ސިންގަޕޫރުގެ ބަސްތަކުގައި ދަތުރުކުރާއިރު ގޮނޑިމައްޗަށް ފައި އެރުވުމާއި، ބާރަށް ލަވަ ނުވަތަ އޯޑިއޯ ޖެހުމާއި، ކެއިންބުއިމުގެ އިތުރުން ކުނި އެޅުން ފަދަ އަމަލުތައް ކުރާ ފަރާތްތައް 500 ސިންގަޕޫރު ޑޮލަރު (391 އެމެރިކާ ޑޮލަރު) އާ ހަމައަށް ޖޫރިމަނާ ކުރަން ފަށައިފި އެވެ.
މީގެ އިތުރުން، ބަސް ޓާމިނަލްތަކުގައި އެހެން ފަސިންޖަރުންނަށް އުނދަގޫވާ ފަދަ ކަންކަން ކުރުމާއި، ނުރައްކަލަށް ހުށަހެޅުމާއި، ބަހެއްގެ ނުވަތަ ބަސް ޓާމިނަލެއްގެ އެއްވެސް ތަނެއް ހަޑިކުރުން ފަދަ ސީރިއަސް ކުށްތަކަށް 5،000 ސިންގަޕޫރު ޑޮލަރާ ހަމައަށް ޖޫރިމަނާ ކުރެވޭނެ އެވެ.
ސިންގަޕޫރުގެ ލޭންޑް ޓްރާންސްޕޯޓް އޮތޯރިޓީ (އެލް.ޓީ.އޭ) އިން ނެރުނު ނޫސްބަޔާނެއްގައި ބުނެފައިވަނީ، މި ފިޔަވަޅުތަކުގެ ސަބަބުން އާންމު ދަތުރުފަތުރުގެ ނިޒާމަކީ އެންމެންނަށް ވެސް ރައްކާތެރި، އަދި އެކަކު އަނެކަކަށް އިހުތިރާމްކުރާ ހިތްފަސޭހަ މާހައުލަކަށް ވެގެންދާނެ ކަމަށެވެ.
މިދިޔަ ހޯމަ ދުވަހު އިއުލާންކުރި މި އާ ގަވާއިދުތަކަކީ ސިންގަޕޫރުގެ ރޭލު ނިޒާމު ނުވަތަ މާސް ރެޕިޑް ޓްރާންސިޓް (އެމް.އާރް.ޓީ) ގައި މިހާރު ވެސް އަމަލުކުރަމުންދާ އުސޫލުތަކާ އެއްގޮތަށް އެކުލަވާލާފައިވާ ގަވާއިދުތަކެކެވެ.
މީގެ ކުރިން އެމް.އާރް.ޓީ ރޭލުތަކުގައި ކެއިންބުއިން ފަދަ ކަންކަން ކުރާ ފަރާތްތަކަށް އަދަބު ދެމުންދިޔަ ނަމަވެސް، ބަސްތަކުގައި މިފަދަ ކަންކަން ކޮންޓްރޯލް ކުރަމުން އައީ ބަސް ކުންފުނިތަކުގެ އަމިއްލަ ސިޔާސަތުތަކުގެ ދަށުންނެވެ. އެގޮތުން، އުނދަގޫވާ ގޮތަށް އަމަލުކުރާ ފަސިންޖަރުން ބަހުން ބޭލުމުގެ އިހުތިޔާރު ބަސް ދުއްވާ މީހުންނަށް އޮވެ އެވެ.
ނަމަވެސް، އަލަށް ގެނައި ބަދަލާއެކު މިފަދަ އުނދަގޫވާ އަމަލުތަކަކީ ގާނޫނީ ކުށްތަކެއްގެ ގޮތުގައި ކަނޑައަޅައި، ވަގުތުން ޖޫރިމަނާ ކުރެވޭނެ ގޮތް މިހާރު ވަނީ ހަމަޖައްސާފަ އެވެ.
އެލް.ޓީ.އޭ އިން ބުނި ގޮތުގައި، ކުށްކުރާ ކަމަށް ތުހުމަތުކުރެވޭ ފަސިންޖަރުންނަށް ރަސްމީ ނޯޓިސް ދޫކުރުމުގެ ބާރު، ޓިކެޓް އިންސްޕެކްޓަރުންނާއި ބަސް ޓާމިނަލްތަކުގެ މުވައްޒަފުން ފަދަ ހުއްދަ ދެވިފައިވާ ފަރާތްތަކަށް އޮންނާނެ އެވެ.
ބަސް ދުއްވާ މީހުން ނުވަތަ ސިންގަޕޫރުގައި ކިޔާ ގޮތުން ނަމަ "ބަސް ކެޕްޓަނުން" ނަށް މި ބާރު ދީފައެއް ނުވެ އެވެ. އެއީ އެމީހުންގެ މައިގަނޑު މަސްއޫލިއްޔަތު ކަމަށްވާ ބަސް ރައްކާތެރިކަމާއެކު ދުއްވުމަށް އިސްކަންދިނުމުގެ ގޮތުންނެވެ. އެހެން ނަމަވެސް، އުނދަގޫވާ ގޮތަށް އަމަލުކުރާ ފަސިންޖަރުންނަށް އެކަން ހުއްޓާލުމަށް އެންގުމުގެ ބާރު އެމީހުންނަށް އޮންނާނެ އެވެ. އަދި އެކަމަށް އެއްބާރުލުން ނުދޭ ފަރާތްތައް ބަހުން ބޭލުމާއި، ހާލަތު ގޯސްވެއްޖެ ނަމަ ފުލުހުންގެ އެހީތެރިކަން ހޯދުމުގެ އިހުތިޔާރު ބަސް ދުއްވާ މީހުންނަށް ލިބިގެންވެ އެވެ.
އާންމު ދަތުރުފަތުރުގެ ނިޒާމު އަމާން ތަނަކަށް ހެދުމަށް މަސައްކަތް ކުރަނީ ހަމައެކަނި ސިންގަޕޫރަކުން ނޫނެވެ. ދުނިޔޭގެ އެކި ސިޓީތަކުގެ ދަތުރުފަތުރުގެ ނިޒާމުތައް ފުޅާވަމުންދާއިރު، ހުރިހާ ފަސިންޖަރުންނަށް ހިތްފަސޭހަ ދަތުރެއް ކަށަވަރުކޮށްދިނުމަށްޓަކައި ނޭދެވޭ އަމަލުތައް ހުއްޓުވުމަށް ގިނަ ގައުމުތަކަކުން ދަނީ ހަރުކަށި ފިޔަވަޅުތައް އަޅަމުންނެވެ.
