ބައިނަލްއަގްވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތް ކުރިއަށް ދަނިކޮށް އެތަނަށް ވަދެ، ހަމަނުޖެހުން ހިންގި މައްސަލާގައި އިތުރު ހަތް މީހަކު ފުލުހުން މިއަދު ހައްޔަރުކޮށްފިއެވެ.
އެ ހަތް މީހުންގެ ތެރެއިން ދެ މީހުން ހައްޔަރުކުރީ މިދިޔަ ބުރާސްފަތި ދުވަހެވެ. އަދި ފަސް މީހަކު ހައްޔަރުކޮށްފައި ވަނީ އިއްޔެ އެވެ. ބުރާސްފަތި ދުވަހު ހައްޔަރުކުރީ ކ. މާލެ، މ. ފަޅުމަތީގެ، އަހްމަދު އަލީ އާއި ކ. މާލެ، ގ. ކޮލަމްބިއާ، މުހައްމަދު ޒީޝާން ނާސިރެެވެ. އޭގެ ތެރެއިން އަހްމަދު އަލީގެ ބަންދަށް 10 ދުވަސް ޖަހާފައިވާއިރު، ޒީޝާންގެ ބަންދަށް ޖަހާފައި ވަނީ ފަސް ދުވަހެވެ.
އިއްޔެ ހައްޔަރުކުރި މީހުންގެ ތެރޭގައި ހިމެނެނީ، ނ. ވެލިދޫ، މިލާނޯ، އިބްރާހީމް ޒިހާނު އާއި އއ. މާޅޮސް، ލަކީސްޓާ، އަލީ މިރުޝާދު އާއި ލ. މުންޑޫ، އަންނާރުމާގެ، މުހައްމަދު ޝާން އާއި ކ. މާލެ، ގ. ފީނިކްސް، އަބްދުﷲ ނިޔާޒު އަދި ތ. ތިމަރަފުށި، އަލީއާބާދު، އަލީ މުހައްމަދެވެ. މި ފަސް މީހުންގެ ބަންދަށް ވެސް މިހާރު ވަނީ 45 ދުވަސް ޖަހާފައެވެ.
ޔޫތް މިނިސްޓްރީއާއި ރާއްޖޭގައި ހުންނަ އިންޑިއަން ކަލްޗަރަލް ސެންޓަރު ގުޅިގެން މިދިޔަ އަންގާރަ ދުވަހުގެ ހެނދުނު ގައުމީ ދަނޑުގައި ބޭއްވި ޔޯގާ ހަރަކާތަށް ހުރަސް އެޅި މައްސަލާގައި މިހާރު ވަނީ ޖުމްލަ 19 މީހަކު ހައްޔަރުކޮށްފަ އެވެ. އޭގެ ތެރޭގައި ހިމެނެނީ އަންގާރަ ދުވަހު ހައްޔަރު ކުރި ހަ މީހުންނާއި ބުދަ ދުވަހު ހައްޔަރުކުރި ހަ މީހުންގެ އިތުރުން ބުރާސްފަތި އަދި ހުކުރު ދުވަހު ހައްޔަރުކުރި ހަތް މީހުންނެވެ.
އަންގާރަ ދުވަހު ހައްޔަރު ކުރި މީހުންގެ ތެރޭގައި ހިމެނެނީ ކ. ތުލުސްދޫ، ވީނަސް، މުހައްމަދު ނަދީމް އާއި ކ. މާލެ، މއ. ކަނުހުރާ، މުހައްމަދު ޒިލްޔަން އާއި ކ. މާލެ، ދަފްތަރު ނަންބަރު ދރ 1105، ޝާމީ ރަޝާދު އިދްރީސް އާއި ތ. މަޑިފުށި، ހެޕީސައިޑް، މުހައްމަދު މައުސޫމްގެ އިތުރުން ހއ. ތުރާކުނު، ގްރީންހައުސް، މުހައްމަދު ހުސައިން އަދި ގދ. ރަތަފަންދޫ، ލިލީޕާކް، އަމީން އަހްމަދެވެ.
ބުދަ ދުވަހު ހައްޔަރުކުރީ ހއ. ހޯރަފުށި، ޔާގޫތުގެ، މުހައްމަދު އިސްމާއީލް އާއި ސ. ހިތަދޫ، އޯކިޑްވިލާ، އިބްރާހިމް ރައްޒާން އާއި ލ. މާމެންދޫ، ސޯސަންވިލާ، އާދަމް ނިޝާން އާއި ގއ. މާމެންދޫ، އަސްރަފީވިލާ، އަހްމަދު ނަސޫހްގެ އިތުރުން ތ. ތިމަރަފުށި، ނަރުގިސްވިލާ، އަބްދުﷲ ރިފާއު އަދި ށ. މިލަންދޫ، ނާޒް، ފަޟްލޫން މުހައްމަދެވެ.
ގަލޮޅު ދަނޑުގައި ކުރިއަށް ގެންދިޔަ ޔޯގާ ހަރަކާތަށް ހުރަސް އަޅާ، ހަމަނުޖެހުން ހިންގާފައިވަނީ ސަރުކާރުގެ އިސްވެރިންނާއި ބޭރު ގައުމުތަކުގެ ޑިޕްލޮމެޓުންނާއި ހައި ކޮމިޝަނަރުން ވެސް ތިއްބައެވެ.
