުތު ސިންގަަޕޫރުގައި ހުންނެވި ގޮތަބަޔާއާ އޮތް ގުޅުމުގެ ހެކި ވެސް އެބަަ ހުރި،" ގާނޫނީ ވަކީލު އެލެގްޒެންޑްރާ ލިލީ ކޭތާ ރޮއިޓާޒްއަށް ވިދާޅުވި އެވެ.
ގިނަ ދުވަސްތަކެއް ވަަންދެން ރައްޔިތުން ކުރި މުޒާހަަރާގެ ސަބަބުން ޕްރެޝަަރު ބޮޑުވެ، ގޮތަބަޔާ ސިއްރުން ގައުމު ފުރާވަޑައިގެންނެވީ ޖުލައި 13 ގަ އެވެ. އެންމެ ފުރަތަމަ ރާއްޖޭގައި މަޑު ކުރެއްވުމަށް ފަހު އެމަަނިކުފާނު ވަޑައިގެންނެވީ ސިންގަޕޫރަށެވެ.
ސިންގަޕޫރަށް ވަޑައިގެން ރަސްމީކޮށް އިސްތިއުފާ ދެއްވި އެވެ. ސިންގަޕޫރުގައި އެމަަނިކުފާނު ހައްޔަރު ކުރަން އެދުނު މައްސަލައިގައި މިހާތަނަށް ވަަކި އެއްޗެއް ވިދާޅެއް ނުވެ އެވެ. އެކަމަކު މީގެ ކުރިން ގޮތަބަޔާ ވަނީ ހަނގުރާމައާ ގުޅުވައިގެން ކުރާ ތުހުމަތުތައް ދޮގުކުރައްވާފަ އެވެ.
