ލަންޑަން (އޮކްޓޫބަރު 21) - މި ފަހަރުގެ ޓްރާންސްފާގައި ޗެލްސީ އަށް ބަދަލުވެ، އެ ޓީމުގައި ރަނގަޅު ކުޅުމެއް ދައްކަމުން އަންނަ ޖޯޑަން ހެންޑަސަން، އިންގްލެންޑުން ރިޓަޔާނުކުރާ ކަމަށް ބުނެފި އެވެ.
އުމުރުން 36 އަހަރުގެ ހެންޑަސަންގެ ކެރިއަރުގެ އެންމެ މުހިންމު އަހަރުތައް ހޭަދަކުރީ ލިވަޕޫލްގެ ކެޕްޓަނެއްގެ ގޮތުގަ އެވެ. އެ ގޮތުން، ތިރީސް އަަހަރަށް ފަހު ލިވަޕޫލުން އިނގިރޭސި ޕްރިމިއާ ލީގުގެ ޗެމްޕިއަންކަން ހޯދިއިރާއި ސާދަ އަހަރަށް ފަހު ޗެމްޕިއަންސް ލީގުގެ ތަށި އުފުލާލިއިރު، ކެޕްޓަނަކީ ހެންޑަސަން އެވެ. މީގެ އިތުރުން، ހެންޑަސަން ލީޑަރަކަށް ހުރެ، ލިވަޕޫލުން ޔުއެފާ ސުޕަ ކަޕާއި ފީފާ ކްލަބް ވޯލްޑް ކަޕްގެ ޗެމްޕިއަންކަން ވެސް ހޯދި އެވެ.
ލިވަޕޫލް ދޫކޮށް، 2023 ވަނަ އަހަރު ހެންޑަސަން ފުރަތަމަ ބަދަލުވީ ސައުދީ ޕްރޯ ލީގުގެ އަލް އިއްތިފާގަށެވެ. އޭގެ ފަހުން، ނެދަލެންޑްސްގެ އަޔަކްސް އަށް ވެސް ކުޅުމަށް ފަހު، މިދިޔަ ސީޒަން ފެއްޓުމުގެ ކުރިން، އެނބުރި ޕްރިމިއާ ލީގަށް އައީ ބްރެންޓްފޯޑަށެވެ. މިދިޔަ ސީޒަނުގައި ބްރެންޓްފޯޑަށް 32 މެޗު ކުޅުނު ހެންޑަސަން، އެ ޓީމުގެ އެއްބަސްވުން ނިމުމަކަށް ގެނައީ، ޗެލްސީގެ ހުށަހެޅުމެއް ލިބުމުންނެވެ. ޗެލްސީއާ އެކު، ދެ އަހަރުގެ އެއްބަސްވުމެއްގައި ހެންޑަސަން ވަނީ ސޮއިކޮށްފަ އެވެ.
ޗެލްސީން މި ފަހުން ކުޅުނު މެޗުތަކުގައި ފުރަތަމަ އެގާރައިގައި ހިމެނިގެން ކުުޅުނު ހެންޑަސަން ވަނީ ބޯންމައުތު ކޮޅަށް ދެ ގޯލު ވެސް ޖަހައިފަ އެވެ. އިންގްލެންޑްގެ ކޯޗު ތޯމަސް ޓުޗެލް، ނަގާ ސްކޮޑުން ހެންޑަސަން އަށް ފުރުސަތު ދޭތީ އިނގިރޭސި މީޑިއާތަކުގެ ފާޑުކިޔުން އަމާޒުވެ އެވެ.
ހެންޑަސަން ބުނީ، ކުޅުމުގެ ކެރިރިއަރު ކުރިއަށްގެންދާއިރު އަބަދުވެސް އިންގްލެންޑަށް ކުޅުމުގެ ޝައުގު ދެމި އޮންނާނެ ކަމަށެވެ.
"އިންގްލެންޑަށް ކުޅެން ފުރުސަތު ހޯދޭނީ އަހަރެން ޗެލްސީގައި ވެސް ރަނގަޅު ވަޒީފާއެއް އަދާކޮށް، ރަނގަޅު ކުޅުމެއް ދައްކައިގެން. އަހަރެން މި ވަގުތު ވެސް އެންމެ މަތީ ފަންތީގައި ކުޅެމުން މި އަންނަނީ، އެހެންވީމަ، އިންގްލެންޑަށް ނުކުޅެންވީ ސަަބަބެއް ނެތް،" ހެންޑަސަން ބުންޏެވެ.
އެންމެ ފަހުން، ޗެލްސީން ޕްރިމިއާ ލީގުގައި ކުޅުނު ތިން މެޗުގައި ވެސް 90 މިިނިޓް ކުޅުނު ހެންޑަސަން ބުނީ، އޭނާގެ ކެރިއަރުގައި އެއްވެސް އިރެއްގައި ބޭރުގެ ތެރެއިން އިވޭ އަޑުތަކަށް ސަމާލުކަމެއް ނުދޭ ކަމަށެެވެ. އަދި، ކޮންމެ މީހެއްގެ ވެސް އަމިއްލަ ވިސްނުމެއް ހުންނާނެ ކަަމަށާއި އެންމެން ގަޔާވާ ގޮތަށް ހުރިހާ ކަމެއް ނުކުރެވޭނެ ކަމަށް ވެސް ހެންޑަސަން ވަނީ ބުނެފަ އެވެ.
އިންގްލެންޑަށް އެންމެ ފުރަތަމަ 2010 ވަނަ އަހަރު ކުޅުނު ހެންޑަސަން ވަނީ ގައުމީ ޓީމަށް ކުޅެދިން 90 މެޗުން ތިން ލަނޑު ޖަހައިފަ އެވެ.
