އިންޑިއާގެ މުސްލިމުންނާ ދެކޮޅަށް އެ ގައުމުގައި ހިންގަމުންދާ ޖަރީމާތައް ކުށްވެރި ކުރުމަށް ގޮވާލައި ނައިފަރު ދާއިރާގެ އިދިކޮޅު މެމްބަރު އަހުމަދު ޝިޔާމް ރައްޔިތުންގެ މަޖިލީހަށް މިއަދު ހުށަހެޅުއްވި ކުއްލި މައްސަލައަށް ފުރުސަތު ނުދޭން މަޖިލީހުގެ ރިޔާސަތުން ނިންމައިފި އެވެ.
މަޖިލީހުގެ މިއަދުގެ ޖަލްސާ ފެއްޓެވުމާއެކު ރިޔާސަތުގައި އިންނެވި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ ޝިޔާމް ހުށަހެޅުއްވި ކުއްލި މައްސަލަ މަޖިލީހުގެ ގަވައިދާ އެއް ގޮތަށް ކުއްލި މައްސަލައަކަށް ނުވާ ކަމަށެވެ.
އެހެންކަމުން އެ މައްސަލަ މަޖިލީހުގައި ބަހުސްކުރަން ވެސް ފެނިވަޑައިނުގަންނަވާ ކަމަށް ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި ދެކުނު އޭޝިއާގެ ގައުމުތަކުގައި ނަސްލުތަކާއި ދީންތައް އެއް މަސްލަހަތަކަށް ގެނައުމަށް މަސައްކަތް ކުރާތާ 500 އެއްހާ އަހަރު ވެއްޖެ އެވެ.
"މިއަދު ކުއްލިއަކަށް އަޅުގަނޑުމެން އަވައްޓެރި ގައުމުތަކުގެ ދާހިލީ ކަންކަމާ ގުޅޭގޮތުން މި މަޖިލީހުގައި ބަހުސް ކުރުމުގެ ފުރުސަތު ދޭކަށް އަޅުގަނޑަކަށް ނުފެނޭ،" ނަޝީދު ވިދާޅުވި އެވެ.
ނަޝީދު ވިދާޅުވީ އެކަމަކީ މަޖިލީހުގެ ގަވައިދު ވެސް، ޑިމޮކްރެޓިކް އުސޫލުތައް ވެސް އަދި ރާއްޖޭން ގަބޫލުކުރާ ހަމަތައް ތަންދޭ ކަމެއް ނޫން ކަމަށެވެ.
އިންޑިޔާގެ އުއްތަރަ ޕްރަދޭޝާއި މަދްޔަ ޕްރަދޭޝާއި ގުޖުރާތު ފަދަ ސްޓޭޓުތަކުގައި އެތައް ސަތޭކަ މުސްލިމުންނަށް އަނިޔާކޮށް، މުސްލިމުންގެ ގެދޮރަށާއި މުދަލަށް ދަނީ ގެއްލުންދީ، ސުންނާފަތި ކުރަމުންނެވެ.
