ލާމަރުކަޒީ ގާނޫނުން ލޯކަލް ކައުންސިލްތަކަށް ދީފައިވާ ބާރުތައް ތަންފީޒު ނުކުރެވޭތީ އެ ކަންކަން ހައްލު ކުރުމަށް ގޮވާލާ، އިދިކޮޅު ޕީޕީއެމް/ޕީއެންސީ ކޯލިޝަނުން ރައްޔިތުންގެ މަޖިލީހަށް މިއަދު ގަރާރެއް ހުށަހަޅައިފި އެވެ.
ނައިފަރު ދާއިރާގެ މެންބަރު އަހުމަދު ޝިޔާމް ހުށަހަޅުއްވި މި ގަރާރުގެ ފުރަތަމަ ކިޔުން ވަނީ މިއަދުގެ ޖަލްސާގައި އިއްވާފަ އެވެ.
ޝިޔާމް ހުށަހެޅުއްވި ގަރާރުގައި ވަނީ ކައުންސިލްތަކަށް ދިމާވާ ގިނަ ގޮންޖެހުންތަކަކާ ކަންބޮޑުވުންތަކެއް ހިމަނާފަ އެވެ. މިގޮތުން ކައުންސިލްތަކަށް މާލީ ގޮތުން ގިނަ ދަތިތަކެއް ކުރިމަތިވާކަން ފާހަގަކޮށްފައިވެ އެވެ.
ޝިޔާމްގެ ގަރާރުގައި ފާހަގަކޮށްފައިވާ މައިގަނޑު މައްސަލަތަކަކީ:
- ކައުންސިލަށް މުވައްޒަފުން ނެގުމުގައި ސިވިލް ސާވިސް ކޮމިޝަނާއި ފިނޭންސް މިނިސްޓްރީން ދިމާވާ ދަތިތައް
- ކައުންސިލްތަކުގެ އޮނިގަނޑު އެލްޖީއޭއިން ފާސްނުވެ ދިގުލައިގެން ދިއުމުން ކުރިމަތިވެފައިވާ މައްސަލަތައް
- ލޭންޑް ޔޫސް ޕްލޭންތައް ނުހެދި މަސައްކަތްތައް ހުއްޓުން
- އަތޮޅު/ސިޓީ ކައުންސިލަށް ދީފައިވާ ބާރުތައް ހަނިކޮށްފައިވުމުގެ ސަބަބުން ހިދުމަތްތައް ހުއްޓުން
ގަރާރުގައި ބުނެފައިވާ ގޮތުގައި ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތަކަށް ގާނޫނުން ދީފައިވާ ބާރުތައް އެންމެ ފުރިހަމަ ގޮތުގައި ތަންފީޒު ނުކުރެވޭތީ، އެ ކަމުގެ ސަބަބުން ރައްޔިތުންނަށް ލިބެން ޖެހޭ ގިނަ ހިދުމަތްތަކެއް ވަނީ ހުއްޓިފަ އެވެ. އެހެންކަމުން މިކަންކަން ހައްލު ކުރުމަށް ގަރާރުގައި ސަރުކާރަށް އިލްތިމާސްކޮށްފައިވެ އެވެ.
