އެއް އާއިލާއަކަށް ނިސްބަތްވާ ދެ ކުއްްޖަކަށް ޖިންސީ ގޯނާކުރި ކަމުގެ ތުހުމަތަށް ހައްޔަރު ކުރި މީހާ ކްރިމިނަލް ކޯޓުން ދޫކޮށްލުމަށްފަހު ހމަ އެކޯޓުގެ އަމުރެއްގެ ދަށުން އަނެއްކާ ވެސް ހައްޔަރުކޮށްފި އެވެ.
އެމީހާ ހަ ކުއްޖަކަށް ޖިންސީ ގޯނާ ކުރިކަމަށް ބައެއް މީޑިއާތަކުން މީގެ ކުރިން ރިޕޯޓްކޮށްފައި ވިޔަސް ކޯޓް އަމުރުގައިވާ ގޮތުން އޭނާއަށް ކުރަނީ ދެކުއްޖަކަށް ޖިންސީ ގޯނާކުރި ކަމުގެ ތުހުމަތެވެ.
އެ މައްސަލައާ ގުޅިގެން މިދިޔަ އޭޕްރިލް މަހުގެ ނުވަ ވަނަ ދުވަހު ކޯޓު އަމުރެއްގެ ދަށުން ހައްޔަރު ކުރި 55 އަަހަރުގެ އެ މީހާގެ ބަންދަށް ކޯޓުން އެންމެ ފުރަތަމަ ދިނީ 30 ދުވަހެވެ. ފުލުހުންގެ އޮފިޝަލަކު "އަދަދު"އަށް ވިދާޅުވި ގޮތުގައި، އޭނާގެ ބަންދުގެ މުއްދަތު އިތުރު ކުރަން އިއްޔެ ކްރިމިނަލް ކޯޓަށް ގެންދިއުމުން އޭނާ ބަންދުން ދޫކޮށްލި ކަމަށެވެ. އިތުރު ތަފްސީލެއް ނުދެއްވަ އެވެ.
ފުލުހުން މިއަދު ބުނީ ކޯޓުގެ އަމުރެއްގެ ދަށުން އަނެއްކާ ވެސް އެ މައްސަލައިގައި ހިމެނޭ މީހާ ހައްޔަރުކޮށްފައިވާ ކަމަށެވެ. ކޯޓު އަމުރު ލިބުމާއެކު ފުލުހުން މިހާރު ވަނީ އެމީހާ މާލޭގައި ދިރިއުޅޭ ގެޔަށްގޮސް އެމީހާ ހައްޔަރުކޮށްފަ އެވެ.
އޭނާ ހައްޔަރުކުރަން ކްރިމިނަލް ކޯޓުން ދިން އަމުރުގައިވާ ގޮތުން އޭނާ ފުރަތަމަ ދޫކޮށްލީ ގާނޫނީ ހައްޔަރުކުރުމުގައި ގާނޫނީ ގޮތުން ފުރިހަމަކުރަން ޖެހޭ އިޖުރާއަތްތައް ފުރިހަމަ ނުވާތީ އެވެ. އެހެންވެ އޭނާ ދޫކޮށްލީ އެ އިޖުރާއަތްތައް ފުރިހަމަކޮށްގެން އަލުން ހައްޔަރުކުރަން ކަން ވެސް ކޯޓު އަމުރުން އެނގެ އެވެ.
އޭނާ ބަންދުކުރަން އަމުރު ދިނީ އޭނާއާ ދެކޮޅަށް ކޮށްފައިވާ ތުހުމަތަށް ބާރުލިބޭ ހި ހުރުމުންނެވެ. އޭގެ ތެރޭގައި އަނިޔާ ލިބުނު ކުދިންގެ ބަޔާންތަކާއި ފަންނީ ރިޕޯޓްތަކާއި ތަހުގީގު ބަޔާންތައް ހިމެނެ އެވެ.
