މާލޭގައި ބިދޭސީންތަކެއްގެ މެދުގައި މިރޭ މާރާމާރީ ހިންގައި އެކަކަށް އަނިޔާވެއްޖެ އެވެ.
މިއީ ބިދޭސީންގެ މެދުގައި މިއަދު ހިންގި ދެވަނަ މާރާމާރީ އެވެ. އެންމެ ފުރަތަމަ މާރާމާރީއެއް ހިންގާފައިވަނީ ހުޅުމާލޭގައި ހަވީރުގެ ވަގުތެއްގަ އެވެ. އެ މަރާމާރީގައި އަނިޔާވި ބަންގްލަދޭޝްގެ މީހާ ވަނީ މަރުވެފަ އެވެ.
އެ ހަމަލާގެ ތުހުމަތު ކުރެވޭ ޕާކިސްތާނަށް ނިސްބަތްވާ މުހައްމަދު އާބިދު ކިޔާ މީހަކު ހޯދުމުގެ މަސައްކަތް ފުލުހުން ދަނީ ކުރަމުންނެވެ.
އެ މަރާމާރީ ހިނގައި, މީހަކު މަރުވެފައިވަނިކޮށް މިރޭ މާލޭ ސޯސަން މަގުގައި ވެސް ވަނީ ބިދޭސީންތަކެއްގެ މެދުގައި ބޮޑު މަރާމާރީއެއް ހިނގާފަ އެވެ.
ފުލުހުން ބުނީ ސޯސަން މަގުގައި ބިދޭސީންތަކެއްގެ މެދުގައި މާރާމާރީއެއް ހިންގައިގެން އުޅޭ ކަމުގެ މައުލޫމާތު ލިބިފައި ވަނީ މިރޭ 8:20 ހާއިރު ކަމަށާއި، އެ ސަރަހައްދުގައި ފުލުހުން ހަރަކާތްތެރިވަމުންދާ ކަމަށެވެ.
މައުލޫމާތު ލިބިފައިވާ ގޮތުގައި ބިދޭސީ ގްރޫޕަކުން ވަނީ ބިދޭސީއެއްގެ ގައިގައި ތަޅައި މާރާމާރީ ހިންގާފަ އެވެ. އެ ހާދިސާގައި އެ ބިދޭސީ މީހާއަށް އަނިޔާވެފައިވާ ކަމަށް ފުލުހުން ބުންޏެވެ.
