އަންނަ އޮގަސްޓްމަހު ހުޅުމާލޭގައި ބާއްވަން ތައްޔާރުވަމުން އަންނަ ޕެއިންޓްބޯލް ޓޯނަމަންޓުގައި ބައިވެރިވާން ބާކީ އެއް ދުވަހަށް ވެއްޖެ އެވެ.
ޔުނިކްސް ސްޕޯޓިން އިން އިންތިޒާމުކުރާ މި ޕެއިންޓްބޯލް މުބާރާތް ބާއްވަން އެންމެ ފުރަތަމަ ނިންމީ 2020 ވަނަ އަހަރެވެ. އެމްއެންޑީއެފް އާ ގުޅިގެން އޭރު އެ މުބާރާތް ބާއްވަން އުޅުނު ނަމަވެސް، ކޮވިޑާހެދި ކުރިއަށް ނުގެންދެވުނީ އެވެ. މިފަހަރު މި މުބާރާތް ބާއްވަން ތައްޔާރުވަމުން ދަނީ ޔުނިކްސް ސްޕޯޓިންގެ ހޯސްޓިން ޕާޓްނާ، އެޗްޑީސީއާ ގުޅިގެންނެވެ.
ޕެއިންޓްބޯލް މުބާރާތާ ބެހޭ މައުލޫމާތު ހިއްސާ ކުރަމުން ޔުނިކްސް ސްޕޯޓްސްގެ ފަރާތުން ރޭޝަން ޝަރީފް "އަދަދު"އަށް ވިދާޅުވީ ޕެއިންޓްބޯލް މުބާރަތް ބާއްވަން ހަމަޖެހިފައި ވަނީ ހުޅުމާލޭގައި ކަމަށާއި، ބާއްވާނެ ވަކިތަނެއް އަދި ފައިނަލް ކުރެވިފައި ނުވާ ކަމަށެވެ.
ހުޅުމާލޭގެ ހުސް ބިމެއްގައި ވަގުތީ ގޮތުން ތައްޔާރު ކުރެވޭ ޕެއިންޓްބޯލް އެރީނާއެއްގައި މި މުބާރަތް އޮންނާނީ
ރޭޝަން ޝަރީފް ވިދާޅުވީ، މި މުބާރާތުގައި އުމުރުން 16 އަހަރުން މަތީގެ ކޮންމެ މީހަކަށް ވެސް ބައިވެރިވެވޭނެ ކަމަށެވެ. އޭނާ ވިދާޅުވީ، މުބާރާތުގައި ބައިވެރިވުމުގެ ފުރުސަތު މިމަހު ފަސް ވަނަ ދުވަހާ ހަމައަށް ހުޅުވާލާފައިވާ ކަމަށެވެ.
މުބާރާތުގައި ބައިވެރިވާން ބޭނުންވާ ފަރާތްތަކުން އެކަމަށް ހާއްސަ ލިންކު މެދުވެރިކޮށް، ފޯމު ހުށަހެޅުމުން ރަޖިސްޓާ ކުރެވޭނެ އެވެ. އެންމެ ފުރަތަމަ އަންނަ 24 ޓީމަކަށް ފުރުސަތު ދޭ ގޮތަށް މި މުބާރާތުގައި ބައިވެވޭނީ ފަސް މެންބަރުންގެ ޓީމުތަކަށެވެ. ކޮންމެ ޓީމަކަށް ރަޖިސްޓްރޭޝަން ފީގެ ގޮތުގައި 2000 ރުފިޔާ ދައްކަން ޖެހެ އެވެ.
ރެކްރިއޭޝަނަލް އާއި ކުޅިވަރުތައް އިންތިޒާމުކުރާ ޔުނިކްސް ސްޕޯޓިން ވަނީ ދާދިފަހުން ވަރަށް ފޯރިގަދަ ފައިގަތަޅާ މުބާރާތެއް ބާއްވާފަ އެވެ. އެ ކުންފުނިން ދަނީ ކުރިއަށް އޮތް އަޟްހާ އީދާ ދިމާކޮށް ސޮނީ ހާޑްވެއާއާ "ކަނޑުފޯރި" ކިޔާ އެޕްލިކޭޝަނެއް ތައާރަފް ކުރުމަށް ވެސް ރާވާފަ އެވެ. ކަނޑުފޯރިއަކީ އޮންލައިންކޮށް، ރާއްޖޭގެ ކޮންމެ ތަނެއްގައި ހުރެގެން ވެސް ބައިވެރިވެވޭ މަސްރޭހެކެވެ.
ޕެއިންޓްބޯލް މުބާރާތަކީ ވެސް ޔުނިކްސް ސްޕޯޓިންގެ މިއަހަރުގެ ކަލަންޑަރުގެ ތެރޭގައި ހިމެނޭ ކުޅިވަރެކެވެ.
