ލާމަރުކަޒީ ގާނޫނު ހިންގުމުގައި ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ކުރިމަތިވެފައިވާ ގޮންޖެހުންތައް ބަލައި އެކަމަށް ހައްލު ހޯދުމަށް އއ. އުކުޅަހުގައި މެއި 28-29 އަށް ބޭއްވި "ވިއަވަތި ރާއްޖެ" ކޮންފަރެންސް ނިމިގެން ދިޔައީ ކާމިޔާބު ކަމާއެކު އެވެ.
ރައީސުލްޖުމްހޫރިއްޔާ އާއި މިނިސްޓަރުންނާއި ދައުލަތުގެ އިދާރާތަކުގެ އިސްވެރިންނާއި ސަރުކާރުގެ ކުންފުނިތަކުގެ ވެރިންނާއި މެދުރާއްޖެތެރޭގެ ރަށްރަށުގެ ކައުންސިލްގެ ރައީސުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރައީސުން ހިމެނޭ ގޮތަށް ޖުމުލަ 172 ބައިވެރިންނާއެކު ބޭއްވި ވިއަވަތި ރާއްޖެ ކޮންފަރެންސްގައި ކައުންސިލްތަކުން ގިނަ ކަންބޮޑުވުންތަކެއް ބަންޑުންކޮށްލި އެވެ.
މިހާރު އިންތިހާބުކޮށްފައިވާ ކައުންސިލްތައް ހިންގަމުން އަންނަތާ އަހަރެއްވީއިރު، ލާމަރުކަޒީ ގާނޫނުގައި ކަނޑައަޅާފައިވާ ގޮތަށް ކައުންސިލްތަކުން ވިޔަފާރި ކުންފުނި އުފައްދައި ވިޔަފާރިކުރުމުގެ ފުރުސަތު ދީފައި ނުވާތީ އެކަމުގެ ކަންބޮޑުވުން ހިއްސާކުރި އެވެ. ކޮންފަރެންސަށް އައުމުގެ ކުރިން ސަރުކާރުން ވަނީ ކައުންސިލްތަކުން ވިޔަފާރިކުރުމުގެ ގަވާއިދު އެކުލަވާލައި ނެރެފަ އެވެ. ނަމަވެސް އެ ގަވާއިދުގެ ދަށުން ކުންފުންޏެއް ރަޖިސްޓްރީކޮށްފައި ނެތްއިރު، ކުންފުނިތައް ރަޖިސްޓްރީކުރުމުގައި ދޭންޖެހޭ ސަމާލުކަމާއި ހުއްދަ ދޭނެ ގޮތްތައް ކޮންފަރެންސްގައި އިކޮނޮމިކް މިނިސްޓަރު ފައްޔާޒު އިސްމާއީލް ހިއްސާކޮށް ދެއްވެވި އެވެ.
ކައުންސިލްތައް ހިންގުމަށް ދެވޭ ބަޖެޓް ކުޑަވުމުގެ ޝަކުވާއަށް ހައްލެއް ގެނައުމަށް ކައުންސިލްތަކުން ހުށަހެޅީ މިހާރު ދައުލަތުގެ ބަޖެޓުން ދޭ މިންވަރު އަށް ޕަސެންޓަށް އިތުރުކޮށް، ކައުންސިލްތަކަށް ފައިސާ ދޫކުރާ ފޯމިއުލާއަށް ބަދަލު ގެނައުމަށެވެ. އަދި އިންވެސްޓްމެންޓް ފަންޑެއް އެކުލަވާލެއްވުމަށް ވެސް ކައުންސިލަރުން އެދިފައިވެ އެވެ. އޭގެ އިތުރުން މާލޭގައި ހުންނަ އަތޮޅު ފިހާރަތަކުގެ ކުލި, އަތޮޅު ކައުންސިލްތަކަށް އެއްކޮށް ލިބޭނެ ގޮތް ހެދުމަށް ވެސް ހުށަހެޅި އެވެ.
އަތޮޅު ފިހާރަތަކުގެ ކުލި އެއްކޮށް ކައުންސިލްތަކަށް ދޭން ނިންމަވާފައިވާކަން ރައީސް ސޯލިހު އިއުލާނު ކުރެއްވީ ވިއަވަތި ކޮންފަރެންސްގަ އެވެ. އޭގެއިތުރުން ކުނި މެނޭޖްކުރުމުގެ މަސައްކަތްތަކަށް ގްރީން ޓެކްސްއިން ބައެއް ދިނުމަށް ވެސް ސަރުކާރުން ނިންމާފައިވާކަން ކޮންފަރެންސްގައި ވަނީ ހާމަކޮށްފަ އެވެ.
މާލީ ދަތިކަމުގެ އިތުރުން ކައުންސިލްތައް ހިންގުމަށާއި ރަށުގައި ކުރަންޖެހޭ ކަންކަމަށް ބުރޫއަރާފައި ވަނީ ގާނޫނުގައި ލާޒިމުކުރާ ލޭންޑްޔޫސް ޕްލޭން ނުވަތަ ބިނާވެެށި ޕްލޭން ނުނިމިގެންނާއި އެ ނިންމުމަށް ފަހު ވެސް ފާސް ނުވެގެންނެވެ. އެ ދަތިތައް ފިލުވަން ގާނޫނު އިސްލާހު ކުރަން ޖެހޭ ކަމަށް ރައީސް ސޯލިހު، ވިިއަވަތި ކޮންފަރެންސްގައި ވިދާޅުވި އެވެ.
ނިމިދިޔަ ހަފުތާގައި ފާހަގަކޮށްލެވޭ މުހިންމު ދާއިރާތަކުގެ ތެރޭގައި ދުނިޔޭގެ ބާޒާރުގައި ހާއްސަކޮށް ތެލާއި ކާބޯތަކެތީގެ އަގު ބޮޑުވަމުން ދިޔުމުގެ އަސަރު ރާއްޖެއަށް ކުރިމަތިވުން ފާހަގަ ކުރެވެ އެވެ. ރާއްޖޭގައި ވެސް ތެލުގެ އަގު މަތީގައި ހުރިއިރު ކާބޯތަކެތީގެ ބައެެއް ބާވަތްތަކުގެ އަގުވެސް ވަނީ އުފުލިފަ އެވެ. މިދިޔަ ހަފުތާގައި އެންމެ ބޮޑު ފާހަގަކޮށްލެވެނީ މަސްދަޅުގެ އަގު ބޮޑުކުރުމާއި ކުކިން އޮއިލްގެ އަގު ބޮޑުވުމެވެ.
ދަތިތައް ހުރި ނަމަވެސް ރާއްޖޭ އިގްތިސޯދުގެ ދުވެލި މިވަގުތު ދަނީ ރަނގަޅު މިސްރާބަކަށް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި އެވެ.
"ވިއަވަތި ރާއްޖެ" ކޮންފަރެންސް ނިމުމުގެ ރަސްމިއްޔާތުގައި ރައީސް ވިދާޅުވީ ދުނިޔެއަށް ކުރިމަތިވާ ކޮންމެ ހާދިސާއެއް އަދި ބަލިމަޑުކަމެއްގެ އަސަރު ވެސް އެންމެ ބޮޑަށް ކުރާ ގައުމަކީ ރާއްޖެ ކަމަށެވެ. މިފަދަ އެތައް ކަމެއްގެ ސަބަބުން ރާއްޖޭގެ އިގްތިސޯދަށް ވެސް އޭގެ ނޭދެވޭ އަސަރުކޮށް، ގިނަ ގޮންޖެހުންތަކާ ކުރިމަތިލާން ޖެހޭ ކަން ރައީސް ފާހަގަކުރެއްވި އެވެ.
"މި ހުރިހާ ކަމެއްގެ ތެރޭގައި އަޅުގަނޑުމެން ކުރިއަށް ދާން މި ޖެހެނީ. އިރާދަކުރެއްވިއްޔާ އެހެންނަމަވެސް އަޅުގަނޑުމެންގެ އިގްތިސޯދު ދުވެލި ހުރީ ރަނގަޅު ދިމާލަށް. ހަރަދުތައް ބޮޑުވުމާއެކީގައި ގެންނަން ޖެހޭ ބަދަލުތައް ޕްރޮޖެކްޓުތައް ގެނެސް، ރަނގަޅު މިސްރާބަށް ކުރިއަށް ގެންދާނަން،" އެމަނިކުފާނު ވިދާޅުވި އެވެ.
ދުނިޔޭގެ ބާޒާރަށާއި އެހެން ގައުމުތަކުގެ މާލީ ހާލަތުގެ ސަބަބުން ރާއްޖެއަށް ވެސް އަސަރު ކުރާ ކަމަކީ ގަބޫލުކުރަން ޖެހޭ ހަގީގަތެއް ކަމަށް ރައީސް ވިދާޅުވި އެވެ. އަދި ރާއްޖެއާ "ނުބެހޭ ކަންކަމުގެ އަސަރު ވެސް" ރާއްޖެއަށް ފޯރާ ކަމަށް ރައީސް ވިދާޅުވި އެވެ.
ދުނިޔޭގެ ބާޒާރުގައި ހާއްސަކޮށް ތެލާއި ކާބޯތަކެތީގެ އަގު ބޮޑުވަމުން ދިޔުމުގެ އަސަރު ރާއްޖެއަށް ވެސް ކޮށް، އެކަމާ ގުޅިގެން ދައުލަތުގެ ބަޖެޓަށް ފިއްތުންތައް ކުރިމަތިވި ނަމަވެސް، ދައުލަތުގެ ދަރަނި އަދާކުރުމުގައި އެއްވެސް ކަހަލަ ދަތިކަމެއް ދިމާނުވާނެ ކަމުގެ ޔަގީންކަން ވެސް ފިނޭންސް މިނިސްޓަރު އިބްރާހިމް އަމީރު ދެއްވާފައިވެ އެވެ. ނަމަވެސް ދަތިތައް މިހެން ހުރުމާއެކު ތަރައްގީގެ މަޝްރޫއުތައް ހިންގުމުގައި އިސްކަން ދޭނެ ތަރުތީބަށް ބަދަލު ގެނެސް، ދައުލަތުގެ ހަރަދުތައް ކުޑަކުރުރަމަށް މަސައްކަތް ކުރަމުން އަންނަ ކަމަށް ރައީސް ސޯލިހު ވިދާޅުވެފައިވެ އެވެ.
މުހިންމު ހަބަރުތައް
- ކުލީގެ 34 މިލިއަން ދޫކޮށް، އަތޮޅު ފިހާރަތަކުގެ ކުލި އެއްކޮށް ކައުންސިލްތަކަށް ދޭން ނިންމައިފި
ބީއެމްއެލް ޕީއޯއެސް ބޭނުންކޮށްގެން ކައުންސިލްތަކަށް ފައިސާ ދެއްކޭ ގޮތް ހަދައިފި
- ރައީސްގެ ވިއަވަތި ތަސައްވަރު: "ބާއްޖަވެރި، ފުދުންތެރި ރަށްތަކެއް، އިޖުތިމާއީ ހިތްފަސޭހަކަން މާލެއަށް"
- ސިންގަލް ޔޫސް ޕްލާސްޓިކް އުފެއްދުމާއި އެތެރެކުރުން މިހާރު މަނާ ވާނެ
- އައްޑޫ މާރާމާރީގައި އަނިޔާވި ޒުވާނަކު މަރުވެއްޖެ
- އިހަވަންދިއްޕޮޅުގައި އެސްޓީއޯއިން ތެޔޮ ސްޓޯރޭޖެއް އަޅަނީ
- އެމްޑީޕީގެ ކޮންގްރެސް އޮގަސްޓް 19 ގައި، ބައިވެރިކުރާނީ އީސީގެ ދަފްތަރަށް ބަލައިގެން
ހަފްތާގެ ހޮވާލެވޭ ލިޔުންތައް
- ޓޫރިޒަމްގެ ބޭނުންތަކަށް ދޫކޮށްފައިވާ ރަށްރަށާއި، ފަޅުފަޅާއި، ބިންބިމުގެ ކުލި ކުޑަކުރަން ސަރުކާރުން ހުށަހެޅި އިސްލާހު އެގޮތަށް ފާސްވިނަމަ ނ. އަތޮޅުން ފެށިގެން ގދ. އަތޮޅާ ހަމައަށް، 17 އަތޮޅެއްގައި ހިންގަމުން އައި ރިސޯޓުތަކާއި، މެރީނާތަކާއި، ހޮޓާތަކުގެ ކުލި ކުޑަވެގެންދާނެ ގޮތަށް، ސަރުކާރުން އިސްވެ ޓޫރިޒަމް ގާނޫނު އިސްލާހުކުރަން އުޅުމުން އުފެދުނު ކަންބޮޑުވުމާއި އެކަމުން ދައުލަތަށް ލިބޭނެ ގެއްލުން އަމަން ހަލީމްގެ މި ރިޕޯޓުގައި ގެނެސްދީފައިވެ އެވެ.
- ލޭންޑްޔޫސް ޕްލޭން ހެދުމުގައި ދަތިތަކާއި ޝަކުވާތައް ބޮޑުވެފައި އޮތް ދަނޑިވަޅެއްގައި ނިމިގެންދިޔަ "ވިއަވަތި ރާއްޖެ" ކޮންފަރެންސްގައި ޕްލޭނިން މިނިސްޓަރު މުހައްމަދު އަސްލަމް ހުށަހެޅުއްވި "ޑްރޯން"ގެ ހައްލުގެ ވާހަކަ އާއި މިނިސްޓަރަށް ކުރިމަތިވި ފާޑުކިޔުންތައް ނާޒިމް ހަސަން މި ލިޔުމުގައި ގެނެސްދީފައިވެ އެވެ.
- "ރާއްޖެއާ ނުބެހޭ" ދުނިޔޭގެ އިގުތިސޯދަށް ކުރިމަތިވެފައިވާ ދަތިތަކުގެ އަސަރު ރާއްޖެއަށް ވެސް ފޯރާނޭ ކަމަށް ރައީސް އިބްރާހިމް މުހައްމަދު ސޯލިހާއި އެމަނިކުފާނުގެ މާލީ ވަޒީރު އިބްރާހިމް އަމީރު ވިދާޅުވެފައިވާއިރު ތެލުގެ ސަބްސިޑީ ބޮޑުވެފައިވާ ކަމަށް އެ ބޭފުޅުން ވެސް ވިދާޅުވެ އެވެ. މުހައްމަދު ވިޝާމްގެ މި ލިޔުމުގައި ސަބްސިޑީ ދިނުމުގެ ކަންބޮޑުވުމާއި ހައްލު ބުނެދީފައިވެ އެވެ.
- ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުން ބާރު ލިބިގެން ހަދާފައިވާ ކުނިމެނޭޖްކުރުމާބެހޭ ގަވާއިދަށް ގެނެވުނު ފަސް ވަނަ އިސްލާހު ލާޒިމުކޮށްފައި ވަނީ ޖޫން 1 އިން ފެށިގެން ގޭބިސީ ތަކުގައި އުފެދޭ ކުނި އުކާލަން ހަވާލުކުރުމުގެ ކުރިން، ތިން ބާވަތަކަށް ކުނި ވަކިކުރުމަށެވެ. މިކަމަށް ދީނީ ނަޒަރަކުން ރޫޙުލްއަމީން ޢަބްދުﷲ ލިޔުމެއް ލިޔުއްވާފައިވެ އެވެ.
