ރާއްޖެއަށް މީހުން ޓްރެފިކްކޮށް އެ މީހުން ލައްވާ ހަށި ވިއްކަމުން ދިޔަ ދެ ބިދޭސީއަކު 15 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
ކްރިމިނަލް ކޯޓުން މިދިޔަ ބުދަ ދުވަހު ހުކުމް ކުރީ ބަންގްލަދޭޝްގެ މޮނީރު އަދި ސިއްދީކް ނަމަކަށް ކިޔާ މީހެއްގެ މައްޗަށެވެ.
މޮނީރުގެ މައްޗަށް ދެ ދައުވާއެއް ދައުލަތުން އުފުލާފައިވެ އެވެ. އެއީ މީހުން ޓްރެފިކް ކުރުމުގެ ކުށުގެ ދައުވާ އަދި ރާއްޖޭގައި މީހަކު ލައްވާ ހަށި ވިއްކުމުގެ ކުށުގެ ދައުވާ އެވެ.
މީހުން ޓްރެފިކް ކުރުމުގެ ދައުވާއަށް 15 އަހަރުގެ ޖަލު ހުކުމެއް އިއްވި އެވެ. ހަށި ވިއްކުމުގެ ދައުވާއަށް ވެސް 15 އަހަރުގެ ޖަލު ހުކުމެއް އިއްވި އެވެ.
މީގެ ދެ އަހަރު ކުރިން 2019 ވަނަ އަހަރު ހައްޔަރުކުރި މޮނީރު ޖަލުގައި އޮންނަތާ ދެ އަހަރާއި 10 މަހާއި ދުވަސްވަރެއް ހޭދަކޮށްފައިވާތީ ޖަލު ހުކުމުން ތަންފީޒު ކުރަން ޖެހެނީ އެ މުއްދަތު އުނި ކުރުމަށް ފަހު އެވެ.
ސިއްދީކުގެ މައްޗަށް ވެސް ދެ ދައުވާއެއް އުފުލާފައިވެ އެވެ. އެއީ ރާއްޖޭގައި މީހަކު ލައްވާ ހަށި ވިއްކުމުގައި ބައިވެރިވުމުގެ ދައުވާއާއި، މީހުން ޓްރެފިކް ކުރުމުގައި އެއްވެސް ސިފައެއްގައި ބައިވެރިވުމުގެ ދައުވާ އެވެ.
ހަށި ވިއްކުމުގައި ބައިވެރިވުމުގެ ދައުވާއަށް 11 އަހަރުގެ ޖަލު ހުކުމެއް އިއްވި އެވެ. އަދި މީހުން ޓްރެފިކް ކުރުމުގައި ބައިވެރިވުމުގެ ދައުވާއަށް ހަތް އަހަރުގެ ޖަލު ހުކުމެއް އިއްވި އެވެ.
ސިއްދީކުގެ ވެސް ހައްޔަރުކޮށް ޖަލުގައި ބަންދުކޮށްފައިވާތާ ދެ އަހަރާއި 10 މަހާއި ދުވަސްވަރެއް ހިނގާފައިވާތީވެ، ޖަލު ހުކުމުން ތަންފީޒު ކުރަން ޖެހެނީ އެ މުއްދަތު އުނި ކުރުމަށް ފަހު އެވެ.
