ރާއްޖޭގައި މަސައްކަތްކުރާ ބިދޭސީން ގެނައުމުގެ ކަންކަން ކުރުމަށް އިކޮނޮމިކް މިނިސްޓްރީން ފަރުމާކޮށްފައިވާ އެކްސްޕެޓް ޕޯޓަލް ނަކަލުކޮށްގެން ހިންގަމުންދާތީ، އެކަމަށް ސަމާލުވާން އިލްތިމާސްކޮށްފި އެވެ.
އެ މިނިސްޓްރީން ނެރުނު ބަޔާނެއްގައި ބުނީ އެކްސްޕެޓް ޕޯޓަލް ނަކަލުކޮށްގެން ހިންގާ ވެބްސައިޓުތަކަކީ އާންމުކޮށް އެ ބޭނުންކުރާ ފަރާތްތަކުގެ ޒާތީ މައުލޫމާތު ހޯދައިގެން، އޭގެ ބޭނުން ނަހަމަ ގޮތުގައި ހިފުމަށް ފަރުމާކުރާ ސައިޓުތައް ކަމަށެވެ.
އެގޮތަށް ނަކަލުކޮށްފައިވާކަން މިހާތަނަށް ފާހަގަވެފައިވާ ހަ ވެބްސައިޓެއް އެ ބަޔާނުގައި މިނިސްޓްރީން ވަނީ ފާހަގަކޮށްދީފަ އެވެ.
އެހެންކަމުން ރާއްޖޭގައި މަސައްކަތްކުރާ ބިދޭސީން ގެނައުމުގެ ކަންކަން ކުރުމަށް މިނިސްޓްރީގެ ޕޯޓަލް ބޭނުންކުރާ ހުރިހާ ފަރާތްތައް ވެސް މިކަމަށް ސަމާލުވުމަށް އެ ބަޔާނުގައި ވަނީ އިލްތިމާސްކޮށްފަ އެވެ.
މިގޮތުން، އޮންލައިން ހިދުމަތް ހޯދާއިރު، ހުރިހާ ވަގުތެއްގައި ވެސް ރަނގަޅު ޕޯޓަލްކަން ޔަގީން ކުރުމަށާއި، އެހެން ޕޯޓަލްއަކަށް އެއްވެސް މައުލޫމާތެއް ނުދިނުމަށް މިނިސްޓްރީން ވަނީ އެދިފަ އެވެ.
އަދި މިނިސްޓްރީގެ ރަސްމީ ޕޯޓަލް ނޫން އެހެން ވެބްސައިޓަކަށް ލޮގްއިން ކުރެވިފައިވާކަން ޝައްކު ކުރެވޭނަމަ، އަވަހަށް ޕާސްވާޑް ރީސެޓް ކުރުމަށް ވެސް އެ ބަޔާނުގައި އެދިފައިވެ އެވެ.
މަކަރުން ފައިސާ ހޯދުން އާންމުވެއްޖެ
އޮޅުވާލައިގެން ހޯދާ ޒާތީ މައުލޫމާތު ބޭނުންކޮށްގެން ފައިސާ ހޯދާ މައްސަލަތައް މިހާރު ވަނީ ވަރަށް ބޮޑަށް އިތުރުވެފަ އެވެ.
ބޭންކުތަކުގެ ނަމުގައި ގުޅައިގެން ފައިސާ ޓްރާންސްފާ ކުރުވުމާއި، ފްލެޓު ދޭނެ ކަމަށް ބުނެ ފައިސާ ހޯދާ މައްސަލަތަކެއް ވެސް ދޭތެރެއަކުން ފެންމަތިވެ އެވެ.
މިފަހުން ކުންފުނިތަކުގެ ނަމުގައި ގުޅައިގެން ޕްރޮމޯޝަނެއްފައިސާ ހޯދާ މައްސަލަތަކެއް ފެންމަތިވެ، އެކަމަށް ސަމާލުވާން ވަނީ އެދިފަ އެވެ.
