ސިންގަޕޫރު ކައިރިން 229 މީޓަރުގެ ބޮޑު މުދާ އުފުލާ ބޯޓެއް، ޗައިނާގެ މަސްބޯޓެއްގައި ޖެހި ހިނގި ނުރައްކާތެރި އެކްސިޑެންޓެއްގެ މަންޒަރުތައް ފެންނަ ވީޑިއޯއެއް އާންމުވެ، ގިނަ ބައެއްގެ ސަމާލުކަމަށް ލިބިއްޖެ އެވެ.
ބެލެވޭ ގޮތުގައި މި ހާދިސާ ހިނގާފައިވަނީ މިދިޔަ ބުރާސްފަތި ދުވަހު، ސެޕްޓެމްބަރު 17 ގައެވެ.
މެރިޓައިމް އެގްޒެކެޓިވް އިން ރިޕޯޓްކޮށްފައިވާ ގޮތުގައި، ޕެނަމާގެ ދިދަ ޖަހާފައިވާ "ފަސްޓް މާގޯ" ނަމަކަށް ކިޔާ ބޯޓާއި، ދިގުމިނުގައި 49 މީޓަރު ހުންނަ ޗައިނާގެ "ލޫކިން ޔުއާންޔޫ 108" މަސްބޯޓު ސިންގަޕޫރުގެ ބަނދަރުން ފުރާފައިވަނީ ދާދި އެއް ވަގުތެއްގަ އެވެ.
ޕޯލް ސްޓާ ގްލޯބަލްގެ އޭއައިއެސް ޝިޕް-ޓްރެކިން މައުލޫމާތުތަކާ ހަވާލާދީ އެ ނޫހުން ބުނި ގޮތުގައި، މި ދެ އުޅަނދުވެސް ދަތުރުކުރަމުން ދިޔައީ ސިންގަޕޫރު ކަނޑުއޮޅީގެ ތެރޭގައި އުޅަނދުފަހަރު ދަތުރުކުރުމަށް ހާއްސަކޮށްފައިވާ "ޓްރެފިކް ސެޕަރޭޝަން ސްކީމް" ގެ ތެރެއިންނެވެ.
މަސްބޯޓުގައި ތިބި މީހުން ކަމަށް ބެލެވޭ ބަޔަކު ނަގާފައިވާ ވީޑިއޯއިން ފެންނަ ގޮތުގައި، މުދާ އުފުލާ ބޮޑު ބޯޓު މަޑުމަޑުން އައިސް މަސްބޯޓުގައި ޖެހެ އެވެ. ބޯޓު ޖެހުމާއެކު މަސްބޯޓު އެއްފަރާތަކަށް ވަރަށް ބޮޑަށް އަރި އަޅާލައި، ބޯޓުގެ ޑެކް މައްޗަށް ރާޅުތައް އަރައިގެންދާ މަންޒަރު ފެނެ އެވެ. އަދި ބޯޓުގައި ތިބި މީހުން ސަލާމަތްވުމަށްޓަކައި އެކި ތަންތަނުގައި ހިފަހައްޓައިގެން ތިބި މަންޒަރު ފެނުމަށްފަހު، ކުޑަވަގުތުކޮޅެއްގެ ތެރޭގައި ވީޑިއޯ މެދުކެނޑެ އެވެ.
އުޅަނދުފަހަރު ދަތުރުކުރާ މަގު ދައްކައިދޭ ޓްރެކިން މައުލޫމާތުތަކުން އެނގޭ ގޮތުގައި، މި ހާދިސާއަށްފަހުވެސް މަސްބޯޓު އަޑިއަކަށް ނުދެ އެވެ. މެރިޓައިމް އެގްޒެކެޓިވް އިން ބުނި ގޮތުގައި އެ ބޯޓުގެ އޭއައިއެސް ސިގްނަލް މެދުނުކެނޑި ލިބެމުންދިޔަ ކަމަށާއި، ބޯޓު މިހާރު ކައިރީގައި އޮތް ބަނދަރަކަށް ގާތްކޮށްފައިވާ ކަމަށް ބެލެވޭ ކަމަށެވެ.
މި ހާދިސާގައި އެއްވެސް މީހަކަށް އަނިޔާއެއްވި ކަމުގެ ނުވަތަ މީހަކު މަރުވި ކަމުގެ ރިޕޯޓެއް މިހާތަނަށް ލިބިފައެއް ނުވެ އެވެ. ކަމާބެހޭ އިދާރާތަކުން މި ހާދިސާއާ ގުޅޭ ރަސްމީ މައުލޫމާތެއް އަދި ހާމަކޮށްފައި ނުވާއިރު، ދެ އުޅަނދު ޖެހެން މެދުވެރިވި ސަބަބެއް ކަށަވަރެއް ނުވެ އެވެ.
