ހުޅުމާާލޭ ޚާންޖީ ރެސްޓޯރެންޓް ބަދިގެ ތެރޭގައި މީހަކަށް ހަމަލާދިން ކަމުގެ ތުހުމަތުގައި ހައްޔަރުކުރި ޕާކިސްތާނަށް ނިސްބަތްވާ ޝެފު، މުހައްމަދު އާބިދު ހައްޔަރުކޮށްފައި ވަނީ ހުޅުމާލޭ ދެވަނަ ފޭސްގެ ބީޗް ސަރަހައްދުން ކަމަށް ފުލުހުން ބުނެފި އެވެ.
އާބިދު އަތުލައިގަނެފައި ވަނީ ހަމާދިނުމަށްފަހު ފިލައިގެން އުޅެނިކޮށް އޭގެ ނުވަ ވަރަކަށް ގަޑިއިރު ފަހުންނެވެ. އެ މައްސަލައިގައި އާބިދު ހޯދުމަށް ފުލުހުން ރޭ އޭނާގެ ފޮޓޯ އާއްމުކޮށްފައިވެ އެވެ. އޭނާ ހައްޔަރުކުރިކަން ފިޔައި އިތުރު ތަފްސީލެއް އޭރު ފުލުހުން ދީފަ އެެއް ނުވެ އެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ އާބިދު ހައްޔަރުކުރީ ހުޅުމާލޭ ފޭސް ދޭއްގެ ބީޗުން ކަމަށެވެ. އަދި އެ މައްސަލައާ ގުޅިގެން އިތުރު މީހަކު ހައްޔަރު ކޮށްފައި ނުވާ ކަމަށްވެސް ފުލުހުން ބުންޏެވެ.
އާބިދު ދަންނަ މީހުން ބުނާ ގޮތުގައި ވަރަށް އަވަހަށް ރުޅި އަންނަ, ރުޅި ގަދަ މީހެކެވެ. މީގެކުރިން ވެސް ރެސްޓޯރެންޓް ތެރޭގައި މާރާމާރީއެއް ހިންގާފައިވެ އެވެ.
ހަވީރު ރެސްޓޯރެންޓްގެ ބަދިގެ ތެރޭ ހިނގި ދެބަސްވުމުގެ ސީދާ ސަބަބު ސާފުވެފައި ނުވީ ނަމަވެސް, އެނގިފައިވާ ގޮތުގައި ހަމަލާ ދިން ކަމަށް ތުހުމަތުވާ ޕާކިސްތާނުގެ ކައްކާ އާއި ބަންގްލަދޭޝް މީހާއާ ދެމެދު މީގެ ކުރިން ވެސް ދެބަސްވުންތައް ހިނގަ އެވެ.
"އަދަދު"އަށް ލިބިފައިވާ ވީޑިއޯއަކުން ފެންނަ ގޮތުގައި, ބަންގްލަދޭޝް މީހާ ރެސްޓޯރެންޓްގެ ތަޅުންގަނޑު މަތީ އޮތްއިރު އެތަނުގައި ތިބި އެހެން މުވައްޒަފުން އޭނާއަށް ސީޕީއާރްދީ, މޫނަށް ފެން ޖަހައި ހޭއަރުވަން މަސައްކަޔް ކުރާތަން ފެނެ އެވެ.
އޭނާ ބާއްވާފައި އޮތީ ހަމަލާދިން ތަނުގައި ކަމެއް ސާފެއް ނޫނެވެ. އެތަނުގައި ލޭ ފެންނާކަށް ނެތެވެ. އެކަމަކު ޓީޝާޓް އޮތީ ލެއިން ފޯވެފަ އެވެ.
ވީޑިއޯއިން ފެންނަ ގޮތުގައި ބަންގްލަދޭޝް މީހާއަށް ސީޕީއާރްދީ, އޭނާ ފަރުވާއަށް ހޮސްޕިޓަލަށް ގެންދިޔުމަށްޓަކައި ޕާކިސްތާނަށް ނިސްބަތްވާ އެހެން މުވައްޒަފުންތަކެއް އުޅެ އެވެ. އުރުދޫ ބަހުން އެމީހުން ވާހަކަ ދައްކަމުން ދިޔައިރު, ކަން ހިނގި ގޮތް އެމީހުންނަށް ވެސް އޮޅުންނުފިލައިގެން އުޅޭ ތަން ފެނެ އެވެ.
