މިލާން (އޭޕްރީލް 30) - މަޝްހޫރު ގިނަ ކުޅުންތެރިންތަކެއްގެ އޭޖެންޓްކަން ކުރަމުން އަންނަ އިޓަލީގެ މިނޯ ރައިއޯލާ މިއަދު މަރުވެއްޖެ އެވެ.
މީގެ ދެ ދުވަސް ކުރިން އިޓަލީ މީޑިއާތަކުން ރައިއޯލާ މަރުވި ކަމަށް ރިޕޯޓްކުރި އެވެ. އެކަމަކު، ފަހުން ޓްވީޓަކުން ރައިއޯލާ ބުނީ ހަތަރު މަސް ތެރޭ ދެ ވަނަ ފަހަރަށް މީޑިއާ އިން އޭނާ މަރަލާފައިވާ ކަމަށާއި ހަގީގަތަކީ ސިއްހީ ހާލަތު ދަށްވީ ކަމަށެވެ.
އޭގެ ދެ ދުވަސް ފަހުން ރައިއޯލާ މަރުވިކަން އޭނާގެ އާއިލާ އިން މި ވަނީ ކަށަވަރުކޮށްދީފަ އެވެ.އުމުރުން 54 އަހަރުގެ ރައިއޯލާ މަރުވެފައިވަނީ ބައްޔަކަށް ފަރުވާ ހޯދަމުން ދަނިކޮށެވެ.
މިދިޔަ ޖެނުއަރީ މަހު މިލާންގެ ހޮސްޕިޓަލެއްގައި ރައިއޯލާގެ ހާލު ސީރިއަސްވެގެން އެޑްމިޓް ކުރި ނަމަވެސް އެއީ ކޮން ބައްޔެއް ވެގެންކަން މީޑިއާގައި ހާމަކޮށްފައިނުވެ އެވެ. އެ ފަހަރު ރައިއޯލާ އޮޕަރޭޝަނެއް ކުރި ކަމަށް ވެސް މީޑިއާ ރިޕޯޓްތައް ބުނެ އެވެ. ޖަރުމަނު ނޫސްތަކުން ރިޕޯޓްކޮށްފައިވާ ގޮތުގައި ރައިއޯލާ ފަރުވާ ހޯދަމުން އަންނަނީ ފުއްޕާމޭ އަށް ދިމާވެފައިވާ މައްސަލަތަކަކަށެވެ.
ރައިއޯލާ އަކީ ޕައުލް ޕޮގްބާ، ޒަލަޓާން އިބްރަހިމޮވިޗް، ޖިއަންލުއީޖީ ޑޮންނަރުންމާ އަދި އާލިން ބްރައުޓް ހާލަންޑްގެ އިތުރުން މަޝްހޫރު ގިނަ ކުޅުންތެރިންތަކެއްގެ އޭޖެންޓް އެވެ.
ދާދި ފަހަކާ ޖެހެންދެން ރައިއޯލާ އެންމެ ބޮޑަށް ކުރަމުން އައި މަސައްކަތަކީ ޑޯޓްމަންޑަށް ކުޅެމުން އަންނަ ހާލަންޑްގެ ޓްރާންސްގެ މަޝްވަރާތަކެވެ. ރިޕޯޓްތައް ބުނާގޮތުގައި ރައިއޯލާ ވަނީ ހާލަންޑް، މެންޗެސްޓާ ސިޓީ އަށް ސޮއިކުރަން ކުރަން ޖެހޭ މަޝްވަރާތައް ނިންމާލައިފަ އެވެ.
މަޝްހޫރު ފުޓްބޯޅަ އޭޖެންޓް ރައިއޯލާ: ފުޓްބޯޅައިގެ އެންމެ ނުފޫޒުގަދަ އޭޖެންޓުންގެ ތެރޭގައި ރައިއޯލާ ހިމެނޭ.
އިޓަލީ އަށް އުފަންވި ނަމަވެސް ރައިއޯލާ، ޒުވާން ދުވަސްވަރު އެންމެ ބޮޑަށް އުޅުނީ ނެދަލެންޑްސްގަ އެވެ. އެ ގޮތުން ނުވަދިހައިގެ ފަހުކޮޅުގައި ފުޓްބޯޅަ ސްކައުޓުންނާ ގުޅިގެން ހުނަރުވެރި ކުޅުންތެރިން ފާހަަގަކުރުމުގެ މަސައްކަތް ފެށި އެވެ.
އެ ގޮތުން އަޔަކްސްގައި ފުޓްބޯޅަ ޕްރޮމޯޓްކުރާ އޮފިޝަލެއްގެ ގޮތުގައި އެންމެ ފުރަތަމަ މަސައްކަތްކުރި ރައިއޯލާ، ފަހުން އޭޖެންޓަކަށް ބަދަލުވެ، ކުޅުންތެރިންގެ ޓްރާންސްފާ މާކެޓްގައި ފެނުނީ ވަރުގަދަ ނަމެއްގެ ގޮތުގަ އެވެ. އެހެންވެ، ފަހަކަށް އައިސް އޭނާ މަޝްހޫރުވެފައިވަނީ ވެސް "ސުޕަ އެޖެންޓް" ގެ ނަމުންނެވެ.
ރައިއޯލާ އެންމެ ފުރަތަމަ އެޖެންޓެއްގެ ގޮތުގައި މަސައްކަތްކުރި މަޝްހޫރު ކުޅުންތެރިންގެ ތެރޭގައި ނެދަލެންޑްސްގެ ލެޖެންޑަރީ ފޯވާޑް ޑެނިސް ބާގްކެމްޕް އާއި ޗެކް ރިޕަބްލިކްގެ ހުނަރުވެރި މިޑްފީލްޑަރު ޕަވެލް ނެޑްވެޑް ހިމެނެ އެވެ.
ކުޅުންތެރިންގެ އޭޖެންޓެއްގެ ގޮތުގައި ގަވާއިދާ ހިލާފަށް އަމަލުކުރަމުން އަންނާތީ 2019 ވަނަ އަހަރު ފީފާ އާއި އިޓަލީގެ ފުޓްބޯޅަ ފެޑެރޭޝަނުން ވަނީ ރައިއޯލާ ތިން މަހަށް ސަސްޕެންޑްކޮށްފަ އެވެ. ރައިއޯލާ އަށް އަދަބުދިން އެންމެ ބޮޑު އެއް ސަބަބަކީ ކުޅުންތެރިންގެ ޓްރާންސްފާތަކުގެ ތެރެއިން އޭނާ ނަގާ އެޖެންޓް ފީ ބޮޑުވުމެވެ. އެ ގޮތުން މެންޗެސްޓާ ޔުނައިޓެޑުން 2016 ވަނަ އަހަރު ޕޮގްބާ ގަންނަން ދުނިޔޭގެ އޭރުގެ ރެކޯޑް ފީއެއް ކަމަށްވާ 105 މިލިއަން ޔޫރޯ (110 މިލިއަން ޑޮލަރު) ހަރަދުކުރިއިރު، އެ ފަހަރު ރައިއޯލާ އަށް އެޖެންޓް ފީގެ ގޮތުގައި 25 މިލިއަން ޔޫރޯ (26 މިލިއަން ޑޮލަރު) ލިބުނު ކަމަށް ރިޕޯޓްތައް ބުނެ އެވެ.
