ފާއިތުވީ ފަސް އަހަރު ތެރޭގައި އެންމެ ގިނައިން ރާއްޖެއިން ޑީޕޯޓު ކުރީ ބަންގްލަދޭޝްގެ މީހުން ކަމަށް އިމިގްރޭޝަންގެ ތަފާސްހިސާބުތަކުން ދައްކައިފި އެވެ.
މޯލްޑިވްސް އިިމިގްރޭޝަނުން މި ނޫހާ ހިއްސާކުރި ތަފާސްހިސާބުތަކަށް ބަލާއިރު، 2017 ވަނަ އަހަރުން ފެށިގެން މި އަހަރުގެ އޭޕްރިލް މަހުގެ ނިޔަލަށް ޖުމްލަ 2221 ބިދޭސީން ވަނީ ޑީޕޯޓުކޮށްފަ އެވެ.
ޑީޕޯޓު ކުރި ބިދޭސީންގެ ތެރެއިން އެންމެ ގިނައީ ބަންގްލަދޭޝްގެ މީހުންނެވެ. އެ ގައުމުން 1766 މީހަކު އަނބުރާ ގައުމަށް ފޮނުވާލާފައިވާއިރު، މިއީ މި މުއްދަތުގައި ޑީޕޯޓު ކުރި މީހުންގެ 79.5 ޕަސެންޓު މީހުންނެވެ.
ދެން އެންމެ ގިނަ މީހުން ޑީޕޯޓް ކޮށްފައިވަނީ އަވަށްޓެރި ސްރީލަންކާގެ ރައްޔިތުންނެވެ. އެ ގައުމުގެ 184 މީހަކު ވަނީ ފާއިތުވި ފަސް އަހަރުގެ ތެރޭގައި ޑީޕޯޓް ކޮށްފަ އެވެ.
އޭގެ އިތުރުން، އިންޑިއާގެ 98 މީހަކު، އިރާނުން 30 މީހުން ޕާކިސްތާނުގެ 23 މީހުންގެ އިތުރުން ނޭޕާލްގެ 11 މީހަކު ވެސް އެ މުއްދަތުގައި އަނބުރާ ގައުމަށް ފޮނުވާލާފައިވެ އެވެ.
އިމިގްރޭޝަނުން މީގެ ކުރިން ރައްޔިތުންގެ މަޖިލީހުގެ ކޮމިޓީއެއްގައި ހިއްސާކުރި ގޮތުގައި މިއަހަރުގެ ފުރަތަމަ ދެ މަހުގެ ތެރޭގައި، ކަޅު ބާޒާރުގައި ޑޮލަރު ވިއްކާ 11 ބިދޭސީއަކު ޑީޕޯޓުކޮށްލާފައިވެ އެވެ. އަދި، މިދިޔަ އަހަރު ތެރޭގައި ހަށިވިއްކުމުގެ ވިޔަފާރީގައި އުޅޭ 46 ބިދޭސީއަކު ވެސް އަނބުރާ ގައުމަށް ފޮނުވާލާފައިވެ އެވެ.
