އިންޑޮނޭޝިއާގައި ހަލުވިކަމާއެކު ފެތުރެމުންދާ ވަރުގަދަ ޖަންގަލީގެ އަލިފާންގަނޑުތައް ނިއްވާލުމަށް މަސައްކަތް ކުރަމުންދާއިރު، މިދިޔަ އޮގަސްޓް މަހުން ފެށިގެން އެ ގައުމުގެ 175،000 އަށްވުރެ ގިނަ މީހުންނަށް ނޭވާލާ ނިޒާމުގެ ބަލިތައް ޖެހިފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފި އެވެ.
ބަލިޖެހުނު މީހުންގެ ތެރެއިން 40،000 އަށްވުރެ ގިނަ ކޭސް ރިޕޯޓްކޮށްފައިވަނީ ތުއްތު ކުދިންގެ މެދުގަ އެވެ. މީގެ ތެރޭގައި އާދައިގެ ކެއްސުމުން ފެށިގެން ބްރޮންކައިޓިސް އަދި ނިއުމޯނިއާ ފަދަ ނޭވާލާ ނިޒާމުގެ ސީރިއަސް ބަލިތައް ހިމެނެ އެވެ.
ޖަންގަލިތަކުގައި ރޯވެފައިވާ އަލިފާނުގެ ސަބަބުން އުފެދިފައިވާ ވިހަ ދުމުގެ އަސަރު އިންޑޮނޭޝިއާގެ ބައެއް ސަރަހައްދުތަކުގެ އިތުރުން އަވަށްޓެރި މެލޭޝިއާ އާއި ސިންގަޕޫރަށް ވެސް ވަނީ ކޮށްފަ އެވެ. މީގެ ސަބަބުން އެ ސަރަހައްދުތަކުގެ ވައިގެ ފެންވަރު ވަނީ ސިއްހަތަށް ނުރައްކާވާ މިންވަރަށް ދަށަށް ގޮސްފަ އެވެ.
އިންޑޮނޭޝިއާގެ ކަމާބެހޭ އިދާރާތަކުން ބުނާ ގޮތުގައި، ބޯނިއޯ އަދި ސުމަޓްރާގެ ރަށްތަކުގައި ރޯވެފައިވާ އަލިފާންގަނޑުތައް ނިއްވާލުމަށް 54،000 އަށްވުރެ ގިނަ އޮފިޝަލުންނާއި ގިނަ އަދަދެއްގެ ޖެޓްތައް ބޭނުންކޮށްގެން ފެން ޖެހުމުގެ މަސައްކަތް ދަނީ ކުރަމުންނެވެ. ނަމަވެސް، އެ ސަރަހައްދުގެ ބޮޑުމިނާއި ކަޅުކުލައިގެ މަޑު ފަސްގަނޑު ނުވަތަ "ޕީޓްލޭންޑް" ގެ ހާލަތު ހުރިގޮތުން އަލިފާން ނިއްވާލުމަށް ބޮޑެތި ގޮންޖެހުންތަކެއް ވަނީ ކުރިމަތިވެފަ އެވެ.
އިންޑޮނޭޝިއާގެ ކެބިނެޓް ސެކްރެޓަރީ ޓެޑީ އިންދްރާ ވިޖާޔާ ހޯމަ ދުވަހު ވިދާޅުވީ، ވައިގެ މަގުންނާއި އެއްގަމު މަގުން ހުރިހާ ބާރުތަކެއް ބޭނުންކޮށްގެން އަލިފާން ނިއްވުމުގެ މަސައްކަތް މެދުނުކެނޑި ކުރިއަށްދާ ކަމަށެވެ.
އޭނާ އިތުރަށް ވިދާޅުވީ، އަލިފާންގަނޑުތައް ނިއްވާލުމަށާއި، ދުމުގެ ސަބަބުން ކުރާ އަސަރު ކުޑަކުރުމަށް ހުރިހާ މަސައްކަތެއް ކުރަމުންދާ ކަމަށެވެ. އަދި އެންމެ މުހިންމު އިސްކަމެއް ދެނީ ޖަންގަލިތަކާއި ބިންތަކުގައި ރޯވާ އަލިފާނުގެ ނުރައްކަލުން އާންމު ރައްޔިތުން ރައްކާތެރިކުރުމަށް ކަމަށް ވެސް ވިދާޅުވި އެވެ.
އާންމު ގޮތެއްގައި ކޮންމެ އަހަރެއްގެ ޖުލައި މަހުން ފެށިގެން އޮކްޓޯބަރު މަހުގެ ނިޔަލަށް އިންޑޮނޭޝިއާއަށް ކުރިމަތިވާ ހޫނު މޫސުމުގައި ޖަންގަލީގެ އަލިފާނުގެ ހާދިސާތަކާ އެ ގައުމުން ގަވާއިދުން ކުރިމަތިލާން ޖެހެ އެވެ.
ނަމަވެސް، މި އަހަރު "ގޮޑްޒިލާ" އެލް ނީނޯގެ ސަބަބުން މޫސުން އާދަޔާ ހިލާފަށް ހޫނުވެ، ބިންތައް ހިކިފައިވުމުގެ ސަބަބުން، އަލިފާން ރޯވުމާއި ދުމުގެ އަސަރު ވަނީ ކުރީ އަހަރުތަކަށްވުރެ ބޮޑަށް އިތުރުވެފަ އެވެ.
